iPhone用家乜都唔識，只係坐地鐵攞出來威」、「iPhone無得換電，日日掛尿袋」、「Android 機APP 太少，又慢」「Android 系統太鬆散，將來會步 WM 後塵」，這些對話每天都在討論區睇唔少，更隨著 iPhone 用家人數倍增後，有些人覺得實在太濫所以炮轟．．．總言之千奇百怪的攻擊理由都有，雙方每天就在網上吵個你死我活，不下於當年 DSLR C 記和 N記之爭，亦不下於利迷與．．．．我講太多喇!因為工作關係，我兩台手機都有接觸過也分享一下自己的感受。 第一次係呢度分享意見，同大家介紹一下自己先。我係一名大型電子產品連鎖店的銷售主管，乜野新貨到手都會試一試，閒時會上網睇下 forum，有時對住d 半桶水串串哄的客同埋d無良代理，真係不吐不快。我見到 unwire.hk 有呢個個人評論專區，所以同佢地講話比我上黎寫下野發洩下，點知真係批左，所以今日黎傾下。真正身份無謂講喇，我仲要養活一家三口，上黎炮轟代理同啲客喎，比你投訴我我仲有得撈?各位叫我「串哥」就 Okay 啦!
OK 入番正題，日日睇 forum 都見兩班友係度嘈，串哥心諗你地真正有幾多人用過兩部機先?有人話比未來前景，我就唔係乜分析大師，呢行變化咁大真係好難估，像當年 iPhone 2G 比人評為爛機不值一文可料到港後亦咪一樣搶購一空，將來的事暫且唔評了，要評的是現在。
一位當年跟小弟一齊入手的 iPhone 朋友 ，自從 HTC Magic 推出後就轉至 Android 陣型，至今以升級至 Motorola 的 Milestone ，他坦言用過 android 後真係唔想轉番 iPhone，首先通話質素，佢話係港鐵嘈少少都聽唔到電話，對方又聽唔到自己，聆聲又細，作為電話的基本野都唔合格！佢平時只係上下網、MSN、FB 咁又唔打機，仲話 iPhone 啲 Game 跟本千篇一律，好似炮塔game咁，一個idea 有百幾款，其實玩來玩去咪又係咁，仲有啲 Game 要用 Joypad ，個 iPhone virtual pad 跟本就唔掂! 仲有 android 個介面整合同contact 都做得好過 iPhone 好多，iPhone果一格格介面無鬼用。
佢呢番話，串哥我都好認同。用過一排 android 真係好多通訊上同上網野都好方便，我又係 d 唔打機的人，所以乜鬼野 iPhone 我就無咩興趣，但係點解我仲keep 住部 iPhone 3Gs？因為 3Gs 的速度真係好流暢好快，當然而家 d Android 機 CPU 咁快追得上有突，但係 3Gs 係放大縮小，旋轉個反應真係令人唔想換機，仲有就係用家習慣，係iPhone上的操作好簡單我好仲意，正如過歌入片咁，一個 iTunes 攪掂晒唔使好似以前 WM咁又抄入card 又拉floder，我自己就好享受呢點，唔使煩！
其實用 Android 個朋友都話，iPhone 好就好在乜都同你攪掂晒，其實我用左 android 機咁耐，你唔攪下佢真係唔係幾合自己心水，所以一路唔停咁上forum搵新 rom ,單係 flash rom都玩左我幾廿次，試呢樣果樣，有乜裝得有乜唔裝得，好聽啲就係玩自訂，玩優化，實際就係機玩你！如果你無乜電腦底同一啖心機時間，你都係用番 iPhone 啦。
在我而言，我唔覺得 iPhone 同 android 有咩咁好比，android 功能我覺得比較專業，係一種玩家型的玩物；iPhone 就好易上手乜都唔使煩，多花巧game玩，係消閒型的類別。所以你唔難發現好多人用 iPhone，正如女仔你比部android佢可能唔及一隻 iPhone cute cute game 咁過引，一樣米難養百養人，嘈黎做乜野呢，慳番啖氣啦，自己用得著咪得囉
**以上言論只屬個人意見，不代表本網立場**
