先達九成以上手機舖都有賣 iPhone 或 iPad，只剩番好少數舖頭係完全唔賣呢兩樣野、但係又生存到，佢地就係專賣日系手機o既舖頭。不過近排冇乜新款日系機到港，佢地惟有打番Ｄ舊款主意，睇下有冇咩漏網之魚o岩o岩解到鎖，就即刻入番黎賣，卒之俾佢地搵到兩部 LG 機 DoCoMo L-01B 同 L-02B。
其實兩部機都係上年年尾出，就算隔左一輪先解到鎖，都唔算好舊。解鎖仲要唔駛 Hyper SIM，軟解就搞得掂，乜台 SIM 卡都用到，又唔會成日圈外。始終有Ｄ人鍾意用軟解日系機多Ｄ，近幾個月又好少呢類機，所以班老闆都幾有信心入貨，開價亦唔平，L-01B 賣 $3,580，L-02B 賣 $3,080。
不過佢地屬於 DoCoMo o既 STYLE 系列，玩款多過玩功能，所以規格唔係好勁。仲要講到樣，L-02B 其實同 LG Lollipop 幾似，只係身份變左日系機，當堂貴左二千幾，但真係有人為左佢有而 Lollipop 冇o既綠同白色而買；L-01B 更有黃同桃紅兩隻勁搶眼o既色，緊係都引到人買啦。就係有班咁靚o既客，先會養到Ｄ日系手機舖，唔係連佢地都要賣 iPhone 啦！
黃色不嬲係日系機好受歡迎o既顏色，L-01B 主要就係靠呢隻色食糊。
L-01B 個 Keypad 上高仲有塊 Touchpad，又有 510 萬像素鏡頭（L-02B 得 320萬），所以賣貴過 L-02B。
L-02B 個款同 Lollipop 有Ｄ似，但隻粉紅色就冇 Lollipop 咁鮮。
查詢：豆腐之攜帶（6203 4429）
