呢期三叔手機自己打自己，o岩o岩先出完部用 bada 自家開發系統o既 Wave，轉個頭又整多部頂班 Android 機 Galaxy S，兩部咁勁o既行機一齊黎，水機仲邊有掟企，到左冇耐o既 Galaxy SPICA i5700，當堂做左炮灰。
老老實實，三叔出行機o既策略都幾難明，打 iPhone 4 一部勁機就夠啦，而家兩部機同門互憾，Android 機多 D 人用，但另一部又有新 OS 玩，D 人都唔知買邊部好。但點都好，呢期三叔總叫做行機威晒，起碼兩部勁機都係行貨先到，Galaxy S 水貨到而家都仲未到添，只得佢部 Lite 版 Galaxy SPICA i5700 到左。
i5700 雖然搶到閘，但係銷情認真曳，搞到價位勁插水，o岩o岩到步果陣賣二千樓上，過左冇耐已經插到 $1,680。部機衰乜？最主要係本身仲行緊 Android 1.5，鏡頭又只得 300 萬像素，兼且冇新機個 Super AMOLED 靚芒，Spec 爭咁遠，就算賣到咁平都冇人吼啦！
i5700 有黑白兩色，而家賣到 $1,680；隔離部 Wave 水機（S8500）大約賣 $2,980，行貨o係先達就賣 $3,580 左右。
