經過 Weekend 回一回氣，大家係咪以為 iPhone 4 水機炒價會開始回落，準備入番部威o下。真係咁諗o既話，唔好意思，超錯！All Wrong！無鎖英國版唔單止冇落價，仲炒得更加癲！幾錢？$19,800 呀！離譜過天匯 D 呎價！
星期五晚英國版到貨果陣，先達舖開價 32GB $14,800，嚇左大家一跳。你同我呢類「正常人」，緊係唔會出呢個價去買啦！但唔好忘記，先達係全港（甚至全球）o既異類機場，真係有班「唔正常」o既客，買機最緊要快，唔睇價錢o架！所以呢兩日先達到過幾十部英國版，話咁快就俾人掃得八八九九。本來好地地，點知英國果邊忽然冇貨到，班水貨佬緊係借勢再炒貴 D 啦，結果僅餘果幾部機o既價咪上到 $19,800 囉，聽講仲有舖叫到兩皮以上添！
其實唔止先達，尖咀、老銅等區專搶遊客錢 D 電器舖，呢兩日亦陸續有英版 iPhone 4 賣，開價同先達差唔多，平極都要萬五、六。不過，仲未解到鎖o既美國版供貨仍算正常，冇跟住英國版再升價，仲反而跌左少少添，先達同其他區都有舖賣 16GB $7,800 同 32GB $8,800（星期五大約係 $9,800 同 $11,800）。
