今個星期【有碗話碗】嘅主題係我的女神BB，因為我 Bowl 姐最近睇娛樂新聞發現一地都係女神、BB ，好似人人都可以係女神，人人都係 BB…..
回想小時候(我的90年代) ，女神呢個稱呼應該係屬於李嘉欣，周慧敏呢類嘅大美人。到早前講得最多嘅嘉欣BB 都不難理解如何上榜，但直至到最近連夏蕙姐姐，魯芬姐姐都成為女神，令我愈來愈滴汗。
討論得最多嘅仲係唔知應該點分女神同 BB ( ^_^” 有同事最後話神係用黎拜，BB 係用黎錫，咁你記得錫住夏蕙 BB 嗱，haha)
唔知各位網友心目中嘅女神 BB 又係邊個呢？我講下我自己啦 (其實我寫呢份稿之前都認真思考左好耐)，最後選左呢位女神曾經同我有過一面之緣，見到佢果種魅力真係「你存在 ，我深深的腦海裡」。
登登登登… 就係已為人妻，育有三個子女，家庭非常幸福美滿嘅徐子淇。
先撇除佢丈夫家底有多雄厚的因素 (我的心態不像一班「港女」般^_^ ) ，每次見佢出席活動無論佢一舉手一投足都儀態萬千，接觸過佢嘅人都知佢非常有禮貌而且友善到不得了。
「我的女神」基本因素 (只代表我本人立場):
1: 樣唔一定要好靚，要有自己 CHARACTER，笑容一定要好 SWEET，你見到佢一定會俾佢笑容融化
2: 人前人後都態度有善 (你永遠唔會覺得佢係你背後會有另一個樣)，隨時保持笑容，處變不驚
3: 有氣質，行出黎要有台型
4: 有學識，有修養，有內涵
記得我見到佢嘅時候，果時佢仍然大緊肚準備第二胎，一般女人陀小孩會因為暴食/ 荷爾蒙令身材樣貌產生變化，但見佢無論咩角度，望落去都係美豔動人。完全符合「我的女神BB」嘅要求呢！唔知大家的女神、BB 又系邊位？
