今時今日流動 Gadgets 普及的年代，唔少產品都已經轉用無線，就連隨身硬碟都唔例外。WD 最近就在香港推出 My Passport Wireless，好處係用無線與手機接駁，就已經可以在手機上讀取硬碟內的檔案，無論音樂、影片或相片都可以直接在手機上串流欣賞。而且可以備份 SD 卡或手機資料，十分方便。
Wi-Fi 接駁可同時上網
WD My Passport Wireless 採用 Wi-Fi Direct 模式與手機、平板等流動裝置接駁，然後就可以在手機串流直接讀取硬碟內的檔案。可能唔少讀者會問：如果用 Wi-Fi Direct 接駁，當手機與硬碟接駁後，因為手機、平板等裝置，只能接駁一個 Wi-Fi 熱點，那就代表如果用 Wi-Fi Direct 接駁硬碟後，就不能再用 Wi-Fi 上網。如果要跟朋友分享硬碟中的相片、影片等，豈不是要先抄到手機，才能分享？
偏偏 WD 呢款無線硬碟就無呢個問題，只要身處可以接駁 Wi-Fi 上網的地方，即使硬碟接駁了手機，程式都容許手機用另一個 Wi-Fi 熱點上網，這樣手機睇到硬碟內的相片、影片等，亦可以透過 WhatsApp、LINE、電郵等程式與親友分享。
▲內建功能可以俾大家邊串流瀏覽硬碟內的檔案，邊同時上網，不過一定要身處有 Wi-Fi 上網的地方先可以做到。
▲邊接駁了 WD My Passport Wireless 邊上網睇 unwire.hk 影片實測。
▲有得邊無線用硬碟邊上網的好處，係可以唔洗將相片下載去手機，都可以用即時訊息軟件傳送給朋友分享。
當然，如果大家身處只能以 3G / 4G 網絡上網的地方，就不能使用呢個功能，只可以先下載到手機、平板，然後才分享了。
手感頗輕帶出街無負擔
至於手感方面，WD My Passport Wireless 採用了金屬手感的塑膠外殼製造，並非採用金屬外殼，缺點是好似唔夠 grand（始終都千幾蚊隻硬碟……），但這亦算是優點吧，因為採用塑膠外殼，令硬碟不會太重，拿出街用基本上負擔不大，小編用幾隻手指都可以輕鬆托起，而一隻手掌絕對可以牢牢握緊。
▲WD My Passport Wireless 十分輕，Edward 用幾隻手指已經可以托得起。
▲不過外殼始終是塑膠，頗容易刮花，對於執著外表完美的用家，帶出街用個時就要小心保護了。
此外，由於使用 Wi-Fi Direct 與手機接駁，即使要將檔案下載到流動裝置，都十分快，一張 6.21MB 的相片，基本上廿零秒就下載完成。如果接駁電腦，當然都可以高速傳輸檔案，因為它採用了 USB 3.0 介面，只要接駁電腦就可以很快抄寫大量檔案到硬碟然後拿出街用。
另外，WD 呢隻硬碟都內置了 SD 讀卡器，用相機影完的相片，可以插入卡槽，然後透過手機無線控制將相片、影片匯入到硬碟內儲存，以後去旅行就唔洗再帶電腦，都唔驚張 SD 卡影爆位，又可以即刻將靚相 set 做牆紙，甚至同朋友分享靚人靚景啦。
▲內置 SD 卡槽，可以將相片影到的相片備份去硬碟，當然都可以作為隨身 SD 讀卡器，接駁電腦並備份去電腦或者進行相片或影片後期製作啦。
▲WD My Passport Wireless 用無線功能真係去到幾盡，將 SD 卡插入卡槽後，可以硬碟唔駁電腦，單用手機專用 APP 已經可以遙控硬碟備份 SD 卡內的檔案，仲可以操控硬碟在匯入檔案後刪除 SD 卡內檔案，去旅行影相就唔驚影爆卡。
電池不太夠用……
既然講得是無線，WD My Passport Wireless 自然內建了充電池。據官方表示，最長可作連續 6 小時串流播放影片，待機時間更長達 20 小時！不過小編斷斷續續用了它一個下午（大約 3、4 小時左右啦），電量由 93% 跌至 57% 左右。如果以此計算，待機 20 小時似乎只是放著不用的計算時間，所以要用呢隻無線硬碟，要有一日一充、甚至兩充的心理準備……
Edward：無線備份感覺真好！但售價嘛……有點貴
WD My Passport Wireless 作為市面上少有的無線硬碟，用起來確實好好用，尤其是好似小編呢種成日要出去工作的人，又或者成日飛來飛去旅行或者出國公幹的朋友，呢款硬碟確係令大家帶少了線、電腦出街，令膊頭負擔大大減輕！不過輕鬆的代價，就係售價：1TB 已經索價 $1,599，而 2TB 硬達到 $1,999，相比同廠沒有無線功能，而亦是採用 2.5 吋硬碟的 My Passport Ultra，2TB 現在的售價都只是 $800 幾，有無線功能足足貴了 1 千蚊！是要平，還是方便，大家自行決定了。
售價：$1,599（1TB）；$1,999（2TB）
查詢：VST（2786 1836）
