HP Notebook 向來印象都賣得比較貴，但佢地最近係香港發表超平的 Stream 13，僅須 $2,010 就買到一台有 Windows、有 Office 的 13 吋 Notebook，而且仲少有地有粉紅及藍色外殼選擇，究竟佢係咪真係咁抵用？想知就小編 幫你試下喇！（以下有更多資料。）
顏色夠搶 重量適中
小編 好少主動寫 Notebook，但眼見 Stream 13 好似好抵就忍唔住要試下。首先，我個人幾欣賞 Stream 13 設計，雖然膠感好重又似玩具，但特別配色加上內籠設計反而令佢更搶眼，無論外人及用家角度都完全唔似平機。其次 Notebook 最重要是便攜性，而 Stream 13 拿起感覺好像比 MacBook Pro Retina 輕一點，雖則一部膠一部金屬冇得比，小編 只是純粹想表達外攜都唔算太重。
▲ HP Stream 13 實屬平價 Notebook，但獨特顏色（另有藍色）反而更搶眼，感覺甚至帶點 VAIO 那像玩味風格。
▲ HP Stream 拿起感覺唔算重，而且因便宜關係，相信唔會有用家會加保護殼加重負擔。
似 Tablet 配置 奈何跟 MicroSD 讀卡器
Stream 13 雖然係 Notebook，但機內配置其實同一般 Notebook 有少少出入，當中差異係機內僅設 32GB SSD 儲存空間，計埋 Windows 及 Office 2013 實際新機買返來只剩 9GB 空間，而且還搭載 Celeron N2840 雙核處理器及 2GB RAM，除了不是 Atom 處理器其他都跟 Tablet 很似。當然小編 都用慣 Tablet 這種配置對我冇大影響，操作都依舊一樣順暢，作為 Notebook 佢仲有 3 組 USB 及 HDMI 輸出，本應就無乜挑剔，但前幾天小編 諗住「過相」就發現有個問題，機上的讀卡器竟然是 MicroSD，講真 10 吋以下 Tablet 用 MicroSD 情有可願，但 13 吋又唔係冇位跟 MicroSD 好似唔太合理吧！
▲ 搭載 Celeron N2830 處理器及 2GB RAM，不同之處是處理器只有雙核心。其次，機內只備 32GB SSD 儲存空間，規格感覺跟 Tablet 很似。
▲ 機內預載 Office 365，方便處理文書工作。（小編 用的工程機預載了 Office 2013 ，所以才發生誤會 …orz）
▲ 有 3 組 USB 及 1 組 HDMI 輸出，擴充性已相當足夠，但唯獨跟 MicroSD 讀卡器唔夠方便。
淡色自動調光慢 霧面唔反光
老實說 Stream 13 各方面都唔差，但要數須改善的小編 就一定會投「屏幕」，當然我唔要求 $2,010 一部 Notebook 用 1080p 屏幕，但佢的 1,366 x 768 屏幕質素比較參差，畫面顏色偏暖同淡色，屏幕背光僅僅足夠，但「自動調光」反應慢又冇特關掉選項，有時打開部 Notebook 要等佢慢慢調光，加上可視角度普通，想幾個人圍埋睇片效果唔太理想。不過，佢都有優點就係表面屬霧面設計，即屏幕唔會有「照鏡」效果，在太陽下都唔會反光導致乜都睇唔到，用作文書的確很不錯。
▲ 屏幕本身比較淡色，而且自動調光反應比較慢。
▲ 霧面屏幕優點是陽光下仍能看到畫面。
▲ 小編 試過用唔充電用一日，電池最少都挨到約 6-7 小時左右，續航力都算唔差了。
小編 ：兩千銀有 Office 抵到爛
把 Stream 13 帶到北京用了幾日，純粹打稿執相感覺已經好夠用，雖然性能唔高、儲存空間唔太多，但相比用傳統硬碟 (HDD) 的入門 Notebook，用 Stream 13 起碼開機開程式都唔洗點等，更何況機內預載 Office 365，當文書機用真係諗住到輸的理由。
