林保全先生的聲音陪伴著很多香港小朋友長大， Edward 也是其中一位，他的離世實在令人感到可惜。不過作為生活科技網站 unwire 的編輯， Edward 想起林保全先生的，除了叮噹的卡通外就是這個《叮噹大富翁》的電腦遊戲了，所以立即拿回來重新安裝懷念一下，原來 Win 8.1都可以運行
Pentium 233 MMX
講番起叮噹，可以講得上係 80 後、90 後其中一套最鍾意的卡通片，而在 90 年代尾，仲記得 Edward 初買第一部電腦（Pentium 233 MMX 處理器年代），頭一批會買的電腦 game，就係呢隻 1998 年 Gameone 出產的《叮噹大富翁》。今日，為咗懷念林保全先生（game 入面係佢配音架！），於是又拿番出來玩咗陣……又懷念起少年的瘋狂打機時代。
唔知各位 unwire 讀者第一部電腦同第一款自己買的電腦遊戲係咩呢？信和抄 Game + 黑白印影 Menu + 紅色玻璃紙 Check 密碼的電腦遊戲年代，各位 unwire 讀者又有無經過呢?
原汁原味配音
當年因為「阿土仔」成功帶起電腦大富翁大熱（電腦 Mon 仲係 640 x 480 解像度年代……），而呢隻《叮噹大富翁》，就係 98 年時期的產物，除咗可以最多 4 個人玩（嘩，勁囉當年，3 個朋友迫埋係個 keyboard 度玩再加埋 Edward 用 mouse，真係好鬼懷念~~~），最正係配音同電視上面嘅《叮噹》完全無分別，原班人馬上陣，而且對白都好正，例如：叮噹買地個時會講「呢度唔會有老鼠掛」，正！今天 edward 突別懷念大雄同叮噹兩把聲…
遊戲入面嘅配音完全同電視版《叮噹》無分別呢！
重拾少年「簡單」樂趣
其實近年唔少 PC game 都係好「官能刺激」地側重畫面及聲效，Edward 覺得咁係唔夠，遊戲內容及可玩性都不能忽略，令好多 game 玩落去變咗「空洞派」。反而事隔多年，拿番起呢隻《叮噹大富翁》，雖然畫面十分粗糙（都好正常啦，成近廿年之前嘅 game 來啦！！！），但玩落真係幾有味道。如果各位打機有一定年資嘅 unwire 讀者仲有呢隻 game，拿番出來裝番，懷念下林保全先生把聲，都係幾唔錯的選擇。（不過各位 unwire 讀者們要記住，玩呢隻 game 時一定要 right click 遊戲個執行檔，然後揀「疑難排解相容性」並選擇「Windows XP」，否則玩玩下會 crash 的……）
道具盡情懷念叮噹「百寶袋」
玩法基本上同其他咩《富國天下》系列（即係三國版大富翁）、或者台灣出嘅大富翁系列無分別，都係移動、買地收租、玩小遊戲、用道具等等，而《叮噹大富翁》的精萃，除咗係配音之外，當然唔少得叮噹百寶袋入面嘅道具啦，基本上都好齊，唯一 Edward 覺得美中不足嘅，係用道具個時無咗卡通片入面「叮叮叮叮（咩音大家自己配啦）」的音效，如果有埋就 perfect 池了！
叮噹的道具好齊全哩！
用道具個時畫面會暗咗，然後就有動畫展示動具功用（好似 Edward 呢次用「一分為二刀」，就可以將角色 copy 多個，一次可以買哂前後兩塊地皮，都咪話唔爽！當然，如果之前個格有不幸事件，都一樣會中招 sosad……）。
一 mouse 走天涯
相比而家好多 PC game 都要鍵盤滑鼠並用，當年呢隻《叮噹大富翁》，單機版個時，你想齋用 keyboard 玩可以，想齋用 mouse 玩亦得，基本上都係上下左右加埋兩個制，操作超 easy，所以記得拜年個時，部電腦就係因為呢隻 game 而俾表弟、妹或者其他親戚「佔領」，搞到 Edward 想打 C&C 都唔得，唉……
基本上當年玩《叮噹大富翁》，用一隻 mouse 已經可以走天涯了。
（後記：來緊農曆年會係戲院上個套《STAND BY ME: 多拉 A 夢 3D》應該會係林保全先生最後為叮噹配音嘅「遺作」，唔知各位 unwire 讀者會唔會同 Edward 一樣，入戲院支持一下，憑弔呢位應該係香港配音史上最成功的天才的聲線呢？）
