成個秋、冬天，都忙到無停手，真係行山嘅機會都無乜，所以呢個「戀上山」專欄一直都未有新文，實在抱歉。最近借到 HTC 的「水喉管」相機 Re，又難得周末可以「偷得浮生半日閒」，於是就拿住佢行個山影下吊鐘花，順便測試一下 HTC Re 的效果。
設定超容易圖文並茂
之前 Edward 用過另一部 3 千幾蚊嘅 Action Cam，無疑質素係好好多，仲要可以拍 4K，又好多潮人用，不過接駁手機的設定就有啲煩，仲要間唔時斷線。HTC Re 就相對輕鬆得多，唔止圖文並茂有哂指示，仲要好多嘢都自動幫你駁，基本上你只要揀番啱嘅 cam 就得了，成個設定過程都唔洗 5 分鐘，Easy！
▲圖文並茂設定好簡單。就算入到手機取景介面，即使無文字解釋，都好易理解唔同制代表咩功能。
可儲手機 / 雲端唔洗驚無位
而家唔少 Action Cam 都係用 microSD 記憶卡，HTC Re 都唔例外，所以大家可以唔駁手機都可以影到相拍到片。當駁埋手機後，仲可以揀將相 / 片直接 stream 去手機度瀏覽，仲可以即時下載去手機度儲存（可以選擇下載後刪除 Re 記憶卡內的相片），又或者影完之後連接 Wi-Fi 前，直接將相或片上載去 Dropbox、Google Drive 等雲端儲存 save，咁樣就唔洗買咁大容量嘅卡俾 Re 都得，又或者以前細容量啲嘅卡都可以「重見天日」用得番。另外，大家仲可以即刻係手機透過 Facebook、Instagram share 出去，真係方便過番到屋企先慢慢抄落電腦再 share。
▲Re 本身都有個 microSD 記憶卡槽，可以插卡唔駁手機直接影相 / 片直接 save。
▲使用 Re APP 都可以即時 streaming 睇到 Re 內 microSD 卡的相或片。
▲如果驚卡唔夠位，可以揀相並按上方箭咀鍵，就可以將相片下載去手機。
▲大家亦可以選擇備份相片去 Dropbox 或者 Google Drive。
▲當然同手機駁住嘅好處係可以即影即 share 去各種社交平台啦。
鏡頭夠 wide‧自拍群拍都無問題
去行山，遇上美景自然想即刻自拍落來，HTC Re 嘅鏡頭有成 146 度 wide，基本上要自拍定係群拍，都可以靚人靚景影哂。另外，Re 駁咗手機之後，仲可以係手機控制鏡頭快門，亦因為本身 Re 無熒幕，所以可以用手機取景，咁就唔驚群拍個時影唔哂所有人，亦唔驚取景唔夠靚啦。
▲HTC Re 相片最高可拍攝 1,600 萬，仲高解像度過 HTC One M8！
▲拍片解像度最高就支援 1080p 30p。
▲如果要影群拍，記住開超廣角功能，咁樣會影得 Wide 好多。
▲不過要記住，如果要影最 Wide，千祈唔好 set 做 1,600 萬像素，因為相片比例係 4：3，會唔夠 wide 的。
▲set 做 1,200 萬像素加上超廣角功能就 perfect 池啦。
仲有一點，教大家一個秘訣，就係如果要影嘅人好多，又想影大範圍啲個景，可以用袋仔或者雜物固定住隻 Re，如果有腳架仔放上去就更好（Re 底部有螺絲窿可以扣在腳架上），然後再用手機取景，要影幾大範圍嘅景，又或者幾多人，都無問題。
▲如果想固定 Re 去影群拍，可以將 Re 鎖緊在腳架上。
近拍較難遠拍無問題
Re 在操控上，取景自然可以用手機熒幕預覽。不過當大家「鏟林」或者行絲帶路，要手腳並用爬山個時，就算將 Re 夾係背囊孭帶或者掛係心口，都好難又拿住部手機取景掛。所以當此情況下，只需要禁 Re 機身最大個粒制，短禁一下就可以影相，長禁兩秒度就可以開始拍片，再短禁一下就可以停止。咁嘅設計，大家就算爬緊山都可以照影相拍片無問題。
▲短按一下可拍照，長按兩秒左右就是拍片，完成拍片後短按一下就可停止。
▲咁鏡頭下方嘅制用來做乜？佢係慢動作模式啟動鍵，只要長按它兩秒左右，聽到聲音後再長按拍照鍵兩秒，就可以拍攝慢動作影片。
▲HTC Re 操控效果，大家可以聽到快門速度都算幾快，係咁禁都無問題。
▲一路行山一路 keep 住拍 1080p 30p 影片，個效果都算唔錯，都算清晰，而且行路個時個防震都算 OK，唔會事後睇番頭暈暈。
不過 Edward 試過，呢類 Action Cam，如果要遠拍，例如：影景、大範圍等就無問題，但如果近拍，就比較困難，會出現對唔到焦嘅情況。如果真係要近拍，建議都係用手機實時取景，睇到對到焦先禁制會比較好。
▲Re 用來遠拍係無問題的，質素都算拍得住高質手機鏡頭影出來的效果。
▲但近拍就唔掂啦，如果真係想影近嘢，建議都係用番相機或者手機影啦……
試相區
以下就送上當日影嘅吊鍾花同埋紫羅蘭山嘅風景俾大家欣賞下啦！影得唔好勿插呀，小編唔係專業攝影師來的 🙁
