今個星期幾乎日日落雨，唔想整濕部手機，最好方法當然係買部防水手機，之前 Sony 發佈 Xperia Z4 Tablet 同時還有一部中價的 Xperia M4 Aqua Dual，售價約 $2,700，唔知這部機表現係點呢？以下有更多資料：
設計似 Z3、防水！有紅色！
Xperia M4 Aqua Dual （下稱：M4 Aqua）同 Z4 Tablet 一樣係 MWC 試玩過，佢設計跟 Xperia Z3 很相似，兩機主要分別其實只係金屬邊換成膠邊，遠睇其實幾難察覺（尤其黑色）。手感方面，拿起 M4 Aqua 感覺會膠一點，但好處係比 Xperia Z3 輕，單手操作固然冇問題，而且佢比 Xperia Z3 優勝係 Micro USB 毋須遮蓋都有防水，這樣就避免「大頭蝦」忘記關蓋而入水。不過，小編 認為 M4 Aqua 最吸引係有「珊瑚紅色」選擇！
▲ 手感跟 Xperia Z3 有點似，但質感會膠一點，而且感覺更輕。
▲ M4 Aqua 最特別係除了黑白色，還有最搶眼的「珊瑚紅」。
▲ 改良後的防水設計，Micro USB 在冇蓋情況下都可浸水。
▲ 設計跟 Xperia Z3 很似，機面好像都有前置喇叭，但睇點真正喇叭設於機底。
中價配置 有中港 4G 雙卡
M4 Aqua 僅售 $2,698 大家都唔會期望配置跟 Xperia Z3 相同吧！雖然機內僅設 Qualcomm Snapdragon 615 八核處理器、2GB RAM 及 16GB 儲存空間，但於 Antutu 都錄得大約 33,000 分，而且有得插 MicroSD 又支援 Dual SIM 及中港 4G，「防水機」來說唔差了。不過，此機考慮最大阻力係 5 吋屏幕 720p 解像度，畫面肯定冇 1080p 咁細緻，但亦不至於「粒粒芒」，屏幕色溫偏暖微微黃，亮度足夠，感覺還好，況且 Sony 還有「白平衡」絕招，想要咩色自己校就得。
▲ 搭載 Snapdragon 615 處理器及 2GB RAM，於 Antutu 錄得 33,000 分左右。
▲ 2GB RAM 開時時大約有 1.1 GB Free RAM 左右。
▲ 重設手機後，16GB 儲存空間實際可用大約有 10.9GB 可用。
▲ Dual 顧名思義支持雙卡 ，兩個卡槽都屬 Nano SIM，主卡可對應中港 4G 制式 （FDD Band 40），而副卡就僅支持 2G。
▲ 內建電池只有 2,400mAh，容量唔算好大，但配合 Stamina 省電模式，閒置時電力消耗極低。
▲ M4 Aqua 屏幕色溫同 S6 Edge (左) 比較下稍為偏暖黃。
▲ 雖然 720p 解像度未見「起粒」情況，但白色畫面下會隱匿見到「X」紋。
自拍 Wide 夠實用 ！
最後 M4 Aqua 配備 1,300 萬像素 F2.0 光圈主鏡頭及 500 萬像素 22mm 廣角前鏡頭，數字上拍得住貴價機，而且拍攝選項亦跟 Xperia Z3 一樣多，唯一限制係 ISO 最高只有 ISO-3200。至於拍攝，我覺得相機反應有點「納」，對焦、拍攝、儲相差唔多成 2 秒，而相片質素就普通，放大都睇到細節但唔算好 Sharp。小編 就比較喜歡前鏡頭，除了 22mm 廣角兼 500 萬像素 （唔知點解比 Sell 自拍的 Xperia C4 更 Wide) ，更重要相片較 Sharp，即使雜訊較明顯，但「純網上分享」用途都足夠「有凸」了。
▲ 配備 1,300 萬像素主鏡頭，但預設就只會用 16:9 比例的 900 萬像素。
▲ 拍攝介面好多功能都可在 Xperia Z3 找到，其中最大差別係 ISO 最高只有 ISO-32oo。
▲ 主鏡頭擁有 1,300 萬像素及 F2.0 大光圈，相片放大都有細節，但唔算好 Sharp。
▲ 前鏡頭 22mm 廣角，無論 Selfie 或 Groupfie 都非常實用。
小編 ：都幾抵玩 但「防水」唔係人人啱
試玩完 M4 Aqua 小編 覺得呢部機不過不失，規格唔差 （起碼有 16GB ROM 同插卡），但始終「防水」係小眾玩意，若要貨比貨大家就會提出「點解唔買 小米 4i 或 Zenfone 2 等等…」。因此考慮得 M4 Aqua「防水」係首要，其次就係雙卡 + 中港 4G 制式。 （防水 + 4G 雙卡應該比較少有）
售價：$2,698
查詢：Sony（8203 8863）
