夏天鬼咁熱，未必個個都想同陽光玩遊戲。我依莉詩今日就去左銅鑼灣新開的室內 War Game 場試玩，貪佢有冷氣，又可以走動下。雖然一場只係短短十二分鐘，但都已經玩到身水身汗，夠晒刺激。
太空船主題，無限復活
呢間位於銅鑼灣的室內 War Game 場介叫 Lasermads，設計以太空船就主題，休息區以白色為主，簡潔鮮明，但一走到漆黑的 War Game 場，拎起鐳射槍，著上裝有感應器的夜光背心，就立即進入作戰狀況！現在還是開業初期， Lasermads 暫時只有兩個遊戲模式，分別係個人賽同隊際賽，最多可以 12個人玩。幸好係 12分鐘內會無限復活，就算被一射中，等 10幾秒就會翻生，就算好似小編咁弱雞，都唔怕一入場就死左無得玩。
▲ 入到去 War Game 場，最先會有一段好 Cyber 既短片簡介遊戲玩法。
▲ 接著就係穿上戰衣，拎起鐳射槍準備出發。
▲ 準備室有兩個入口可以進入戰場，一入去就好快 D 搵個地方做埋伏啦。記住啊！一定要雙手拎槍先開到槍架！
▲ 負責人 Alan 指下個月推出更多新的模式，例如：喪屍、搶旗等，萬聖節更打算將環境佈置得恐怖一D添！
三五知己隨時 Walk-in
同好多室內的玩樂場地唔同， Lasermads 係唔需要 Book ，亦唔洗一定要約好大班 friend 先上得去玩。就算只有 3-4個人，行行下銅鑼灣覺得悶都可以 walk-in上去，每個鐘的踏正、踏 4 同踏 8都有場，例如：12:00、12:20 同 12:40。同 D 唔熟既人玩，對戰起上來都爽 D 嘛！價錢方面每人每個遊戲 $118，會員就$98。除左 walk-in，亦都可以包場搞Party，平日 30個人 Book 夠 1個鐘都係 $3188，想點玩都得啦。
▲ 玩完仲有成績表可以睇番，邊個係神槍手，一眼就知道！
▲ 現在做會員係免費，玩多幾次就可以儲分，換支勁 D 既槍啦！
九十後集資，月租 9萬
Lasermads 全層 3300呎，真正玩 War Game 的地方都有 2700呎左右，係香港的室內場來說都算大，位置仲要咁近SOGO，租金都應該幾貴。玩完之後小編就多口問左負責人 Alan，原來呢度月租成 9萬幾，不過佢地希望多 D walk-in 客，所以寧願搵多幾個朋友一齊集資。講到集資，原來呢度 12個老闆都係 90後，無論設計、裝修同宣傳都一手包辦。回顧番自己，明明同佢地一樣年紀，唉…
依莉詩：「成個迷宮咁，走到有Ｄ暈」
起初覺得玩 12分鐘要 $118 好唔抵，但到真正落場先知原來跑足 12分鐘一 D 都唔簡單。漆黑的環境加上節奏明快的音樂，跑跑下真係唔知自己去左邊，好鬼刺激！有機會既，小編都想同各位讀者玩番場呢！
LASERMADS
地址：銅鑼灣東角怡和街 2-6號英光大廈 11樓 （SOGO正門對面）
開放時間：12nn-12am
查詢電話：2343 3033
