海洋公園夏水禮又黎啦，而且今年仲特登同 LINE 合作一齊舉辦首個 LINE 主題玩水派對，景點內容非常之豐富，而且男女老細都會搵得到岩自己玩既景點，唔洗擔心會無聊，有興趣既讀者就要留意以下小編為你地提供既小小行程功略啦！
三個必影景點
１. LINE FRIENDS 潛水艇
佢係 LINE 互動照相館既左手邊，好似無乜人會留意去影相，只係咁岩我影果刻先有一個小朋友行去影。我就覺得呢個幾 cute cute 啦，又可以同多三個朋友一齊影，影出黎都唔錯啊！
２. LINE FRIENDS 快拍
鍾意 LINE 既朋友一定唔可以錯過呢個，可以同熊大或者 Cony 玩「海底 selfie 」，你甚至可以同佢一齊跳舞，扮鬼扮馬，佢都會同你奉陪到底架，真係好鬼打耳！
３. LINE 互動照相館
呢個係三個之中最最最唔可以錯過既，皆因可以同親朋好友一齊係呢度拍返段片，而且當你同朋友比手劃腳既時候， LINE FRIENDS 就會入鏡同你鬥萌（啊，我輸了）。照相機當中會有五個主題可以比你揀返，然後好快就可以拍攝 5 至 10 秒既短片啦，記住留意住屏幕啊，因為入畫面其實都幾快。
當製作完成之後，佢就會比個密碼你，然後就可以係海洋公園既 LINE 官方帳號度輸入攞返，即時睇返之餘又方便分享比朋友。
小朋友景點 – 玩水童樂區
爹地媽咪帶埋仔女黎，唔洗怕佢地會無野玩，玩水童樂區就係專為小朋友而設的區域，範圍夠晒大，而且又可以玩泡泡又有得射水槍，佢地一定會玩到唔捨得走啊！不過要記住，玩水童樂區唔係夏水禮大本營入邊，而係威威天地裡邊，都要行幾遠下，呢個係比較可惜既。
LINE 主題夏日美食
影完相而小朋友又玩到攰既時候，最適合去食下野啦。當然，野食就緊係都同 LINE 有關啦！唔講咁多，去相：
LINE POP-UP STORE
咁既然係同 LINE 合作， POP-UP STORE 都走唔甩架啦。入邊既統統都只會係今次夏水禮出售，所以記住唔好心大心細啊！如果唔知想買乜，就不妨睇下我推薦既野岩唔岩你：
雖然平時我唔會買卡通衫，不過呢套 LINE 系列既衫實在太得意啦，而且非常之抵，成人 size 價錢為 $155 ，而童裝的為 $108 ，鍾意既話可以一家人買齊，跟住一齊著，幾溫馨啊！
如果同男朋友或者女朋友黎，不妨買呢個 CONY & BROWN 公仔套裝啊，售價為 $287 ，兩個人一人一隻， Sweet 下 Sweet 下，簡直羨殺旁人啊！
而學生哥就可以選擇買 LINE FRIENDS 既簿仔同筆，咁你之後返到學校咪可以同同學仔晒命囉！簿分三個 size ， S 碼為 $22 ， M 碼為 $26 ， L 碼為 $30 ，而原子筆就一律 $30 。
四個重要夏水禮景點
戲玉黎啦！想知今次夏水禮有咩好玩，就睇下以下講果四個：
１. 狂野泡泡派對
呢個其實同玩水童樂區果個好似架，不過就大左同埋頂部會有個噴泡泡機，噴落黎果下你都咪話唔爽。呢個岩晒一班朋友入黎玩泡泡戰，而家長就要注意身高 135cm 以下既小朋友就唔能夠進入啦。
２. 瘋狂滑水梯
呢個滑水梯雖然睇上去唔算太長太特別，原本以為會非常失望，但玩落先發覺幾夠離心力， sir 落去先發現真係好爽，絕對係玩上癮之選。
３. 超級大水桶
一個字：等。如果想感受下大水桶沖落黎果下，真係要等一等。不過係值得既，因為個種衝力同爽度唔係一般泳池可比，而且可以隨時見到佢就沖個下就行過去。
４. 動感水鞦韆
其實小編就唔係好鍾意呢個既，皆因個鞦韆坐位好窄啊！就好似你睇圖中既小朋友坐得好實好輕鬆，其實成人坐上去就會比較辛苦既，而且只係 fing 下 fing 下，頭頂有啲水淋落黎，一啲都唔爽仲覺得有啲煩啊！不過睇黎小朋友玩左好耐都好開心，家長可以帶佢地玩完玩水童樂區黎呢度哦！
玩後感：「一家人黎玩就岩晒！」
玩過晒之後，小編發現其實啲設施幾岩一家人黎玩，玩完又可以同 LINE FRIENDS 影下相，然後又可以去食好得意既 LINE FRIENDS 套裝，帶小朋友黎玩佢地一定唔會「炸形」先。不過對於 90 後既小編黎講，最精彩既莫過於狂野泡泡派對同瘋狂滑水梯，而其他就麻麻啦，可能男女朋友黎會比賽適合啦。
開放日期： 7 月 1 日 至 8 月 30 日
開放時間： 早上 10 時正至晚上 8 時正
入場費： 成人 345 元 / 小童（3 至 11 歲） 173 元
