如果有用過 Sony RX100 系列，都知道佢係市場上暫時少有既輕巧又有大 sensor 又可以放得落褲袋的高質便攜式相機，今日 Sony 就舉行了記者會，正式宣佈在香港推出它的第四代。作為 RX100 II 用家的小編，自然即時撲到現場睇睇係咪值得升級。雖然試玩時間有限，但 Edward 仍然有少許感受想同大家分享一下。
與三代外形幾乎一樣！
其實就算搵埋 RX100 III 拍埋一齊，都唔係太覺 III 代同 IV 代的分別，因為兩部機的設計可以話係幾～乎～一～樣！無論係鏡頭配備（同樣都係 24-70mm；F/1.8 – 2.8；2.9x 光學變焦）、機身設計（同樣飛走 hot shoe 位[編按：OMFG！！！！]、加入 Viewfinder、內置閃燈及相同機身物料）、熒幕扭動角度（同樣可以反轉玩自拍）等，都唔太覺兩部機有好大分別（小編覺得叫乜鬼做 IV，應該叫 IIIs 會比較合理啲囉），所以如果你係三代用家，又好想話俾人知你換咗機，IV 代未必係你杯茶；不過如果你係搵緊一部又輕巧又可以放落褲袋的 pocket-sized 相機，RX100 IV 的手感同埋輕巧程度應該可以滿足到大家。
▲4 代同堂（左至右：RX100 IV、RX100 III、RX100 II 及 RX100），可見 4 代機大細分別不大。
▲厚度上，除了最右的 RX100 比較薄之外，其餘左至右 3 部（RX100 IV、RX100 III 及 RX100 II）都係差唔多，加上機身設計無大變，所以手感都係相近。
▲同 RX100 III 一樣，IV 代（左）一樣不設 hot shoe 位，設計上與小編的 RX100 II（右）有別。
▲另外 RX100 IV（左）與 III 代一樣，熒幕可以 180 度反起，女士們要玩自拍就可以睇住來影。
全新 sensor 乜都快快快
既然外形無分別，咁 Sony 出部 RX100 IV 來做乜先？其實 IV 代的改變，全部均是在「骨子裡」，初睇係唔覺的，但用落就會感覺到，因為對焦、save 相都比上代快咗（雖然未至於十分明顯），因為 RX100 IV 採用了全新的一吋層疊式 Exmor RS 影像感應器，加上結合 DRAM 記憶晶片在 sensor 內。根據官方表示這種設計可產生超過 5 倍的影像數據讀取率，而且令 RX100 IV 機仔細細，都具備專業級攝錄機才擁有的功能，包括：1000fps 高 frame rate 40 倍 Slo-Mo 短片攝錄（後文詳述）、最高達 1/32000 秒高速防變形快門及支援 4K 拍片等功能，而且連拍速度亦加至 16fps（上代為 10fps），而且就算在 EV19 光亮度時，仍可以用大光圈影到淺景深兼主體清晰的相片。不過現場試機時間有限，這些就唯有留待小編日後借到機後再同大家一一實試。
▲RX100 IV 採用全新的 sensor 架構，令影像處理比上代更快。
▲新機就算係 EV19 亮度的環境下，都可以影到主體清晰的淺景深相片（右下角為對比以往採用舊 sensor 機款開盡光圈時的效果）。
Viewfinder 像素大提升
最明顯的相信就係 viewfinder，像素由 III 代的 144 萬提升至 IV 代的約 236 萬，可以俾大家睇到更細緻的影像。不過由於小編沒有 III 代係手，唯有稍後借到機後再同大家分享一下新 viewfinder 的使用感受。
▲RX100 IV 與 III 代一樣，內建 viewfinder，不過今代像素更提升至 236 萬左右，比上代的 144 萬改進不少。
終於有 4K 拍片！不過……
其實小編一直都唔太明，點解唔少相機、就連手機都已經支援 4K 拍片，但係 RX100 III 舊年出個時都仲未有。不過遲到好過無到，今代 RX100 IV 終於支援 4K 拍片了，而且更是採用最新的 XAVC S 4K 格式（感謝新 sensor 的恩賜）。不過問題來了：雖然 XAVC S 格式理論上質素係比 AVCHD 好，而且亦係為 4K 或者 FullHD 高 frame rate 影片而生，不過如果要用到呢個格式的 4K 拍片又要拍得好，大家要自費買番張 Class 10+ SDXC 記憶卡，最少都要俾多 2 舊水左右，質量較好或容量較大（例如：128GB 或以上）的卡甚至要索價數百甚至過千元，已不是「平民 4K」的級數了。而且由於採用沒有壓縮的新格式，所以 4K 拍片只限 5 分鐘！所以 RX100 IV 有 4K 拍片，但最終有幾多用家會用？Edward 對此有一定保留。
▲等咗咁耐，RX100 IV 終於加入 4K 拍片！不過……
▲係採用無壓縮的格式 XAVC S，無疑質素應該係會好好，但大家就要自費買番張 SDXC 卡先可以拍了，而且只可以拍 5 分鐘……（RX10 II 好啲可以拍 29 分鐘……）
HFR 慢速拍片幾過癮
另外，RX100 IV 亦新加入了 HFR（High Frame Rate）慢速拍片功能（再次感謝新 sensor 的恩賜），容許大家拍攝 2 秒或 4 秒的影片，然後經過慢鏡 Slo-Mo 處理，將它最終拉長至最盡達 40x 時間的慢鏡影片（即係 2 秒影片拉慢到成分零鐘！）。這項功能，對於大家拍攝快速移動的物件（例如：昆蟲、跑車、魔術師玩啤牌等）、運動拍攝（例如：極限運動、足球等）都好有用。不過又係個句：呢項功能如果唔用 SDXC 卡，係做唔到高 frame rate 同埋唔夠流暢，所以想玩？買卡啦！
▲機頂右方的旋轉盤設有 HFR 模式，扭到該處就可以進入。
▲最高可支援 60p 50M 及 960fps（NTSC）/ 1,000fps（PAL）幅率。
▲各設定的對比表。
▲設有兩種模式：影像品質優先及拍攝時間優先，前者質素會較佳，但拍攝時間較短，只有 2s；而後者質素理論上無前者好，但可以拍攝較長時間，但也只得 4s。
▲另外用家可以設定 movie 鍵的功能是開始拍攝還是結束。小編會建議設定為終了，因為使用此模式，要先按機背的決定鍵進入預備程序，但相機在按下決定鍵的一刻，其實已經將鏡頭影像攝入暫存記憶體內，如果錄影鍵設定為「終了」，就可以用之前緩存的影片進行處理，錯過拍片一瞬間的機會就會大大降低。
相質還算不錯！可用 ISO 停留於 400……
最後就讓小編輕談相質吧，始終測試時間有限，而且只限室內試相，最終質素如何小編會在借到機後再詳試。暫時來講，整體而言都算唔錯，不但好輕易影到淺景深效果，而且在高反差環境下，無論光位定係暗位都算保留到細節，呢點係值得一讚。不過感光度方面，可用的最高仍然只停留在 400，小編試過 ISO 800 或以上的設定，基本上都係有明顯雜訊，而且有明顯油畫化的現象。以下試相按圖可看原圖：
（F/2.8、1/50）
（F/1.8、1/8、ISO 400）
（F/4、1/500）
▲ISO 800
▲ISO 800（100% crop）
▲ISO 1600
▲ISO 1600（100% crop）
▲ISO 3200
▲ISO 3200（100% crop）
▲ISO 6400
▲ISO 6400（100% crop）
▲ISO 12800
▲ISO 12800（100% crop）
Edward：「Pocket-sized 高質相機不貳之選，但係……又加價？！」
誠然，試玩過 Sony RX100 IV 一陣之後，對佢真係好滿意，尤其是對焦速度以及暗位拍攝的表現，更是十分優秀。加上它的大細與小編手上的 RX100 II 幾乎相同，重量亦分別不大（II vs III vs IV = 281g vs 290g vs 298g），如果大家想買番部有內置 viewfinder 又影相靚又可以放得落褲袋的機仔，RX100 IV 真係不貳之選。不過睇番上三代的價格「走勢」，RX100 II、III 及 IV 初推出時，分別為 $5,890 vs $6,290 vs $7,290，真係一代比一代貴！雖然 III 及 IV 有內建 viewfinder 確實令成本上升，比 II 貴亦無可厚非，但 IV 比 III 只係換了粒 sensor、提升了 viewfinder 像素，以及加入 4K 及 Slo-Mo 拍片，就加價成千蚊？！究竟值唔值，就真係要借到部機係手先試到了。
不過作為 RX100 II 用家的小編，仍然鍾情於 II 代設有 hot shoe 的設計，因為我鍾意個種「彈性」：唔夠光個時，可以插外閃，無論私人影相定係做嘢當隨身開工機，都無問題；如果係陽光下或太光的地方影相，想睇清楚畫面顯示，又可以外插個 viewfinder 來用；拍片想收音好啲又可以插番支機頂收音咪！呢種彈性，係 RX100 III 代或 IV 代俾唔到小編的。唔知有冇 II 代用家，有同小編一樣的感受呢？
售價：$7,290
查詢：Sony（2345 2966）
同場加映：長炮恆定光圈 Sony RX10 II
除了 RX100 IV 外，同場 Sony 亦展出了另一部 RX 系列：設有 24-200mm 焦距及 F/2.8 恆定光圈的 Sony RX10 II，可說是「天涯鏡」，去旅行一流，只係同上一代一樣擁有同一缺點：機身繼續係幾重。相比上代，RX10 II 又係個樣無乜點變（或者應該講係無變），與 RX10 一代的分別，都係同 RX100 IV vs III 一樣，所以小編在此就不多述了，大家可以留意番上文介紹。
▲機身同上代 RX10 一樣，都係有啲「份量」。
▲配備 24-200mm F/1.8 天涯大光圈蔡司認證鏡頭。
▲機身按鍵及佈局驟眼睇基本上同 RX10 無分別。
▲由於與 RX100 IV 一樣採用了新 sensor，所以 RX10 II 亦順理成章支援 4K 攝錄，格式同樣為 XAVC S。
售價：$9,990
查詢：Sony（2345 2966）
