最近一星期，我做緊一個小小的自我挑戰，就係搭車等車唔用唔睇電話。一日加加埋埋都有兩三個鐘花係交通上，係呢啲雙手冇野好做又心癢癢的時間，唔俾自己用電話，難唔難呢？其實我又覺得 ok 喎，可能因為我本身唔係咁上癮啦，但係唔用手機之後，我睇多左好多野。
Source：Pearl Law
按了 Pause 的地鐵世界
我係地鐵的常客，返工去街都係搭地鐵為主，所以佢加價我都要焗住俾，搭車唔用電話的呢段時間，令我發現每條線的乘客都有少少唔同，例如，搭觀塘線的人年紀較大，火車東鐵線的人會燥底啲，東涌線的人著得斯文啲等等，我諗係地區性原因吧！
但佢地都有一個共通點，就係一上到地鐵就將最完美的定格。你一定心諗，搭緊車唔通仲走黎走去咩？我唔係講呢樣，我係想話佢地全部人，（戴頭盔）大部分啦，都望到個電話實一實，郁都唔郁下：埋站唔行入啲俾位人上，又唔讓路俾人落，唔讓位呢啲都費事講啦，因為佢地根本睇唔到有需要的人，淨係望實部電話，sosad。
不用電話看的真實世界
因為兩手揈揈，冇咩好做，咪行快啲，呢個時候你就會覺得啲手機喪屍真係好阻路，因為佢地唔睇路，所以行得好慢，有時仲行唔到直線，兜黎兜去，唔怪得有地方索性將條路劏開兩半：用電話 vs 唔用電話。
行得快左，平時轉線要行 5 分鐘的腳程變左 3 分鐘，慳左時間又可以增加運動量，肥都減埋；有時行過地鐵站啲店舖，仲會入去睇下睇下買埋，真係經濟都促進埋… 不過，地鐵站入面最多的始終係人，唔睇手機，隻眼除左用黎睇路仲會睇到好多背脊，有時仲會見到「背多分」的靚仔靚女（注意：係背多分啫 XD）。
玩 APP 但不玩電話
其實點解我會玩個咁嘅挑戰呢，係因為我覺得一日返工放工都對住部電腦，對眼同個腦已經好攰，想俾個機會自己係令人窒息+疲勞轟炸的資訊爆炸世界唞一唞，多啲望下熒光幕以外的真實世界。
除此之外，我硬係覺得睇得網上資訊多，耐性同記性好似差左，唔知你地會唔會都係咁呢？所以我近排仲裝左隻 APP，以遊戲方式保持唔用手機，專心做其他野。
▲見到有人介紹，咪試下，Android 係免費的，iOS 就要 ＄8。
▲玩法好簡單，就係開左個 APP，揀一棵樹，較時間，如果係限時內你冇用過其他 APP，就會成功種到一棵，如是者，你就可以種出一座森林～
個 APP 幾得意的，當遊戲玩下係 ok 的，但如果你真係要決心戒甩舖癮，唔做手機喪屍，我其實建議你用返 3310 XD，其實真係要用意志，呢個年代有咩可能咁脫節 Smartphone 丫，所有野都有好有壞架啦，適當地使用不就好了嗎～～
