早係五月尾已經出左試播集既 Mr. Robot ，係六月尾正式開播。不過係首播之前，就已經有消息佢已經被獲第二季續訂。可惜逢週三播放既 Mr. Robot 至今已經出左三集，收視仍然平平，頭兩集只有 1.75 同 1.73 ，但係咁係唔係代表佢唔好睇而續訂又係錯誤決定呢？小編覺得：咁又未必！
社會不公 就用科技來發起革命
故事講述一個住係紐約既年輕既網絡安全工程師 Elliot ，不但有社交焦慮症，而且仲係反社會人格同有嚴重毒癮。日頭係 Allsafe 公司返工，雖然佢既表現好好，但佢內心非常憎呢份工作；夜晚就係一個「私刑判官」，黑客天才既佢，會透過入侵人地既電腦，窺探人地既私隱，並保護佢受重視既人免受壞人傷害。當佢發現 Allsafe 同 E Corp ，一間勢力遍及全球網絡既大集團，一間被 Elliot 視為「邪惡怪獸」既公司，佢更討厭自己既工作。係一次機緣巧合中，佢結識左 Mr Robot 以及 fsociety 組織，組織入面都係天才黑客，目的就係要拖垮有錢人掌控世界的黑暗局面。而 Elliot 對組識非常好奇，不過一開始對佢地既偏激行為唔認同；其後就聯同做低 Elliot 被邀請過去擔任保護工作既 E Corp 。除此之外， fsociety 亦會逐個跨國企業 CEO 打沉。
音效唔錯 獨白部分更係引人入勝
其實音效的確唔錯，係驚悚同一般休閒劇情中轉換得幾恰當，小編覺得的確係投入到成個氛圍既關鍵；但除左音效配樂之外，其實男主角既獨白先至係成套劇既靈魂。正正因為社交焦慮症同反社會人格既人物設定，為男主角帶黎好多獨白既機會。有啲獨白單單係詮釋當時角色既心情，更好地呈現佢既過份焦慮同多疑；而有啲獨白則係一啲哲理性既話語，睇左三集每集都至少會有一個咁既部分，其實目的都係想帶返觀眾入去劇情，亦都令比較爆炸同偏激既情節，顯得理性而非一場網絡恐怖襲擊。
男主選角無可挑剔 外形頹廢演技精湛
男主角戲份相當重（雖然套戲叫 Mr Robot 而唔係 Elliot），而且性格要求多，的確選角選得差，劇情點好都救唔返。今次擔大旗既 Rami Malek ，對觀眾黎講都幾陌生，不過佢既面孔有種講唔出既頹廢感，加上佢對角色詮釋既拿挰亦恰到好處，憂鬱﹑內向﹑多疑，完全表露無遺。更加抵讚就係佢把聲幾夠磁性，表面講野口窒窒既佢，內裡想法多多，眼神肢體以至到把聲都交足戲，如果換第二個或者就無咁好效果。
三集觀後感
整體黎講，小編我都幾鐘意呢套戲，無論係劇情定演員或是音效配樂上，尤其係佢獨白部分。每一段都係一個人類小總結反思咁，而小編最深刻印象既仍然係第一集 Elliot 見心理醫生 Krista 個段，當被問到對社會那一方面失望，佢話祟拜造假既英雄﹑ 將毫無意義既生活細節當作深思﹑ 我地睇小說令自己抽離扮唔痛苦，成個世界就好似一種惡作劇。而除左獨白外，有啲對話都好僅得深思，就好似第二集 Mr Robot 同 Elliot 講，人生的確就好似二進制咁，只有是與非，做同唔做，無論背後有幾多既灰色地帶。成套劇好多值得深思既位，但又唔會太囉嗦擁聚。如果真係要挑剔既話，就會係剪接個部分，大部分情況都唔錯，不過有啲鏡頭剪得太突兀，拍攝攞既角度轉換左反而比較差，成個緊張氣氛變得好似清談節目咁。
