有留意美劇既讀者都會發現近排好多新劇上映，不過以喜劇為首既美劇，新劇又真係無乜係喜劇啵。不過剛係月中上映既《冒牌牧師》，小編覺得雖然未可以做到 2 broke girls (好掛住 Max 同 Caroline添)由頭笑落尾咁經典，不過都相當唔錯，笑點高既小編起碼唔會覺得佢悶先！
「直」廢青一夜間變「孿」牧師
故事講述 Buddy Dobbs ，一個大賭徒兼道友，原本借「大耳窿」借到被人追斬，最後決定跳橋自殺。不過係佢準備跳個刻，一個 Gay 牧師停車走去勸導佢唔好跳，正當牧師跨過欄希望同 Buddy 可以認真溝通，唔小心錯腳跌落河死左。於是， Buddy 決定偷左佢身份去小鎮生活。
低俗無厘頭？「Who Fxxking Care!」
講到喜劇，情節就唔需要太多支線，亦都唔一定要合理，清晰簡單既一條故事線就夠啦。小編覺得今次《冒牌牧師》就做得到呢啲一向係經典美式喜劇既元素。睇呢啲最好就係唔太洗理劇情發展，只需要準備好笑就得： Buddy 扮牧師求其搵篇經文比人，唔識解就話「我唔可以講咁多架，我既兒子」；當一個媽媽去問 Buddy 求救，因為個仔竟然「中出」哈蜜瓜， Buddy 既即時反應係「真係爽架？」；當兩個警員去通知 Buddy 女友佢既「死訊」， 女友問到會唔會見得返，其中一個冷靜咁講「九成九死左，而且沉落海多數會毀容爛身，見唔到好過見到」。
雞蛋裡挑骨頭：笑位夠 節奏拿挰一般
其實呢套劇真係好唔錯，小編有某啲位都 loop 左幾次；但如果一定要雞蛋裡挑骨頭既話，我會認為節奏可以拿挰得更好。因為太多笑位都放埋係同一時間，而某啲位就真係幾無聊，就好似 Buddy 被「大耳窿」捉走獨白個段，雖然就唔係好長，不過都足夠令小編想噤 fast forward 。
《冒牌牧師》係 7 月 15 日首播，至今已播了幾集，暫未有第一季集數同續訂消息。
