不知道大家還記不記得「伙頭智多星」有一集機械人炒蛋被廚師反? 唔知今日介紹呢部沖咖啡機械人 Cafe X 對職業咖啡師來說有甚麼感受呢? 等我籮文扮下「陳豪」幫大家試下係咪 prefect「池」啦! 最重要係唔使錢呀!
1 分鐘即沖好 打爛人類飯碗
Cafe X 由兩位 90 後香港年輕人 Henry Hu 同 Jack Sun 研發，佢地係美國麻省 Babson College 嘅同學，兩個都好鍾意飲咖啡，讀書嗰時喺學校間 Cafe 買咖啡次次都要排晒大隊先買到，買返黎又唔好飲，而 Henry 本身對科技產品好有興趣（Henry 更表示係我哋讀者添！），所以佢兩個就忽發其想去研發 Cafe X，決意讓人類唔使再為杯咖啡等咁耐，籍此提高人類嘅生產力。當我問到 Jack 怕唔怕俾人話 Cafe X 代替咗咖啡師嘅位置，打爛人哋飯碗搞到人哋冇工開，佢就話希望用依個科技代替一啲繁複嘅工序，讓人類可以處於一個更有價值嘅位置。
▲當我籮文嘆緊啡時，Cafe X 聯合創辦人 Jack Sun 出黎傾兩咀，原來佢都係 unwire 的讀者黎!
預早 App 落 Order 幫你保暖，到時即取
只要喺 Android 或 iOS 裝置上 Download 咗 Cafe X 嗰 APP，選定你領取咖啡嘅 Cafe X 位置（暫時只有科學園一間），按 New Order。跟住選擇你想要嘅咖啡，例如 Latte，之後可以加入個人化嘅特別要求，例如轉用脫脂奶、加蜜糖等。然後就係選擇你嘅領取時間，比如你可以喺搭車返工途中就落 Order ，10 分鐘後差唔多到達公司樓下 Cafe X 先開始製作你杯咖啡。Order 嘅最後一步就係選擇你嘅付款嘅信用卡，付款成功後 Cafe X App 就會產生一個 PIN 碼。去到 Cafe X ，只要喺 delivery bay 輸入 PIN 碼就可以領取你杯咖啡啦！咁樣一黎到就飲得，又唔怕攤到杯咖啡涷晒！
▲選定你領取咖啡嘅 Cafe X 位置，按 New Order。按 Order History 更可查閱之前買咖啡的紀錄。
▲選擇咖啡
▲可以加入個人化嘅特別要求，例如轉用脫脂奶、加蜜糖等
▲選擇你嘅領取時間
▲只要喺 delivery bay 輸入 PIN 碼就可以領取你杯咖啡啦！
▲一黎到就飲得，又唔怕攤到杯咖啡涷晒
後記：味道好過 Star 乜 (陳豪 mode)
籮文我飲過，味道可能同出面嘅 Cafe 相差唔遠，不過望住佢嘅機械運作去製作一杯咖啡，係一件好 Amazing 嘅事。機械臂代替人手沖咖啡，的確係快啲，亦可以節省人工嘅開支，不過始終有啲野係 Cafe X 代替唔到人手，就好似 Latte Art 咁，如果 Cafe X 加埋 Latte Art 嘅功能，杯咖啡應該更有生氣，更富感情。其實籮文對咖啡無太大興趣，反而鍾意飲酒多啲，所以我就問 Jack，會唔會諗下造一部 Bar X 或者 Pub X，唔係沖咖啡，而係調酒架呢？估唔到 Jack 話的確 Cafe X 團隊係打算將同樣技術發展到唔同地方，Pub X 真係有機會出現！最後，提提大家，位於科學園嘅 Cafe X Beta Test 試業期間係免費架！快啲去試下啦！
