以往幾屆電腦節都俾人係「散貨場」嘅感覺，加上主辨商安排愈來愈混亂、產品種類較單一、加上一年都幾次電腦節，導致前兩屆灣仔會展電腦節人流一年少過一年，商戶叫苦連天但「敢怒不敢言」。今年會展電腦節，上星期筆者就講過人流有回升跡象，但係咪「賺頭蝕尾」？今日 Edward 就走訪多間商戶，睇下佢哋對今年電腦節又點睇？
Centralfield：今年不玩「散貨」增購買慾
Centralfield 一向都係電腦節常客，而自從腦場亦同時間舉辦電腦節後，更是兩邊都有擺檔。他們的 Shop Manager 就表示，今年灣仔電腦節無論係人流定係銷售額，都比舊年好咗兩、三成，甚至比腦場電腦節嘅表現更佳：「可能今年各舖都唔係為散舊貨，而係推出新產品，但以特惠價發售，呢種新鮮感反而吸引到唔少人回流入場。
另外，灣仔電腦節唔止買嘢有優惠，亦有唔少節目同埋電競比賽睇，氣氛點都好過係腦場齋買嘢。」不過他亦表示，今年有更多公司請來更多模特兒表演或展示產品，雖然增加了駐足人流，但多數都係龍友，反而阻住旁邊商戶做生意，佢都覺得好無奈。
FlyCamHK：航拍機大熱生意額增 5 成
之前筆者都介紹過，今年航拍機真係成場都係，儼然成為熱潮。貴平價航拍機都有賣嘅 FlyCamHK 的經理 George 就表示，今年電腦節確實係人流同埋銷售額都好過舊年，前者增加了兩成左右，後者由於多咗人買幾千蚊一部嘅專業級別入門航拍機，所以更大增五成！絕對係旺丁又旺財！「其實舊年航拍都已經開始流行，呢一年更加有唔少電視節目、劇集採用航拍技術拍攝，更加催谷唔少人心思思想買番部自己玩。
相比『玩具』級別，其實『專業』級別嘅入門級航拍機款更多人入手，一來售價唔算太貴，加上我們有提供免息分期，拉勻其實比買一部相機仲平！好多人都係咁樣一諗，就決定入手了。」至於大陸禁售航拍機，會唔會多咗中國人落來香港買？George 就表示確有中國人專程來香港買，但佔嘅比例極少，大約 4 日入面只有 5% 係中國用家，絕大部分都係香港人。
Good Century：少咗中國遊客反而生意增！
至於另一周邊產品主要代理 Good Century，每年都有係灣仔會展電腦節擺檔，他們就覺得人流今年確比舊年多咗，尤其以星期六最誇張，係俾錢個位打咗幾個蛇餅，用咗一段時間先疏導到人潮。不過他們認為，今年係多咗香港人入場：「舊年都仲有唔少講普通話嘅中國遊客入來買嘢，今年應該佔七、八成顧客都係香港人，但生意額不跌反升，比舊年增長咗 15% 至 20%，預期結束後應該都有 20% 增長，銷售額肯定有 7 位數字，成績好滿意啦。」
至於產品方面，他們更覺得今年唔係為散貨，而係推新貨，尤其是 SanDisk 新推出的無線 USB 手指，由於係亞洲首賣，所以銷情最好；其次係 32GB USB 3.0 手指：「好多人覺得 8GB 手指已經唔夠用，但 16GB 同 32GB 售價又相差唔遠，於是索性買 32GB 算，令它成為另一件最佳銷情嘅產品。」
Lapcom：大會唔改「劈價」氣氛廠商自救！
至於專賣軟件嘅代理商 Lapcom，他們表示今年確係旺丁旺財，兩者都比舊年多了一至兩成，基本上未完電腦節都已經賣了過千隻軟件，而去年電腦節辛辛苦苦臨尾劈價先賣到嘅數量，今年去到星期日已經追到，證明真係唔洗劈價反而生意仲好咗：「今年主辦單位好多嘢都改善咗，例如：電競比賽確實有助增加人流，另外都減少了好多唔關事嘅攤位同埋活動，包括：選美、頒獎、好多女仔周圍行等等，又唔俾參展商大聲嗌咪同埋周圍巡，令入場市民可以多咗時間係 booth 度購物同埋聽講解。
另外，今年其實感覺都仲係好『劈價場』feel，但大會既然唔打算改，參展商之間都聰明咗，決定唔再玩劈價，令入場市民覺得早入唔會特別蝕底，遲入都唔會特別有 so，加上佢哋本身都對件產品有需求，所以最後都焗住買。今年嘅電腦展，證明呢個策略真係成功。」他們都希望未來主辦單位會推廣多啲新嘢，例如：加入 start-up 相關元素、舉辦類似機械人大賽個類活動，增加非銷售為主嘅新科技推廣節目，提升電腦節品位，令人唔會再覺得入來單純係為「搶平貨」。
Logitech：電競產品開始普及
今年電腦節新增了電競元素，作為今年主力銷售電競周邊產品的 Logitech，他們都表示愈來愈多人對電競產品有興趣，加上體驗區同銷售區比較接近，所以好多人都係試玩完可以即時購買：「擺檔 4 日來都做到超過 6 位數字生意額，表現算係符合預期。而人流方面感覺同舊年差唔多，而且都仍然係以香港人為主。4 日以來尤以星期日最多人，基本上收單都收唔切，體驗區亦多人到我哋唔夠 promoter 招呼。」
LRT：穿戴產品最好賣
至於售賣手機、平板周邊為主嘅大代理 LRT，他們都表示今年人流確比舊年增加咗大約 15%，不過主要集中係星期六、日，星期一最後一日反而比較靜。另外，他們覺得舊年都有比較多中國遊客，所以成日要講普通話，今年反而少咗好多：「唔知點解今年少咗中國遊客入場，增加嘅人流絕大部分都係香港人，而且都係用家，對於我哋來講反而係好事，因為 sales 唔洗講咁多普通話（笑~~）。」至於銷售最好嘅產品，就首推穿戴式產品，其次就係 Plantronics 耳機產品。至於首次係香港以行貨亮相嘅 Pebble Time 銷情都好好，基本上去到最後一日仲有幾個鐘，都只係得番幾隻未賣，比預期理想。
Microworks：中國遊客得個睇字！
至於香港 GoPro 代理 Microworks，今年電腦節繼續以銷售呢款國際知名 Action Cam 為主。他們表示人流確比想像中多少少，尤其係第一日，相比舊年同期多咗都有 3 成，雖然星期六、日又少番啲，但整體 4 日拉勻來睇都多咗一成左右：「其實銷情同舊年差唔多，不過佔九成半會買嘢嘅都係香港人，中國遊客反而絕無僅有，就算來到都係得個睇字，持觀望態度。」至於最暢銷產品，就首推最新推出的 GoPro HERO 4 Session 小型 Action Cam，而傳統嘅 HERO 4 Action Cam 都仍有一定捧場客。
Verbatim：唔洗劈價都賣得哂
Verbatim 一向以售賣周邊產品為主，今年主力就銷售 Lightning 接駁線同埋其他手機周邊產品，他們表示今年確實旺丁旺財，無論人流同生意額都比舊年上升 15% 左右，銷售額亦達到 7 位數字，表現令人意外：「舊年最後一日，USB、硬碟產品都需要劈價先可以賣得哂，今年人流多咗之餘，入場嘅人都多咗肯洗錢，唔洗劈價都賣得七七八八，儲存類產品更未完場已售罄。當然，唔劈價又唔代表無平到，我哋都有送多啲贈品俾消費者，令佢哋買得開心啲。」至於大會安排方面，他們認為今年通道似乎闊咗，令消費者無論睇產品介紹定係購物都舒服咗；不過攤位燈光安排仍然唔太滿意，另外現金券回購都唔夠多：「多數顧客都係拿住 10 蚊、20 蚊來買嘢，如果可以多啲 50 蚊現金券，相信消費者會願意購買更多產品哩！」
總結： 中國遊客唔係金飯碗，唔玩劈價先係皇道！
訪問過多間廠商，好多都表示今年唔洗劈價都可以做得多咗生意，相信除咗人流多咗之外，增加電競呢個特別元素，都有助吸引本來無興趣入電腦節嘅市民入場睇睇，呢一點確實係今年主辦單位嘅一大進步。其實筆者都去過幾屆電腦節，之前幾年都玩賣平嘢、清貨，確實令電腦節嘅品位愈搞愈低，加上每年都有幾次電腦節，更加令唔少人覺得可入可不入，變相令入場而真係想購物嘅人數逐年下降。今年主辦單位安排縱有改善，但仍然搣唔甩「劈價場」呢個氣氛，好多市民入場都仍然係為買平嘢。筆者就希望主辦單位下年可以花啲心思諗啲新元素，再加上減少每年舉辦電腦節嘅次數，當電腦節品位提高番，相信會有助令唔少傳統大品牌重回展場，亦有望令電腦節變番做一年一度香港嘅科技界盛事。
