今日 Olympus 正式發表 OM-D E-M10 Mk II 無反相機，雖然是 OM-D 系列中最入門型號，但性價比高，單鏡 Kit 套裝只售 $6,690 ，想知性能如何？留意以下速測！
▲黑魂 超型 超Vintage
比上代轉盤更好扭
E-M10 Mk II 貫徹 Olympus OM-D 一向作風有仿古金屬機身，感覺復古得黎又實淨，機身和 Kit 鏡都有黑色同銀色可供選擇，個人認為銀色比較高調復古，文青首選，我籮文就比較低調，喜歡黑色更有神秘感和專業味道。機身厚約 47 mm，機身太薄對於男性用家黎講會比較難揸手，幸好機身手柄位設計得宜，深度足夠讓我穩持整部機。
套裝配上 14-42 mm F3.5-5.6 電子變焦鏡頭，鏡頭收起時非常纖薄，加上機身連電池亦只重約 400克，機身連鏡頭帶出街絕對唔會覺得係重擔。機頂的三粒轉盤比上一代更厚，並加上窩釘外圍，手感好好擰，同上一代「超薄片」轉盤手感是兩回事 ! 。屏幕可以調教角度，惟與上代一樣只有垂直角度，並且不能反轉作自拍用途，成為一大缺憾。
▲三粒轉盤比上一代更厚，並加上窩釘外圍，手感好好擰，外觀上 bling bling 更靚
▲ Touch Mon 向下反的最大角度，未能用作自拍，可惜
▲ Touch Mon 向上反可達水平角度，低炒冇難度！
▲鏡頭收起時非常纖薄，尤如餅鏡一樣，機身連鏡頭放入袋就出得街
5 軸防震 靜音快門最啱偷影
而今代 E-M10 Mk II 有五軸防震，足足比上一代多兩個軸，實際用落表現係點呢？籮文試過一邊行一邊拍片，出黎效果十分理想，當然唔及用路軌，不過影片十分穩定，變型情況亦不算嚴重，配合閃光燈喺較暗環境亦唔會影出鬆郁朦照片，搭緊車影相亦唔會因為車震而影響表現。E-M10 Mk II 由感光元件取代快門簾來控制入光量，減低快門開合做成嘅聲音，就算要偷影女朋友訓教都唔怕快門聲嘈醒佢。
快過上代對焦好多
今次 E-M10 Mk II 中的 Fast AF 技術使用的運算方式有改良，對焦速度比起 Mk I 有明顯改善，基本上半按快門唔需要半秒就可以對焦到，縮短快門滯慢。用 LiveView 取景時 Touch AF 觸控快拍功能可以讓你一 Touch 就自動即時對焦並拍下照片，快而準！ 另外有 AF Pad 觸控功能，當用家用 EVF 電子觀景器取景時，用手指公喺 Touch Mon 度掃，就可以又快捷又準確地選取想要嘅對焦點。除對焦快，連拍速度亦不錯，達到 8.5fps 的高速連拍，屋企隻貓東奔西走都可以用 E-M10 Mk II 捕捉到。
▲用 LiveView 取景時 Touch AF 觸控快拍功能可以讓你一 Touch 就自動即時對焦並拍下照片，快而準！
可惜 .. 4K「片」只是 5fps Time-Lapse
當然唔少得 Olympus 嘅 Art Filters 藝術濾鏡，轉盤撥到 Art Filter 模式就可以加入特效。撥到 Photo Story 模式可以拍攝多張相來併砌成一個故事。影片拍攝最高支援 1920 x 1080 60fps，無反黎講算係唔錯，Olympus 嘅朋友介紹時講到 4K，我都打咗個突，原來 E-M10 Mk II 係可以拍 5fps 嘅 4K 嘅 Time-Lapse，算係一個幾好玩嘅功能。
▲冇開 Filter
▲開左 「濃化色調」 Filter
▲用 Photo Story 模式可以拍攝多張相來併砌成一個故事，你領悟到依個故事嗎？
測試相片
▲(ISO 200 / f4.5 / 1/100) 色彩繽紛嘅甜品，影出黎 AWB 顏色彩度都準確
▲(ISO 640 / f4.2 / 1/60) 1,600 萬像素，放大後成像仍然清?細緻
▲(ISO 400 / f4.1 / 1/50)面部自動對焦，即使 Model 位於逆光位，局部測光十分準確，面部輪廓亦不會過暗。
▲(ISO 1600 / f4.2 / 1/10)
▲(ISO 1600 / f4.2 / 1/10) ISO 開到 1600 ，雜訊增加，油畫化問題開始浮現，高 ISO 始終 m43 機來說是比較吃力。
總結：「Vintage 風格機身靚 對焦特快 」
依部機外觀上實在好吸引，仿古風格嘅機身，機頂轉盤嘅窩釘外圍帶來畫龍點睛的作用，更點綴整部機嘅 Vintage 感，係我最鍾意嘅。性能上，最令人感嘆就係對焦速度，基本上可以話係一按即拍，平時影相個種 先 Focus 後拍照 嘅感覺已經唔存在。今次繼續有 Art Filter 等得意功能，加上復古機身，文青實 LIKE，可惜屏幕唔可以調到自拍嘅角度，相信會令不少年青人卻步。
售價：
$6,690 – 單鏡套裝（連 14-42mm F3.5-5.6 電子變焦鏡頭）
查詢：Olympus (2376 2150)
