Apple 剛發佈了最新一代的 iPhone：iPhone 6s 及 6s Plus，我們無緣到現場進行採訪試機，但外媒對呢兩部新 iPhone 試玩後又有咩感受？以下就等 Edward 為大家總結一下：
機身手感
TheVerge：
改變了物料，但 iPhone 手感仍是很 iPhone，同舊年的 iPhone 6 / 6 Plus 無乜大分別。
Wired：
玫瑰金色好好看哦！
Slashgear：
採用了全新 7000 系鋁金屬製造的 iPhone 6s / 6s Plus，摸上去指尖感覺同 iPhone 6 / 6 Plus 真係有少少分別，不過唔大，咪又係一大舊金屬 + 玻璃。而玫瑰金色新 iPhone 亦比想像中更粉紅，用在 Apple Watch 上感覺還好，但用在 iPhone 上就像是一塊三文魚……
unwire Edward 分析：
感覺玫瑰金很女性向，如果男士們應該都會鍾情於太空灰或者金色吧？至於用上 7000 系鋁金屬，以筆者用過使用相同物料的 Apple Watch 的「往績」，覺得應該可以解決機身易拗彎的問題吧？
3D Touch 熒幕
TheVerge：
用起來感覺比想像中好，Apple 就像讓你「窺看」每樣功能、連結、物件內裡收藏著什麼似的，十分聰明的做法。
Wired：
用起來感覺就像使用滑鼠時右鍵的 iPhone 版，它讓用家感覺 APPS 與 iPhone 本身變得更合拍、更一體化，而且好像進行每個動作也更快、更直接似的。不過 Apple 並無提示哪些軟件支援 3D Touch 哪些不支援，亦無提示什麼選項支援此功能什麼選項不支援，用家需要自行摸索……
Slashgear：
剛接觸時確需要一點時間習慣，因為不知道它是長按模式（Long Press）還是按大力啲的模式（Firm Press），但用了一會兒後就會習慣了。呢項功能用來瀏覽比較敏感的資料，例如：航班、網頁、或者對話內容十分有用，而且亦能有效節省網絡用量。反應唔錯，唯一擔心是第三方軟件要支援 3D Touch 需要較長時間……
unwire Edward 分析：
十分聰明的做法，令用家感覺手指完全唔洗離開熒幕都可以順暢容易操控手機或 APPS 各項功能，而且唔洗開 APPS 或者係未開之前已經可以揀好使用 APPS 內什麼功能，相信都有助令手機唔洗咁食 RAM 吧？（畢竟有啲時候唔開 APP 都睇到相關內容係幾好用嘅……）
鏡頭
TheVerge：
鏡頭反應超快！而且就算手比較震都可以輕易影到清晰相片。至於 Live Photo 功能，其實在唔少 Android 手機上都見過（編按：例如 HTC Zoe），它會擷取用家按下快門制影相前及後的數格畫面，並串連成一張識郁的相片，效果係差唔多，不過係 iPhone 上就感覺較易上手。
Wired：
相片在試機房測試感覺成像十分漂亮，不過在現實環境下質素如何就有待驗證。Live Photo 功能十分過癮，可將相片變成 1.5 秒的超短片，令相片變得更吸引及互動。
Slashgear：
1,200 萬像素對於用家來講足夠了，質素如何就有待稍後測試。前置鏡頭配合 Retina 補光燈十分好用，熒幕會變成補光燈，並會配合四周光源環境閃出合適色溫的補光，十分好用。至於加入 4K 拍片，可見 Apple 確有回應大眾 iPhone 用家的訴求，而且可以直接在 iPhone 上剪輯，非常方便。至於 Live Photo 方面其實與 HTC Zoe 好相似，不過 1.5 秒似乎短了一點，希望第三方軟件可以利用呢項功能，令 Live Photo 可以更好用吧。
unwire Edward 分析：
Apple 終於捨得提升像素啦咩？Live Photo 功能真係好似 HTC Zoe，不過 Apple 只提過上載去 Facebook 仍可以睇到效果，希望上載去其他 APP（例如：透過 WhatsApp、LINE 等分享相片）唔會變番做靜態相片啦！
總結
TheVerge：
是否值得升級？呢個係一個好學術化的 iPhone 問題：基本上你需要一部新 iPhone，就買它（們）吧！如果你已擁有 iPhone 6 或使用上已能滿足到你的更舊款的 iPhone，亦沒有急於升級的必要。但如果單純評論 iPhone 6s / 6s Plus，它們確實是部好手機。
Wired：
s 系 iPhone 的一貫作風：更強效能、少量新增裝置操控的方法、以及一些細微細眼的新功能或升級功能令你覺得手機更好玩。外形方面，值得一提玫瑰金色真係幾靚！
Slashgear：
作為 iPhone 粉絲，應該會對 iPhone 6s / 6s Plus 的各項新功能很感興趣，尤其是它的效能提升及加入 3D Touch 功能，應該會是不少人升級的「藉口」吧。
unwire Edward 分析：
s 系 iPhone 一向都屬於「無甚驚喜」的產品，最少係外型上一向如是。今次 Apple 推出的 iPhone 6s / 6s Plus，唔止加入新色，仲加入 3D Touch 熒幕，新意已經比過往任何一代 s 系 iPhone 都要多架啦！如果唔係之前的傳聞洩漏咁多資料，相信今日第一次接觸 iPhone 6s / 6s Plus 資訊的 wire 民，應該都會覺得驚喜頻頻吧？
來源：TheVerge、Wired、Slashgear
