今次 Apple 推出 iPhone 6s 及 6s Plus，其中一個重點新功能就係熒幕加入壓感嘅 3D Touch 功能。有人覺得多咗個操控模式方便咗，但都有人覺得多個操控要學好麻煩，而且唔係咁易學得識。究竟 3D Touch 用落係咪真係咁難？係咪真係咁無謂？Edward 而家就試俾大家睇。
美中不足，不是每一下都感應到
說說 3D Touch 的感覺，簡單講就是熒幕好像變成 Notebook 的 Touch Pad ，除了可輕點一下外，還可以「按壓」進行指令，而這個按壓不用太大力，稍稍好像貼郵票的力度就夠。當然你按下後熒幕不會像 TouchPad 般凹下去，取而代之是成功按壓半秒後給你一個「短震」，不過天恩說他覺得震動回應有點慢，而且「震度」像收到短訊般，不是太 Match 。如果震動回應快一點，而且是大力的震一下而不是半秒的「密震」，感覺會比較像真。另外成功率可能需要改善，時常都按不中，不知是自己力度未慣還是感應有問題。
一按、一壓 = 預覽、開啟
其實 3D Touch 聽落睇落好似好難，但筆者玩咗 5 分鐘度就已上手。其實 3D Touch 平時用，簡單來講就係按 （Peek）同壓（Pop）。先講按（Peek），就係輕輕用力按下希望快速瀏覽嘅內容，熒幕就會彈出一個懸浮視窗俾大家預覽呢項內容，當手指放開就會自動關閉；至於壓（Pop），就係當大家真係想開啟該內容，就再大力向下壓，就會完全開啟完整內容，俾大家詳細瀏覽。呢項功能，對於搵資料個時，又唔想下下開來睇咁慢同麻煩最為有用。
▲係相簿想預覽張相，輕按一下相片兼手指唔離開熒幕，就可以進入 Peek 功能。
▲當大力壓下，就會進入 Pop 功能開啟相片。
▲又例如係電郵入面，如果有網頁連結，輕按連結用 Peek 功能就可以預覽網頁內容。
▲再大力壓下就可以啟動 Pop 功能，係 Safari 開啟網頁瀏覽全文。
用途比想像多
至於用處方面，內置 APP 好多都用得到，包括：瀏覽訊息內嘅連結、相片、地圖等；瀏覽相簿內嘅相片、影片等；瀏覽通話內嘅常用聯絡人以方便快速聯絡；瀏覽地圖內嘅興趣點詳情等等。此外，未來就連部分第三方軟件都可支援，例如：按住 Facebook APP 圖示就可以快速出 feed、Instagram 內按住用戶名稱可快速瀏覽佢嘅個人資料等。不過 Edward 試過絕大部分第三方軟件現在的版本都未支援 Peek 及 Pop 功能，相信要等軟件更新過往先可以試用了。
▲係地圖入面亦可以用 Peek 瀏覽興趣點詳情。
拉上 / 左 / 右更多功能快速用
3D Touch 係咪得 Peek 同 Pop 更簡單？當然唔係！其實佢仲可以係指定軟件拉上、拉左或者拉右，就可以開啟到唔同功能。例如：係睇相個時 Peek，然後向上拉，就可以係下面揀係咪想複製相片、分享相片、將相片加入至喜好項目、又或者刪除相片；睇電郵個時，以 Peek 預覽電郵，然後向上拉，就可以揀回覆、轉寄、標示、通知我或者移動郵件，向右拉，就可以揀係「已讀」定係「未讀」，向左拉就可以揀係咪封存該電郵。呢啲附加功能，令大家基本上可以忘記以往嘅「漢堡包」鍵（即係三條橫線嘅按鍵），對於係地鐵無位坐，要企係度單手操控電話個時，特別有用（因為以前漢堡包鍵往往位於熒幕左、右上角，要單手按動係好難，點都要一隻手拿住電話，另一隻手先可以騰空到去按漢堡包鍵）。
▲例如：睇電郵時如係 Peek 電郵時向上拉，就會出現呢個目錄，方便進行快速回覆對方、轉寄電郵俾其他人等動作。
▲而向左、右拉，就可以快速進行其他動作。
「快速動作」唔開 APP 直入功能
3D Touch 亦可以令大家唔洗開 APP 都可以直入指定功能，例如：大家想快速開啟自拍功能，亦可以用呢個操控按下相機 APP 圖示，再選擇「自拍」就可以直接進入前置鏡頭拍攝 mode，唔洗入到相機先轉；你想聽 Apple Music 嘅 Beats 1 電台，只要輕按音樂 APP 圖示，再揀「播放 Beats 1」就可以了。有咗「快速動作」，真係可以令大家用手機個時快好多，手指唔洗離開熒幕都已經可以順暢操控 iPhone。
▲輕按 Safari 就可以快速顯示閱讀列表、顯示書籤、加入新的私密標籤頁或新增分頁功能。
▲輕按電郵 APP 就可以瀏覽所有收件箱、有否 VIP 寄 email 俾你、搜尋郵件或新增郵件。
▲輕按地圖就可以快速找到回家路線、標示現在位置、傳送現在位置或搜尋附近有咩興趣點。
▲至於輕按音樂更可以快速進入 Apple Music 電台收聽 Beats 1。
支援壓感線條可粗可幼
此外，3D Touch 亦可令大家係畫畫或者記事個時，唔似以前咁一條線就係一條線，而係可以根據按壓熒幕力度大細，去決定線條嘅顏色深淺以及是粗是幼。對於鍾意用 iPhone 畫畫又或者想記事個時有線條粗幼之分嘅用家來講，真係一個好體貼嘅功能。
▲以前係無 3D Touch 功能熒幕嘅 iPhone 上面，畫線就只能係畫線。
▲而家係 iPhone 6s / 6s Plus 上就可以用按壓熒幕輕重力，畫出幼或粗嘅線條。
Home 鍵更耐用
另外，3D Touch 仲有其他功能，例如：按壓熒幕最左側位置，就可以呼叫出程式切換介面，大家唔洗禁兩下 Home 制都可以做到相同效果，變相延長 Home 制壽命（不過 Edward 試過呢項功能都幾難用，成日按住左側唔小心就變咗移動頁面……）；另外係用鍵盤打字個時，只要按壓鍵盤並保持手指在熒幕上不放開，按鍵就會消失，然後大家再移動手指，就可以移動遊標位置，方便更改已輸入文字。
▲按壓熒幕最左側，就可以呼叫出程式切換介面，連 Home 制都唔洗禁。
▲輸入文字時按壓鍵盤並且手指唔離開熒幕，然後向四方移動，就可以移動畫面上遊標，方便更改已輸入文字。
▲另外如果大家選擇咗 Live Photo 作為牆紙，只要按住畫面唔放，Live Photo 就會郁，變成會郁嘅背景。
總結：3D Touch 用咗真係番唔到轉頭
整體來講，3D Touch 真係唔係大家想像中咁難學，就算 IT 知識再一無所知嘅朋友，一般來講都可以係 15 分鐘內學識。而且 3D Touch 基本上可以令大家手指唔離開熒幕都單手操控到電話，對於智能手機操控來講，真係一個里程碑，因為用咗你就會覺得好好用而番唔到轉頭。所以如果大家真係出咗部 iPhone 6s / 6s Plus 自用，記住多啲用 3D Touch，對於處理任何動作都會快好多！筆者唯一希望係可以快啲有多啲第三方軟件支援 3D Touch，等大家唔洗局限只係用喺內置 APPS 咁少用途啦。
