中國品牌 ZTE 中興喺國際上其實已經漸露頭角，今次 ZTE 為大家帶黎 Axon Elite，主打三項生物認證解鎖，包括指紋、眼紋及聲紋，亦有雙鏡頭設計，想知更多快啲拉落去睇吓啦！
外型去「中國化」
Axon Elite 為 ZTE 的新一代旗艦機，外型落咗一定心思，比其他中國品牌手機更國際化（無咁重中國特色）。ZTE 特地邀請曾為波音提供設計的 Teague 公司操刀設計，例如唔少地方可以見到 Axon Elite 的設計心思，例如機身採用航鋁鈦合金打造，機背上下方都有皮紋裝飾，更有貴氣。螢幕上下方都有三角形鏤空設計，成為 Axon Elite 的象徵。機背以弧形曲線設計，籮文揸上手好貼手。立下眼下覺得有少少 HTC ONE S 的影子，不過望真又好唔同，機身每個部份手工做得好細心，Axon Elite 率先令籮文對身為中國手機廠商的 ZTE 另眼相看。
▲螢幕上下方都有三角形鏤空設計，成為 Axon Elite 的象徵
▲機身採用航鋁鈦合金打造，機背上下方都有皮紋裝飾
▲機身尺寸只有154 x 77 x 9.8mm，加上機背以弧形曲線設計，籮文揸上手覺得好貼手好舒服
▲機身下方 USB 位，上方耳機位，右側開關及左側音量鍵，整體造工不錯
三紋解鎖 （有冇三圍解鎖？）
Axon Elite 突破性地同時具有三紋解鎖，三紋包括指紋、眼紋及聲紋，指紋大家都認識。有別於一般虹膜辨識，ZTE 的眼紋辨識係掃瞄眼白，ZTE 發言人就指出，掃瞄眼白比起虹膜辨識速度更快。聲紋辨識就係你講一段野無論中文或英文，系統會分析出你係咪機主本人。講真，有三種生物認證方法，不過相信普通用家唔會三種都用晒，不過如果你有高度機密，例如商業資料、私密照片、或者犯罪證據等，依個功能就非常適合你。
▲指紋辨識器位於機背，非常就手
▲突破性地同時具有三紋解鎖，三紋包括指紋、眼紋及聲紋
全球首部 螢幕採用康寧抗菌玻璃
Axon Elite 配備 5.5 吋 Full-HD 螢幕，像素密度達400ppi，效果同 iPhone 6S Plus 無咩分別。螢幕採用康寧抗菌玻璃（Antimicrobial Corning Gorilla Glass），係全球首部手機用上依種玻璃，玻璃硬度與一般玻璃相約，不過就可以透過玻璃內銀離子塗層消除細菌達 99%，有報導話手機細菌多過廁所，咁成日講電話容易經口部或呼吸感染 ? 籮文就唔係好知，可以請教下醫生，如果女士們驚多菌攪到臉部敏感的話，也許呢部機比到大家少少安心
▲Axon Elite 配備 5.5 吋 Full-HD 螢幕，像素密度達400ppi，呎吋及像素密度跟 iPhone 6S Plus 一樣
音響勁 有 Dual Track Hi-Fi
Axon Elite 載有 AKM 4961 音頻晶片，開通 Dual Track Hi-Fi，配合內建 32bit 超低功耗音頻 DAC 晶片，聲音輸出比一般手機好，發佈會當日歌手唱歌時，大會就用 Axon Elite 播放 MMO，用場地嘅喇叭播都聽唔到sese聲底噪同任何電流聲，算佢合格啦。
▲發佈會當日歌手唱歌時，大會就用 Axon Elite 播放 MMO
雙鏡頭玩雙頭後對焦
Axon Elite 背部有雙鏡頭組合，兩個鏡頭就唔係用黎拍 3D 嘅，原來鏡頭分別擁有 1,300 萬畫素與 200 萬畫素，配合 Emotion Eye Engine 攝影引擎，可以用內建嘅介面「先拍照後對焦」，又可以影出景深效果，背景虛化功能拍出的照片可以後期修改，調較背景模糊程度，都幾好玩，影出黎亦幾自然。而 Axon Elite 可以拍 4K 片，可見 ZTE 今次喺相機方面非常進取。可惜籮文試過 800萬像素前鏡自拍功能，表現麻麻。
▲只要 Switch 到背景虛化功能
▲背景虛化功能拍出的照片可以後期修改，調較背景模糊程度，上圖是 0 度，下圖是最高的 5 度
▲顏色表達好鮮明
▲影出黎線條好銳利
▲景深效果夠真夠明顯
雙 SIM 旗艦規格唔太熱
Axon Elite 內搭出名有發熱問題 Snapdragon 810 處理器，短短時間籮文未試得出 Axon Elite 有冇解決到問題，不過用咗一陣都未見到有發熱情況。 3GB Ram，及 32GB 儲存空間，更可以插最大 128GB microSD。此外，Axon Elite 亦支援雙 Sim 卡，方便跨境工作人士。 3,000 mAh 電池支援 Quick Charge 2.0，叉 5 分鐘就可以傾 120分鐘電話。
籮文：「好過乜米乜族好多」
老老實實，由乜米到乜族對中國手機觀感都係賣性價格，機身用料硬係普普通通唔夠 Charm。呢部 Axon Elite 機上做工上都好有心思，你會 Feel 到係真係到其他中國機唔同，唔係單係玩性價比咁簡單。
