上星期，Edward 的同事第一時間買到 Apple 最新推出的 iMac 21.5″ 4K Retina 返 office，筆者自然第一時間搶咗來同大家做咗個速測啦。iMac 4K 試完之後，筆者一試愛上，係 weekend 就即時去 Apple Store 買返部來自用。到今日用咗成個星期，深入試用後究竟覺得點呢？而家就同大家分享多少少啦。
Edward 基本必裝 APP
第一件事問到部 iMac 番來，Edward 首先自然係 setup 啦。老實講，筆者部 MBA 都已經一早升級咗去 Mac OS X El Capitan，所以用 iMac 個時，個介面都已經習慣哂，唔洗再熟習一次。不過最緊要都係裝番用開嘅 APP，除咗一貫娛樂方面（例如：Spotify、Steam + 玩開嘅 games、LINE 等）同埋工作方面（例如：Pages、Numbers、Keynote、Microsoft Office、TeamViewer）之外，最重要都係三個 APP：Chrome、Yahoo 奇摩中文輸入法同埋 BETTER TOUCH TOOL（點按連結可下載軟件）：首先雖然 El Capitan 入面嘅 Safari 好用咗好多，但筆者始終都係習慣用 Chrome 多啲；至於 Yahoo 奇摩中文輸入法，就可以令大家用番 Windows 嘅文字排序去選字，如果你同筆者一樣都係用速成輸入法，呢個可以話係必裝(最緊要係少好多 BUG，系統內置的中文輸入法由 Yosemite 開始就同 Safari 唔夾) ；至於 BETTER TOUCH TOOL，主要用法係令大家係 Mac OS 入面都用到好似 Windows 入面嘅 Snap 功能，將畫面一分為二對照住用。雖然大家可能話 Mac OS X El Capitan 內置都有呢項功能（Split View），但用落始終都係無 BETTER TOUCH TOOL 方便。
▲首先一開機自然係裝返常用程式，我首先就梗係裝番 Chrome 瀏覽器，始終已經慣咗用。
▲其次就係裝番奇摩中文輸入法，我試過係 iMac 21.5″ 4K Retina x Mac OS X El Capitan 上面係可以完全用得番。記住裝番之後係要登出戶口一次。
▲之後進入設定 –> 鍵盤 –> 輸入方式，再點按「+」，然後係繁體中文入面揀番 Yahoo! 奇摩輸入法即可。
▲大家可以自行揀番習慣用嘅中文輸入法，奇摩中文輸入法好處係排列次序同 Windows 入面一樣，對於初轉會 Mac 嘅用家好啱用。
▲至於 BetterTouchTool，安裝後大家要先將用得著呢個 APP 嘅程式放入清單入面。
▲然後將程式拉至熒幕最左或最右，就可以用一半熒幕使用該程式了，簡單過 Mac OS X El Capitan 內置嘅 Split View。
開始使用時慢是正常的
裝哂所有程式，做好所有設定，此時如果大家即時開始用部 iMac，可能會覺得窒下窒下，大家未免會諗：係咪唔夠 RAM？係咪因為用 HDD 而唔係用 Fusion Drive 問題？其實唔係，就算大家加到 16GB RAM 或者轉用 Fusion Drive、甚至 SSD，都一樣會有呢個問題，原因係每部 Mac 新機落地都需要進行 indexing 工序，為每個檔案建立 tag，令大家日後搜尋時更加爽快。而 indexing 係需要時間嘅，亦會大量耗用系統資源，所以大家就會覺得窒下窒下咁。筆者建議大家買部機返屋企，做好基本設定後，可以放低佢去食個飯、出街行下或者瞓個覺，幾個鐘後如果大家唔係太多嘢，應該就可完成 indexing，屆時先用就會順好多啦。要記住：如果硬碟愈多嘢，所需 indexing 時間就愈久，而採用哪種硬碟亦會影響速度，由慢至快分別係 HDD > Fusion Drive > SSD，大家就要記住了。
舊芒唔洗哂夠位可玩 dual 芒、三芒
如果大家以前有用 Windows PC 而唔係用手提電腦，應該屋企都會有一隻甚至兩隻舊 LCD 芒吧？轉用已經有埋熒幕嘅 iMac，係咪舊芒就要掟去回收區？其實不必，如果大家檯面夠位，其實 iMac 設有兩個 ThunderBolt 2 插槽，只要用個 adapter，就可以將一個、甚至兩個舊芒同部 iMac 連接埋一齊，咁樣大家即使用 iMac，都一樣可以玩雙芒、甚至三芒，提升工作效率，又或者打機個時更加爽啦。
▲如果大家有用 MBA 駁 LCD 芒用，應該會有呢條 ThunderBolt <–> HDMI 接線，佢一樣可以令大家用 iMac 時玩雙芒、甚至三芒！
▲駁咗之後係系統資訊入面就會顯示有兩個熒幕。
▲Edward 試過用雙芒，用落真係好順，完全唔窒。
8GB RAM + Intel GPU 其實一般都夠用
相信唔少人買機都會求買標準配置規格，而 iMac 21.5″ 4K Retina 嘅標準配置就係 8GB LPDDR3 RAM + Intel Iris Pro Graphics 6200，對於唔洗點剪片嘅筆者來講，其實都好夠用，就算用來打機，筆者玩開嘅 Europa Universalis IV 同埋 Civlization V 都夠力 run，而係 Football Manager 2015 入面，就算開盡歐洲五大聯賽（英、意、德、法、西）入面所有聯賽級別，加上 Large 資料庫，都一樣 run 得好快好順（順暢度遊戲入面顯示有 4.5 粒星）。不過玩對立體圖像要求較高的遊戲，例如：Cities Skylines，開至如下圖設定用盡 iMac 21.5″ 嘅 4K 解像度加上全熒顯示玩個時，就明顯少少窒窒地，但都仲叫做玩得到。所以除非大家要剪片或者拿部機來做立體圖像啦（例如：Autodesk 3ds Max），先要加 $1,560 升級去 16GB LPDDR3 RAM，又或者直接入手 iMac 27″ 5K（因為有獨顯），否則真係無乜必要升。至於處理器，筆者就覺得標配嘅 Intel Core i5 3.1GHz 四核心處理器已經好夠用，又係個句啦，除非大家係拿部機來剪片、做立體圖像、做好多 layers 嘅圖、又或者乜都要開到中至高設定嘅專業 gamers 啦，否則真係無乜必要多花 $1,560 升到去用 Core i7。
▲如果你問筆者意見，對於一般人來講標配都好夠用，唔洗特登升 CPU 同加 RAM。
▲以全熒幕玩 Europa Universalis IV 縮放畫面時好順。
▲用盡全熒兼最高解像度來玩 Civilization V 都一樣好順，完全唔窒。
▲不過係設定畫面時就用唔盡全熒，幸好入到遊戲完全無問題。
▲而玩筆者最愛的 Football Manager 2015，就算開盡 5 大聯賽兼大資料庫，都有 4.5 粒星，即係代表超順！
▲不過玩對圖像處理要求較高的遊戲，例如：Cities Skylines，全部設定開至最高兼用盡解像度時就會幾窒，建議大家用番預設設定就好了。
最好升級 Fusion Drive
另一項大家可能會問嘅就係：究竟係咪應該買番標配嘅 1TB 5200rpm HDD 都夠用，定係應該升級去用 Fusion Drive？筆者就覺得大家要睇自己係咪「心急精」，又或者係咪已經一早用慣採用 SSD 嘅機啦。如果係嘅話，雖然 1TB Fusion Drive 只係得 24GB SSD（升級成本：+$780），但因為 OS 安裝係 SSD 而非 HDD，至少開機會快過標配嘅 HDD 好多（理論上）。當然，如果大家想讀寫速度都快好多嘅話，手頭預算又比較鬆動，最好就梗係升去用 2TB Fusion Drive（+$2,340）、又或者直上用 256GB SSD（+1,560），前者 SSD 最少都有 128GB 空間，後者直頭成個儲存空間都係 SSD，讀寫速度肯定快好多。
▲如果你係心急精，又用標配嘅 1TB HDD，就會出現如上圖般，入設定都會好長時間個 icon 彈下彈下，而且畫面無反應嘅情況。
▲完全進入設定介面都要成 35 秒左右。
▲相反筆者用採用 512GB SSD 的 MBA，就只需要 3 秒左右，差別好大呀！
▲而硬碟讀取速度方面，由 USB 手指抄寫 2.15GB 檔案去 iMac 嘅 1TB HDD，要成 1 分 3 秒左右。
▲而係 MBA，就只需要 19 秒半左右，同樣快超多！
▲咁抄相同容量檔案去 USB 手指速度又如何？採用 HDD 嘅 iMac 需要 3 分半鐘。
▲至於係採用 512GB SSD 嘅 MBA，唔係差好遠，但 3 分 4 秒左右都仍然比 iMac 快。
唔驚睇到眼盲熒幕可縮放
相信有啲讀者都會擔心：嘩！4K 熒幕用係 21.5 吋機上面，會唔會睇到眼盲，用個時要附送放大鏡呀？筆者用咗 7 日之後，可以話俾大家聽，呢個情況係唔會發生。因為雖然 iMac 21.5″ 係用 4K 熒幕，但佢個 Mac OS 會預設將文字縮放去到正常 size，即係話用緊呢部新 iMac，同大家用緊部 New MacBook 比較，字體大細係幾乎相同，只係顯示範圍會增加而已，大家亦唔會感覺睇到眼矇眼盲。當然，大家如果想再「字大」啲，都可以進入設定 –> 顯示器 –> 縮放，然後再進行調較，不過筆者覺得一般用家用預設已好夠用，除非係俾長者使用，咁就可能需要字體較大一級比較好。至於銳利度方面，係 21.5 吋熒幕上面用上 4K 解像度，自然十分高，其實係之前筆者嘅速測文都已經詳述，如果大家有興趣可點按此睇番。
▲其實預設熒幕設定，大家可以係 21.5 吋 4K 熒幕上面睇得好舒服。
▲大家可以睇到用熒幕預設值情況下，睇細字都好舒服，而且範圍好大。
▲相比只有 1,366 x 768 解像度嘅 MBA 11″ 睇嘅範圍就細好多了。
▲當然如果係俾長輩用，放至最大都不失為一個好做法。
▲當然大家想盡用 4K 空間又對自己嘅眼力好有自信，不妨調較至最細文字，但筆者就唔太建議了，因住睇到眼都矇！
跟機送鍵盤幾日都算習慣
至於跟機送嘅最新 Magic Keyboard 同埋 Magic Mouse 2，好唔好用？等筆者逐樣講啦。首先係 Magic Keyboard，試用一星期後，問同事拿來上代 iMac 嘅入電池式無線鍵盤，真係鍵深淺好多，如果大家係用開個款鍵盤，確實要時間適應。但對於筆者來講，一向用開 MBA 嘅鍵盤，今年仲試用咗 New MacBook 嘅幾乎零鍵深嘅鍵盤，我就覺得 Magic Keyboard 打起來手感係介乎於 MBA 同埋 New MacBook 之間，但比較偏向 MBA，所以用咗兩、三日，基本上都已經習慣哂，唔覺得好難用。而且鍵盤斜度較平，兩隻手打字個時唔洗吊住，都算幾舒服。
補錢換 Magic TrackPad 更好
至於跟機送 Magic Mouse 2，我就覺得間唔時打機個陣局住要用 Mouse 先至會郁到佢，平時絕大部分時間，我都覺得唔係咁實用，雖然長咗用落係比上代舒服，但係比較平坦嘅表面，用落真係手感唔太好，掌心位置感覺好似好「空洞」，結果好似要吊住食指同中指去用咁，唔係好習慣；反而可能用慣 Apple 嘅手提電腦，Magic Trackpad 2 反而更加好用，最少操控上比 Mouse 2 更勝幾籌。所以我建議各位 unwrie 讀者出機時唔好要 Mouse 補錢換 TrackPad 2，再出去買隻真係人體工學的 Mouse 會更化算。雖然 Trackpad 2 要俾貴接近成千蚊，但真係值得入手。
▲Magic Mouse 2 兩隻手指要吊住用，其實唔太舒服，除非迫不得已否則筆者都唔多機會用佢。
▲Magic Trackpad 2 雖然接近成千蚊，但用佢操控 iMac 真係舒服好多，值得投資！
記得要買 AppleCare！
如果大家好似筆者咁，係第一次用 iMac，我就建議大家唔好慳，記得買機個時買埋 AppleCare！當然，其實係由第一日你買機起，已經有一年嘅保養期，但如果大家買咗 AppleCare，唔止保養延長到去 3 年，而且設有上門拿機服務，萬一第日部 iMac 有咩「三長兩短」，Apple 都會有專人上門 pickup 部機，整完亦會送番部機俾你，唔洗自己拎咁辛苦。而最重要嘅係，萬一唔小心整爆咗個熒幕，有 AppleCare 換過塊芒點都肯定平過無 AppleCare 嘅人去換（據 Apple Store 店員表示如果無 AppleCare 而整爛咗 iMac 熒幕，換番塊已經等於機價嘅 3 分之 2……Orz）。其實 iMac AppleCare 都只不過係 $1,288，大家認真諗下，唔怕一萬只怕萬一，呢舊錢俾咗，touchwood 如果有一次部 iMac 要大修，就真係抵番哂！
總結：終於可以放棄「黃金 PC 」
呢幾年筆者一直都係手提電腦選用 Apple 品牌，但家中同埋辦公室電腦仍然係採用俗稱「黃金戰士」嘅 DIY 自砌桌面電腦再加隻 LCD 顯示器咁用，當然 OS 肯定係 Windows 啦。今次辦公室部「黃金戰士」終於跪低，令筆者終於膽粗粗買部標準配置版 iMac 21.5″ 4K Retina 來試，發覺真係用來做主力機都好夠用，唔止工作上好正，就連娛樂、睇片、甚至打機都綽綽有餘（本身內建喇叭都好夠聲，夜晚係公司 OT 開住 Spotify 來聽歌一流），令我終於可以成為全 Mac 人，完全放棄再用「黃金戰士」。至於洗唔洗加 RAM？對於唔洗剪片嘅我來講，8GB 都好夠用，但用咗幾日，1TB HDD 真係有少少慢，對於一向心急成性嘅我來講，最終都係決定拿部 iMac 去 Apple Store 退貨，然後上 AOS 訂番部轉用 1TB Fusion Drive 嘅 iMac 21.5″ 4K Retina！
