《Star Wars》依排就 Hit 啦，咩產品都出齊，手提電腦、藍牙喇叭，連花灑頭都出埋呀。之前有冇留意我哋提及過有廠商要推出激光劍雨傘呢？今次籮文終於拎到上手啦！等我即刻試下俾大家睇！
即使唔係 Fans 都會覺得型
莫講話 Star Wars 嘅 Die Hard Fans 啦，即使唔係 Fans 都會覺得型。這款激光劍雨遮遮柄設計同激光劍柄一樣，造工都好精細，有閃閃反光嘅表面，而雨遮骨架更加內置咗 LED 燈，只要㩒一㩒劍柄粒開關制，就可以成支劍發出螢光，再㩒就可以切換三種不同顏色，分別係藍、紅及綠光，對應返天行者、黑武士及尤達大師，在下雨的夜晚揸住出街，肯定會成為眾人嘅焦點。呵！尤其係 Halloween 就快到，根據天文台資料當日可能會落兩，依把嘢就真係大派用場啦。
▲只要㩒一㩒劍柄粒開關制，就可以成支劍發出螢光
▲再㩒就可以切換三種不同顏色，分別係藍、紅及綠光，對應返天行者、黑武士及尤達大師
有姿勢亦有實際
除可以發光的激光劍形骨架外，這把雨傘的設計大致上與一般長雨傘差不多，長度為 45 吋，重量為 2.8 磅，長度同大細都同日常用開嘅遮差唔多，就算係籮文咁大份都一定遮得晒，不過拎上手的確係重過平時啲遮少少。籮文檢查過成把遮，睇落都算堅固硬淨，正常嘅一號風球都應該頂得到嘅，不過就真係要注意，因為始終都係電子嘢，所以要輕手嘅，因為可能跌多幾跌真係會壞架！其實除咗支柄識發出激光，柄嘅底部仲有一盞電筒，所以就係有姿勢亦有實際，唔只得個樣，仲好實用架！成把遮只需要三粒 4A 電就可以驅動，續航力就未試到啦，反正周街都有便利店俾你買電啦！
▲而黑色的傘面和扣帶上則印上《Star Wars》的 logo
▲其實除咗支柄識發出激光，柄嘅底部仲有一盞電筒
▲擰開電筒位就可以搵到入電嘅地方
▲老老實實都幾夠光，喺 Office 求其搵個角落頭影都可以影得出明顯效果
▲比例同其他遮差不多
籮文：「不如加埋 Sound Effect 啦」
不過籮文就覺得依把遮有地方可以改良，如果改為用 USB 叉電，好似方便啲。同埋如果啲激光可以好似 Star Wars 戲中嘅激光劍咁，一開動時，激光係由底部延伸出黎，而唔係依家咁，一㩒就成支著晒，一定會型更多。喂，如果可以再加埋 Sound Effect 就更加爽啦！！（可能我太多要求）（BTW 喂喂喂，如果出一支真嘅激光劍俾我就係最爽啦喂！！）至於價錢方面，如果可以平啲就好啦。
售價：＄69.99 美元（約＄542 港元）
查詢：BigBadToyStore
