3D Robotics Solo 係一部智能航拍機，用家唔需要兼顧飛行，只需要控制攝影角度就得。今日我 籮文就約埋 Model Natalie 去玩吓依部 3DR Solo，想知有幾好玩就繼續睇落去啦！
3DR 原來大有來頭
大家可能未聽過 3D Robotics 個名，其實佢大有來頭。佢哋係一間黎自美國嘅無人駕駛機公司，早喺2009年就成立，並且喺2012年成功以無人駕駛機運送 Pizza。2014年進軍消費者市場就推出咗 IRIS 及 IRIS+ 兩款產品，以簡單易用的智能化設計，配合首個真正的 Follow Me 跟隨模式，推出後大受歡迎，並得到各大企業注資。到 2015 年 3D Robotics 就推出咗以下依部 Solo 啦！
▲籮文：「喂，淨係個外型都夠晒型啦！成個黑武士頭盔咁。」
內置雙 1Ghz CPU 計算航線
3DR SOLO 可以話係全球首部智能航拍機，因為佢內置兩個 1GHz 處理器，可以俾用家以智能化系統簡易設定飛行航線，咁用家就唔使控制架機嘅飛行，只需要專心控制攝錄機嘅拍攝角度就可以，籮文同 Natalie 只係用咗一個鐘左右嘅 Training 就拍攝到唔錯嘅效果啦。
▲事不而遲，Solo 航拍機、遙控、手機／平板、GoPro 齊晒，準備起飛！
外駁 GoPro 更保值
唔同某啲其他品牌嘅航拍機內置唔可以拆除嘅攝錄機，3DR Solo 其中一個長處就係可以外置 GoPro 攝錄機進行影片拍攝，令用家更有彈性地使用，攝錄機壞咗就可以淨係換攝錄機，想升級攝錄畫質亦可以淨係升級部攝錄機。
飛行中都可以調較 GoPro 設定
只要裝埋 3DR 嘅三軸穩定器，就算 Solo 已經帶埋 GoPro 一飛沖天，用家都可以隨時調整攝錄機設定，例如關閉或開啟錄製、切換拍片同影相模式等等。而穩定器亦可以同時為 GoPro 充電，咁就唔怕飛飛下 GoPro 冇電啦！
四大智能飛行模式
除咗一般航拍機都有嘅手動遙控飛行，3DR Solo 仲可以自動起飛同降落，就快冇電亦都會自動回航，但係叫得做智能航拍機又點只依啲呢！Solo 內置一啲好智能嘅飛行模式，基本上只要選擇好你想用嘅模式，較一較啲簡單嘅設定就可以食住花生等佢拍啲靚片返黎。無論係好似籮文咁，鍾意自由自在自己控制飛行，又或者好似 Natalie 依啲想要簡單操作嘅女孩子，依款機都可以照顧得到大家嘅需要。
▲籮文：「喂你睇下我飛到幾遠」，Natalie：「喂你飛咁遠做咩呀！到我玩啦！」
▲3DR Solo 內置智能嘅飛行模式，最主要有 Selfie、Cable Cam、Orbit 同埋 Follow Me，以下會逐樣介紹。
空中拉一條虛擬鋼纜！Cable Cam Mode
用家只要選擇咗兩個不同嘅地點，Solo 就可以好似駁咗喺條鋼纜度咁，由起點滑行到終點。滑行期間，用家就可以專注操作相機嘅拍攝角度，唔使操控 Solo 嘅飛行。
▲只要 Set 好咗，Solo 就會由 A 去 B，B 去 A 咁來回飛行架啦！
圍住你轉！Orbit Mode
用咗 Orbit Mode， 只要設定的某個地點為中心點，Solo 就會自動環繞飛行。你仲可以設定個圈嘅半徑距離、控制 Solo 以不同的方向、高度和速度飛行，相機都會對準中心點黎拍攝，用家只要控制鏡頭角度就可以架啦！
▲只要設定的某個地點為中心點，Solo 就會自動環繞飛行
等等，影條 Selfie 片先！
喂依個 Mode 啱晒你啦 Natalie！Selfie Mode 故名思義係自拍模式啦，只要一㩒 Solo 就會喺你面前開始飛離地面25米高及50米遠的距離，一條片影晒你個靚樣同埋你身邊嘅靚景。Natalie 心諗：仲講，影完就梗係即刻用手機 Up 上 Facebook、Instagram 俾朋友睇啦！
▲一飛沖天嘅自拍，人靚景靚，拍出黎就實係靚到飛起啦
行啦，Follow Me！
依個 Follow Me 嘅拍攝跟隨模式，只要連接咗你嘅智能手機或者平板，Solo 就會跟住你嘅移動軌跡飛行，帶住部手機並開咗依個模式之後連遙控器都唔使拎，就算你去到天腳底， Solo 都一樣會陪伴你，喺空中望實你，真係好浪漫呀～（籮文：「咁我走先啦。」）
▲就算你去到天腳底， Solo 都一樣會陪伴你，喺空中望實你，真係好浪漫呀
建議售價：
3D Robotics Solo $7999
3D Robotics 3-Axis Gimbal $3199
產品查詢：2950 0175 (Microworks Technology Ltd.)
