聖誕除咗四圍影相，當然係食聖誕套餐啦！我依莉詩係短短十幾日內介紹咗港九新界廿幾個商場的聖誕裝飾，見都寫得七七八八啦！係時候介紹下有咩聖誕美食啦，而今次就嚟到時代廣場的韓冰，試下佢地新出的聖誕同紫薯系列甜品，包大家一望到就流口水！
繽紛聖誕系列
聖誕系列以士多啤梨同雜莓作配料，紅噹噹之餘加埋雪人、星星等朱古力片就更有聖誕氣氛，可以話係打片必試！不過要到 12月頭先正式推出，所以暫時未定價啊！
▲ 士多啤梨雪人雪花冰
一上枱，相機已經好肚餓，唔食唔得啦！一層層的士多啤梨同雜莓鋪滿雪花冰，用朱古力同雲呢拿雪糕所造的雪人又超可愛。不過影還影，韓式雪花冰質感比較鬆散，所以比較容易溶，影完就好快手食啦！
打卡指數 ★★★★★
美味指數 ★★★★☆
▲ 雜莓多士樹
雖然醬同忌廉唔多夠，令多士食落有 D 乾，不過一粒粒厚多士疊成一棵樹，加埋雜莓、星星朱古力等裝飾後，好有 Little Twin Star 的感覺呢！
打卡指數 ★★★★★
美味指數 ★★★☆☆
▲ 士多啤梨 Latte
士多啤梨味唔算太濃，但奶泡夠滑，淡淡的奶香加埋個心心拉花，賣相滿分。
打卡指數 ★★★★☆
美味指數 ★★★☆☆
紫薯香甜系列
另一個要推介的系列就係紫色甜品，當中包括紫薯雪花冰、紫薯脆脆波 同 紫薯 latte。紫色的魔力真係無法抵擋！紫羅蘭似的紫色令甜品變得浪漫起來，淡淡的紫薯香肯定令紫薯控愛不釋手。
▲ 紫薯雪花冰 $80
估唔到紫薯同雪花冰味道超夾！雪花冰很細滑，煉奶的甜度適中，入面仲有一粒粒好煙韌的年糕同杏仁片，多重口感。而且份量好多 2個人未必食得哂。
打卡指數 ★★★★☆
美味指數 ★★★★★
抵食指數 ★★★★☆
▲ 雪花冰很細滑，食落軟綿綿。
▲ 紫薯脆脆波 $60
呢個包外表香脆，入面塗滿牛油，睇落似港式脆豬包，本來覺得佢唔值 $60 ，幸好好多香甜的紫薯醬，令美味程度瞬間提升！
打卡指數 ★★★☆☆
美味指數 ★★★☆☆
抵食指數 ★★☆☆☆
▲ 脆脆波外表香脆，入面塗滿牛油。
▲ 紫薯 latte $30
濃濃的紫薯味，加上奶泡又夠細，上面仲要係由 Oppa 店長親自拉的聖誕樹圖案，完全係冬天最美好的熱飲。
打卡指數 ★★★★☆
美味指數 ★★★★☆
抵食指數 ★★★☆☆
▲ 韓式醬油炸雞 $110
甜品以外，銅鑼灣店仲有炸雞同拉麵賣。炸雞用去骨雞塊製作，混入煙韌的年糕，做宵夜小食一流！
打卡指數 ★★★☆☆
美味指數 ★★★★☆
抵食指數 ★★★★☆
環境舒適，空間感大
韓冰其實係一間係韓國擁有超過 20 間分店的刨冰連鎖店 Bing 的海外分店，而今次來到的是新開的香港第二分店。銅鑼灣店比海港城的大，裝修很簡單，以淺色系配淺木色，座位好寬敞，好有空間感。
▲ 裝飾以雪花做主題，門口的一排高桌好啱情侶 2人世界。
▲ 另外亦有一些長凳，可以俾三五知己相聚。
依莉詩點評
韓國的餐廳來到香港的定價往往都偏高，幸好呢間都唔算太夠，份量都算足，一杯雪花冰的份量可以兩個人 share，而且賣相精緻，單以相機食先已經贏晒。銅鑼灣店雖然係鬧市，但都幾難搵，平安夜同三五知己或者同情人嚟食甜品應該係幾好的選擇。
食店：韓冰 (36221310)
地址: 銅鑼灣勿地臣街1號時代廣場10樓1005B舖
