打機近年已變得越來越普及，但由於太過沉迷或有可能會影響到其他生活及學業，所以相信不少家長都不太喜歡自己的子女打機。通常一般家長大多都只會勸籲唔好玩太多，又或者索性拎走部機唔俾玩。不過最近日本就出現了一位非常老竇，並接二連三用大鎚扑爆阿仔的遊戲機，真係睇見都覺得心痛。
話說一位日本年青人最近購買了一部全新的 PS4 返屋企玩，而且更邀請了朋友仔一齊玩。不過唔知是否玩得太過興奮嘈到拆天，結果觸怒了其老竇，之後就睇見身穿熊本熊 T 恤的老竇嬲爆爆拎住個大鎚入阿仔間房，然後不問因由就起勢狂仆枱面上的 PS4，至於無奈的阿仔就只能企喺旁邊睇住慘劇發生，相信嗰種無助感應該非筆墨可以形容。
其實類似事件唔係第一次發生，原來早一個月前呢位老竇已曾經仆爆過阿仔部舊版 PS3，不過當時並非在房內仆爛，而是拔走電線後再將 PS3 搬出屋外「就地正法」，下下出盡力扑落去，就算執番條屍都好難救得番。只怪呢位阿仔並冇汲取教訓，未有好好保護新買返來的 PS4，下次如果想喺房打機，建議佢最好就鎖實房門勒。
來源：YouTube
