嚟到下集嘅 xmas 特集，繼戀人篇之後就係戀人未滿篇啦。今期 gashion 就教你點樣用兩招捉住女神嘅心啦！
第一招 － 自製心心 lens filter，製造心形散景！
小編本身呢，就係深水埗度自己買嘅，大約係 60蚊 左右啦一套 （黑色剪裁好嘅卡紙＋ 相機濾鏡 holder）。但其實得知，要自己整返個都唔係真係咁難姐～ 所以小編都嘗試自己整返個，然後覺得 ＝ ＝ 點解我要特登去買….
- 要準備嘅材料係 剪刀／界刀、黑色卡紙、膠紙／blu tack、你支鏡頭。
- 將你支鏡頭放係黑色卡紙上面，劃出鏡頭嘅size（erm，如無意外應該係個圓形嚟），剪出嚟。
- 係呢個圓形上面大約圓心位置畫個心（長度大約2cm左右）。
- 用膠紙／blu tack去固定已經剪裁好嘅黑色卡紙到鏡頭上面。
- 開到最大光圈，大約 F1.8 左右，靠近有光發出嘅物件（例如燈飾）就會見到心形散景嘅效果㗎啦！
第二招 － 拍攝 light painting、隱藏給您的專屬訊息！
咁呢，如果你睇片就知呢，片中個light painting係失敗嘅。（電腦效果後製）基於當時係拍攝場地都有好多人等緊，所以小編都唔好意思再試多幾次，想係度同各位讀者講聲對唔住！不過，失敗乃成功之母！所以都提醒各位讀者要做好功課，先去影light painting，如果唔係到時係女神面前失禮就唔好啦。
▲ 電腦效果 偽成功圖
宜家科技咁發達呢，其實都無咩特別材料要準備。但有樣嘢最好有呢就係閃光燈啦。如果要拍攝有人像係入面嘅光影攝影呢，就最好利用閃光燈嘅後廉同步，咁張相入面嘅人像就會清晰啲。
▲ 失敗作品
而光影攝影嘅 setting 就同頭先嘅心形散景相反，光圈就要調到最小，約係F22左右，ISO值要調到最低。快門就要因應你畫嘅信息要幾耐時間嚟決定，不過呢就快門時間越短，畫面就會越清晰。（但正常情況下都要 5-10秒時間）
另外呢，就重有2個小貼士。第一就係你嘅訊息要係 mirror image 嚟，咁樣係相片度呈現返出嚟先係我地正常見到嘅文字。第二就係當你移動個電筒嘅時候，佢嘅軌跡會全部被紀錄落嚟。所以寫完一個字就用手蓋住發光位置，或者就咁熄咗個電筒佢，然後再移動去寫第二個字。
For 女神們 － 買咩新衫，買一條新頸巾搞掂！
認真，今年冬天又凍又熱咁，完全減低曬我地購物嘅意欲！（就算你有幾多sale都吸引唔到我㗎 [手放在良心上] ) 買一條今年興嘅雙面頸巾，配合不同嘅穿搭方式，就有起碼三個唔同嘅造型！係咪好厲害先？
▲ 以上貼士因人而異～
