科技世界總是由新淘汰舊的，香港老士多亦被近年新派零食及雜貨店淘汰，尤其 759 這些活用社交媒體作宣傳，又開網店及支援各種新的電子貨幣交易，現代顧客購物實在方便不少。今次我依莉詩就嘗試走訪多間舊士多，他們不懂活用科技，最高科技的可能是收銀處的計數機及店內的電視機，不過有的是人情味。有沒有 Wire 民記得讀書時期用零用錢買零食的情景呢？
全港高租金下 只餘舊屋邨容身
世事在變，天氣在變，就在一月發出黃色暴雨的那一天，我走到南山邨這間依舊保留 70年代設計的舊式士多。兩個一巷之隔的舖位，一邊放著煙櫃、百事可樂汽水櫃，另一邊放滿經典零食，空間細小但應有盡有。財記士多幾乎同南山邨一同成長，1977年由大坑東邨搬到現址已經 36年，「士多到我已經第三代，由媽媽交俾我。接手廿年，除了星期日，工人放假要照顧媽媽，兩個仔都係外國，所以我都會係度開鋪，風雨不改。」鐵漢柔情可見原是司機的王老闆有他自己的故事。
那時雨下得很大，幾乎都沒有人流，王老闆神態自若地坐在摺櫈上，邊看鋪邊吃咖喱牛腩飯，就如平常一樣。「我地都係做學生哥生意，依家考試，又落雨生意係有 D 影響。記得南山邨以前有 7間士多，但近幾年連旁邊兩間都已拉閘了。」隨著超市、便利店的出現，生意亦愈來愈難做。「本邨買嘢嘅人唔多，依家新移民多咗，對面又有 OK便利店，好難講咩人情味，好彩我住係附近，每朝 5點開鋪，做到 10點，都算維到皮嘅。」可能專注做學生哥生意，店內的糖果非常多，當中有唔少似曾相識，除了蜜蜂糖、泡泡糖、爆炸糖，仲有奶片、朱古力醬等等。不過某部份已經換了包裝，甚至由另一些牌子代替了。當我問到將來有咩打算，王老闆坦言「邊有打算，做得幾耐得幾耐啦！」
多款懷舊零食已消失
離開南山邨，走到另一個老牌屋邨－彩虹邨。雖然嘉南士多只有廿幾年歷史，老闆娘說頂手前都是做士多的，所以裝修仍保留 70、80年代的模樣。門外除了零食還有唔少舊式扭蛋機，而店內的一邊放滿薯片、雪糕，另一邊是一排排的雪櫃放滿飲品，與一般士多無異。雨已經停下，又是放學時間，士多的生意源源不絕，不少學生都係鋪內流連。要係時代巨輪中仍然佔一席位，原來老闆娘入貨上都用了不少心思，「我地靠後生仔架啦！小朋友鍾意試新野，見到新款就會買，所以要入番 D 新款零食。」除了店內新款的零食，門口仲有一些白兔糖、沙嗲魚串等經典零食，老闆娘表示懷舊嘢都好多人搵，所以會繼續入貨。「不過好多懷舊的零食依家都無咗，例如眼鏡朱古力、一筒透明有好多種色的高士橡皮、細細包的太空糖，無咗都有 D 可惜。」
小額交易不利八達通 客改去超巿
面對超市同便利店的競爭，老闆娘坦言「前面有惠康、7仔無左學校就唔洗做！」通常男人同後生仔唔想因為買少少嘢而排隊，一次過買得多嘢的主婦同老人家多數去超市，所以煙、零食同飲品都係主要收入來源。不過有時就算便利店的飲品較貴，但會因為無得用八達通而唔係士多買。即使如此，老闆娘覺得「加八達通機好麻煩，我地 D 野咁濕碎，1蚊幾毫好難計。」一邊同我傾著，老闆娘一邊幫客人結帳，明明店內貨品眾多，但佢都可以超快速心算好，仲笑言「賣慣左，計得多自然就會入咗腦。小小的士多，雖然看來生意唔錯，但並沒有請伙記，「一來人工，二來 D 野好濕碎，所以都係兩公婆一腳踢。」問到前景，老闆娘坦言「呢度好彩領展唔要，唔係一早唔做了！我地賺 1蚊幾毫，搞得掂未算。」
▲舊式扭蛋機同遊戲機真係令人懷念！
▲估唔到仲有 Yes! 扭啊！
▲除了經典零食，我發現到有出前一丁味的薯片呢！
▲ 見到 D 小學生用水汽畫心心，陽光檸檬茶的廣告即刻係腦海浮現。
前舖後居，老闆童年的家就是舖
以前士多同屋邨總是形影不離，而舊區的士多，前舖後居，亦有另一番韻味。隨著重建步伐來到深水埗東京街，有 44年歷史的源興士多亦只剩下數個月的光景。由 1965年開始，林伯與 4位拍檔係街角做雜貨鋪，後來有製衣廠事頭出讓舖位，所以就在親戚幫忙下，買下鋪位，1971年搬到現址。店內的裝修除了 86年裝了一排玻璃櫃同酒櫃，不論門外的零食陳列架、百事可樂汽水櫃及 3盞 60年代的燈飾都與開業時沒有改變，一切都好像停留在舊時一樣。
相比起其他兩間士多，源興士多開店比較晏，十二點幾我經過的時候，林婆婆正忙著拉開外閘，整理貨物，只好待回再去。到我下晝再去的時候，婆婆要訓晏覺，已經由佢的兒子林生看鋪了。因為是前舖後居的關係，林生的童年都是在士多渡過。「記得以前一條街有好多間士多，但因為老豆唔俾買零食，所以阿嫲孭我去買，但明明自己鋪頭都有。」
▲店內分為左、中、右的格局，而後鋪就是以前居住的地方。
舊區要重建，小店生命在倒數
深水埗同屋邨有些不同，以前都是工廠，所以好多工人買酒同煙。「以前對面全部都係製衣廠，繁華好多，朝六晚十一生意都做唔完，75年左右旁邊係東京酒樓，D 工廠做尾牙或者收左工都會買支去茶樓嘆。」到80年之後超市興起，唯有減下價，一個月搵一款酒打折，做下街坊生意。「依家間唔中都有 D 同林婆婆差唔多大的舊街坊番嚟傾下計，不過好多都已經移咗民或者唔係度了，現在街坊流動性又高，好難維繫。」說到零食，以前到現在都有好大分別，「以前有 D 一塊塊散裝朱古力，叫格仔朱古力，放係個玻璃瓶，買 $1 就比一格你。」雖然元州邨起好後，多左 D小朋友經過，不過現在因為怕 10月前就走，所以零食櫃已經入得唔多貨了。好快香港又會少了一間老店。
▲ 門口 3盞 60年代的燈飾充滿懷舊的味道。
▲ 店前的陳列架都有車轆方便每日開鋪收鋪是移動，而前方更有由林伯自行製作的木腳填補地台與地面落差。
▲ 曬衣夾夾零食可說是當年最聰明的用法。
▲ 百事可樂汽水櫃算是每間舊士多必有的電器。
▲ 煙櫃的煙都放得唔多了。
▲這些酒辦依家有錢到未必買到。
▲店內沒有收銀機，心算唔到就要用算盤了。科技呀不是每個人都樂用，舊東西反為更上手
▲ 當年找師傅做木錢箱好容易，幾乎每間鋪頭都會有一個。
▲ 現在的貨品都是預先包裝好的，這個英國製造的磅亦是時候退役了。
重新體會「玩生活。樂科技」
依莉詩覺得，我們 unwire 網站以「玩生活。樂科技」作口號，其實這句話意思並不等於甚麼都要用最新推的科技，而是如何去活用科技去幫助生活而已。小小士多裡沒有 paywave 或八達通，收錢時靠算沒收銀機幫助，有的只有心算或算盤。找零錢時由「天花板」拉一個膠桶下來。門前亦沒有好像「奇趣天地」有最新的咭機打怪戰，不過有舊式彈波波、 Yes 咭或萬變咭抽，強逼改用新科技的話，反為他們會適應不來。沒活用最新科技是否就要被淘汰？ 非也，每人都有一套自己的生活方式，有人卻愛這種舊式人性味，不是冷冷的機器所能取代。這些士多亦沒有使用 Facebook 作宣傳，希望各位 wire 民把這個 post 幫忙在 FB 分享一下，讓更多人關注一下。
15種懷舊零食 新版 vs 舊版味道
依莉詩係四出尋找舊士多的同時，尋回唔少經典零食，但當中已經有不少已經換了包裝，甚至停產或由其他牌子頂上。依家就同大家睇下味道上有咩改變啦！
1) 沙爹魚串
扇形一大包的沙爹魚串對於 90後的我來說，包裝上沒有太大分別，但從嘉南士多老闆娘口中得知，原來 80年代的魚串放係大膠盒內，可以一串串獨立買，想食幾多串就買幾多，不過後來衛生問題所以改成現在的包裝方法。而我找到的同以前不太一樣，看來是日本零食的潮流令士多入貨都有所改變，由以前中式的魚圖案變成日式的字句，味道上魚串的質感無以前咁稔身，而且無咁辣同重味精。對於唔食辣的我反而覺得更好味，食完一串又一串。
▲ 舊包裝的魚串其實在一些賣泰式零食的鋪頭都仲可以搵到，不過係我今次訪問的 3間傳統士多都沒有賣了。
2) Nutella榛子巧克力醬
記得細個好鐘意係小食部買盒黑白色朱古力醬，打開後用白色膠棒，逐少逐少放入口食，個種甜甜地，似朱古力又唔係完全朱古力的味道好特別。我今次都搵到類似的盒仔榛子朱古力，可惜一打開發覺溶晒，而且只有黑色同無咗支捧，味道上比較濃同甜，食得多有 d 澀喉，睇嚟塗麵包食比較適合。
▲ 呢款比較似塗多士的大樽榛子朱古力醬，就咁食會太甜。
3) 爆炸糖
因為一套《低俗喜劇》，近排又興番爆炸糖，但唔知大家仲記唔記得以前爆炸糖係大包d， 一次一定食唔晒架呢？記得細個以為真係會爆炸，倒晒成包糖落堂阿哥張床度，結果…當然係俾我激到爆炸啦！
▲ 據財記士多的王老闆說以前的 Magic Pop 爆炸糖已經停產了，不過佢現在所賣的新牌子味道亦差不多。
▲ 「索勁 STRIKING 爆炸糖」可以話係新一代的爆炸糖，味道都差唔多，但一大包入面有 10小包，一次一包方便好多呢！
4) 檸檬金棗丹
說到經典一定唔少得有「鼻屎」之稱的檸檬金棗丹，雖然看似上一代的零食，但嘉南士多老闆娘話因為潤喉止咳，到依家都好受年青人歡迎。同事試過呢隻新款都話正呢！比起以前又細又黑的鼻屎，依家大粒咗同淺色咗，不過味道無咁濃烈，易入口好多。
5) 蜜蜂糖
黃色包裝的檸檬蜜糖大家一定食過，以前$1就有幾粒，可以同同學仔分。依家雖然換咗包裝，不過味道依舊，依然甜甜蜜蜜。
▲ 以前蜜蜂糖的包裝比較深色，中間同樣有大大個 Honey 字樣同蜜蜂做嘜頭。
6) 泡泡糖
以前呢隻糖多數係冒險樂園的夾糖機出現，好彩的話可以一次夾到 3、4粒架！講番粒糖，外面就甜甜地似可樂味，但食到入面就勁酸同好多泡泡，係就係幾刺激，不過小心界親條脷。
▲ 以前覺得好得意， d糖總係一樽樽放係度比人揀，財記士多的王老闆就話，佢地入貨個陣已經係咁，只係依家 d零食鋪鍾意用膠袋入好一包包賣咋！
7) 媽咪麵
「媽咪麵嘅藍毛毛演奏會開始啦！」呢句以前朝朝都聽到，但就係唔明點解公仔麵都可以生食。以前我最鍾意擲碎佢加埋最邪惡的味粉瘋狂 shake，一食就食幾包。依家個個都話唔健康，但細個就係有 quota 嘛！
8) 旺仔小饅頭
相比媽咪麵，旺仔小饅頭都算係健康的零食，以前病咗要戒口，食完藥先得一粒做獎勵架咋！果陣每一粒都係甜嘅！雖然外表不變，但依家食番就覺得味道好淡同乾，始終都係回憶的好。
9) Red Band 橡皮糖
以前一盒 Red Band 橡皮糖已經好滿足，青蛙、蝴蝶同蝸牛形狀，仲分別有 3種水果味，細個最鍾意揀紅色嚟食。不過講真佢口感亦比依家的橡皮糖煙韌同無乜甜味，除咗為咗童年回憶，應該無乜小朋友會買。
10) 叮叮糖
叮叮糖係少有的香港製造零食，據說以前師傅將麥芽糖煮溶後放涼，再拉出一條條又白又硬的糖並捲成餅狀，當有人買的時候就用鑿鑿碎，發出「叮叮」聲。不過依家的叮叮糖都唔會係街檔即整即賣了，賣到的都是預先包裝好的，比較衛生。
▲ 叮叮糖已經發展出好多唔同味道，我問財記士多的王老闆咩味最好食，佢就笑住同我講「隻隻味都好食，唔係點會賣丫」，不過問到最鍾意邊隻味，佢就細細聲咁話薑味，於是我就買咗包薑味，有 D 硬，不過又真係幾好食。
11) 奶片
奶片包裝好似一排排藥丸咁，食落粉粉地，好重奶味，而左面的更帶點香芋味，都算係兒時的健康零食之選。
12) 戒指糖
我對戒指糖真係又愛又恨，幾十卡的鑽戒套在手指上真係超靚，如果係同學仔送就更開心，不過粒鑽石又真係太甜太大粒，次次食勁耐都食唔完。不過原來戒指糖易融，供應商夏天會暫停出貨，所以今次我買到算幾好彩啦！
▲ 哎呀！唔通依家的戒指糖縮細咗？以前明明可以套係中指架！
13) 筆型啫喱條
筆型上面印有間尺刻度的啫喱條五顏六色，每隻色入面都有唔同水果味。以前覺得佢係啫喱，買到番屋企都會放入雪櫃，但其實放係室溫一樣係半透明滑嘟嘟的質感。記得以前仲有種汽水形狀，裝住汽水味，酸酸地幾好味，可惜依家搵唔番。
14) 咪高峰糖
同事一見到呢支咪就忍唔住唱起「星空裡萬物在轉…」。雖然我未聽過 (睇嚟零食都有 Generation Gap)，不過細個都有一支咁嘅咪，成日揸住扮明星。咪入面有幾粒水果糖，已經唔記得咩味，今次食番覺得，回憶永遠係最好嘅！
▲ 咪高峰糖又面的糖超少，買都係為咗個外殼。
15) 自製雪糕仔
一盒入面有幾個迷你雪糕筒同一支偽雪糕醬，每次拎一個雪糕筒擠 D 醬入去，整到個靚靚雪糕尖就會超有滿足感。但唔知點解，當我好興奮咁拎比 D 同事睇，佢地竟然話未見過。
依莉詩後感
作為一個 90後，士多的風光時代曾經同我擦身而過，小時候經過士多都會叫爸爸扭蛋，小學時為了一張 Twins 的 YES! 卡可以用晒 D 利是錢。然而領展的出現，屯門區的屋邨商場一個又一個的更替，再沒有大排檔，再沒有文具店，亦沒有了士多。經過今次的尋找舊式士多之旅，我先發現到原來香港還有一個個被遺忘的角落，那裹，每個人每日都重覆做自己的事，每日活在自己最自在的地方，樂天知命，無懼外界的改變。當然，以我的年紀，未去到說甚麼新不如舊，舊的一定最好，甚至乎我覺得日韓零食更合我口味，但偶然我還是會記起戒指糖的甜味。
(天恩按：我們 70-80後的「懷舊小食」有小許出入，我腦中的是牛仔片、可樂粉、細包裝尤魚、孖條、穿梭機雪條，抽的 Yes! 咭是周慧敏、劉小慧、四大天王、萬變咭係龍珠、聖鬥士… 但都要多謝依莉詩在大雨下走訪多天，為 wire 民帶來好文章)
