甜品可以說係女生的摯愛，不過甜品的味道絕對可以影響一日的心情。最近蛋糕連鎖店 Italian Tomato 邀請了來自日本的世界冠軍級名廚－五十嵐宏炮製 3 款限定蛋糕，更以 $79 親民價同步推出包括兩款皇者蛋糕的 Tea Set。面對呢種誘惑，我依莉詩又點可以唔去試呢？
名廚有幾猛料？
叫得名廚，五十嵐宏先生來歷當然唔野少，佢早係 1994年已經一鳴驚人，勇奪世界青年糕點大賽亞軍。之後亦獲獎無數，先後任職日本西洋銀座酒店及東京六星級的東方文華酒店的行政糕點主廚。而今次帶來的蛋糕就係佢係 2010年同時係世界最高級別糕點錦標賽獲得總冠軍及「最佳味覺項目」的參賽作品「Pixy」。
▲ 五十嵐宏入行25年，係甜品介早獲肯定。
PIXY 開心果脆慕絲蛋糕
貴為雙料冠軍作品，PIXY 開心果脆慕絲蛋糕以 100% 北海道牛乳製成幼滑忌廉，更以大師秘方令法國白朱古力乳化其中，口感細滑之餘散發濃郁奶香。中層的士多啤梨忌廉及士多啤梨啫喱酸酸甜甜，令層次更豐富。加埋面層的紅桑莓同開心果脆片作點綴令一切變得更完美。
售價：$298
好味指數 ★★★☆☆
抵食指數 ★★★★☆
PINK 玫瑰白桃慕絲蛋糕
同樣出自名廚之手，粉紅色的玫瑰白桃慕絲蛋糕俾馬卡龍包圍，加上白朱古力薄片同紅桑子做裝飾，單睇外表已經非常浪漫。味道上，由荔枝、紅桑子、玫瑰及白桃製成慕絲，散發淡淡花果香，內層的白桃慕絲加入原粒白桃，食落帶點蘋果酒味。配合埋蛋白同杏仁粉製成的餅底，多重口感。
售價：$298
好味指數 ★★★★☆
抵食指數 ★★★★★
ORKA 法國朱古力五重奏
朱古力五重奏選用 100%北海道牛乳、法國牛油及 64%法國朱古力製成。頂層的鏡面朱古力配搭內層的特製朱古力醬、可可脆餅、朱古力慕絲，餅底則由杏仁朱古力製成，5層口感各有特色，朱古力味濃郁又不膩，朱古力迷一定鍾意。
售價：$298
好味指數 ★★★★★
抵食指數 ★★★★★
$79 二人 Tea Set
唔係撞啱朋友生日，未必有機會食到原個蛋糕。幸好 Italian Tomato 同同期推出兩款二人 Tea Set，當中包括其中兩件五十嵐宏設計的蛋糕同 3 款鹹點，適合同好姊妹邊食 Tea ，邊傾心事。鹹點中的煙燻三文魚三重奏由煙燻三文魚配三文治，鬆軟易入口，而煙花頌由煙肉襯托流心蛋，一咬就有爆醬滋味。最後的車厘茄芝士杯，雖然細細粒，但芝士軟滑配上新鮮車厘茄，口感清新。
售價：$79
好味指數 ★★★★☆
抵食指數 ★★★★☆
依莉詩後感
好味的甜品絕對可以為好心情加分，依家用 $79 就可以食到有冠軍級蛋糕的 2人 Tea Set，絕對係好食 + 抵食之選。雖然 2 件冠軍級蛋糕 加 3 款鹹點的份量唔算太多，就連我呢個細食之人都可以一個人食晒成個餐，但價錢仍然親民。幾姊妹 shopping 行到攰，有個靜靜的環境，坐係度慢慢食、慢慢傾，諗起都夠 relax！至於蛋糕，可能我唔太食酸野，冠軍的開心果脆慕絲蛋糕反而唔太啱我口味，而我比較鍾意食比利時朱古力五重奏，朱古力層次分明，濃而不膩，回味無窮。
售賣地點：Italian Tomato Cake Shop、 Italian Tomato Cafe、夢見屋
日期：2016 年 2 月 15 日 至 5 月 15 日
