2016 年 第 73 屆就係早前已經完滿結束，有留意的話相信都知《復仇勇者》成為咗今屆金球獎嘅大嬴家，成功奪得劇情類最佳影片、最佳導演和最佳男主角三個獎項。正所謂「空穴來風，事必有因」，能夠成為金球獎大嬴家嘅《復仇勇者》當然唔係靠運氣啦！想知到底有咩咁吸引令佢成功做到大嬴家，就緊係要留意下文！
劇本不俗 唯情節推進較慢
故事講述係十九世紀，未被開發嘅美國西部危機四伏，路經此地經常受猛獸同印第安人襲擊。係一次任務中，探險家 Hugh Glass 聯同一眾皮草獵人團隊狩獵，結果受黑熊突襲至奄奄一息，而佢嘅團隊竟見錢眼開，棄他不顧，任佢係荒山野嶺等死。Hugh 身受重傷，被隊友 John Fitzgerald 所背叛，無論肉體還是心理上都受沉重傷害，但佢憑驚人意志力，加上他對妻兒嘅思念，奇蹟般活下來。經歷咗痛苦嘅荒野求存之後，Hugh 踏上佢嘅復仇之路。
初睇預告同簡介時，會以為「復仇」係 The Revenant 嘅主線情節；但男主角 Hugh 復仇畫面只係佔咗五分一時間。然而，雖然成套戲都被「復仇」呢個氛圍圍繞住，但電影將更多情節放係角色心理描寫，以及 Hugh 點樣係荒野求存，比過去一啲復仇電影走向驚悚片更為精明：里安納度係角色上有更好發揮空間展現演技，而且為復仇之路鋪排得更好﹑更豐富同更合理。不過咁樣變相情節推進稍為慢，對某部分觀眾而言會覺得沉悶。
懸疑音效配上細膩環境聲 感覺疑幻疑真
今次《復仇勇者》最攝人心魄嘅，其中之一就係佢嘅音效相當逼真細膩。由一開始 Hugh 去狩獵結果團隊被圍剿，到 Hugh 被背叛獨自在荒野求存以至到最後復仇，當中不乏動作﹑打鬥畫面，而後製團隊亦明顯無比音效製作嘅高難度打倒。小編睇嘅係全景聲版，最驚喜當然就係用廣角鏡頭拍景色時，配合埋相當逼真嘅環境聲，真係好似親臨其境咁啊！
延續一鏡到尾拍攝技巧 廣角影景氣勢磅礡
今次《復仇勇者》由 Alejandro González Iñárritu 執導，佢延續係 Birdman 時所用嘅拍攝技巧 – 一鏡到尾。對於情節較為沉重嘅戲而言，一鏡到尾有佢嘅好處：既可帶出相當嘅壓迫感，亦可以係鏡頭與鏡頭之間突然停下，令沉重嘅情節稍為停頓後再開始。而《復仇勇者》係呢個拍攝技巧上掌握非常好，鏡與鏡之間並唔會有切開故事情節嘅感覺出現。另外，今次拍攝亦用咗相當多嘅廣角鏡頭去拍攝景色，雪景﹑森林﹑荒野，出嚟效果好震撼，鍾意睇靚景的話就絕唔可以錯過！
里安充分演繹角色 選角亦見用心
里安納度所飾演嘅男主角 Hugh 係一個家庭觀念好重嘅探險家。不曉英文嘅佢，時不時就被 Tom Hardy 所飾演嘅 John 挑釁； John 之後更殺咗 Hugh 個仔，令到 Hugh 嘅仇恨到咗頂點。由一個唔想惹事端嘅到掙扎求存只為復仇，里安係角色上都掌握得唔錯，好戲更係有目共睹，相信事前準備唔少。而最驚喜係配角演員上，選角亦做得唔錯，尤其係 Tom Hardy ，為成套電影加分不少。
總結：今年必睇之選（怕血腥者除外）
無論係劇本﹑場景﹑音效同拍攝上，《復仇勇者》都處理得相當好。如果一定要挑剔的話，就一定會係里安納度飾演嘅 Hugh 點解可以次次都咁好彩死唔去，好似不死身咁（明明真人真事改編）！XD 總的來說呢部係幾值得推薦睇嘅電影，不過值得注意嘅係血腥場面唔少包括連重口味嘅小編都頂唔算的生食動物，以及雖則有血腥﹑暴力但佢情節走向心理驚悚嘅形式，有觀眾未必咁受落覺得悶，所以入場前就記得要衡量自己嘅接受程度啦！
評分：8.5/10
