你個 Facebook 有啲咩年紀的朋友呢？同齡的？ 定好似某人咁 Add 左啲女優做 Friend？最近港女喺 Facebook Follow 左個台灣婆婆，說真的，其實佢冇乜特別，唔係影相好靚，亦都唔係教煮飯，或講啲咩大道理，但次次睇完都覺得好溫暖，有時仲幾好笑。
呢位台灣婆婆個 Facebook 名叫「刑黃滿金（Gold）」，本來港女一直懷疑係佢孫仔幫佢開個 Facebook Account 整蠱佢，但睇多兩睇就發現婆婆樂在其中，反而似係婆婆玩返個孫轉頭！哈哈～
婆婆一個月前先出第一個 Post，一個月後的追蹤人數差不多快達 20 萬，仲多過 unwire 個 page，而且每個 post 都有萬幾個 Like，少極都有幾百個留言，engagement 指數高到一個點！！
有咁多人 Follow 婆婆個 Facebook，其實有咩睇呢？主軸就一定係婆婆同孫仔的互動啦！婆婆一日出幾個 post，有時就話「孫仔著完啲鞋亂咁放」，「天氣咁凍著穿窿褲」，「夜一夜都唔返屋企出去『鬼混』」，「咁大個都唔帶女朋友返黎俾阿嫲見下」，再加一句口頭禪「頭殼壞掉」，大家就最鍾意睇。其他有關婆婆的日常生活，例如今晚煮啲咩俾孫仔食，去廟裡拜拜，下雨天不好洗衫之類的，都獲網友一致讚好。
婆婆從來都唔會覆留言，（我懷疑佢其實睇唔睇到添），但網友都會毫不吝嗇，寫下他們的回應及感受。而且，難得的是，大家的留言都係正面，冇人會走去鬧個阿婆，反而會笑個孫仔，咁融洽的 Open Page 真係好少見。
有時睇婆婆個 Facebook，我覺得除左佢好錫個孫，掉返轉，個孫都好錫佢，又會買支自拍神棍俾阿嫲玩，又同佢拍片，仲成日同佢影相。而家啲後生仔有幾可會咁照顧上一輩，好多時又唔係一齊住，可能仲嫌佢煩。新年就黎到，老人家最鍾意熱熱鬧鬧，大家拜年的時候不妨跟他們多聊幾句，了解一下他們的近況啦～
