新年裝飾好似無乜卡通好影，原來因為悟空 Kitty 帶咗成班 Friend 去咗大鬧 香港 3D 奇幻世界，仲成功擊退咗海賊王，由 1 月 30 號至 8 月下旬來過奇幻三部曲。依家就等我依莉詩同 Summer 一齊帶大家睇下首部曲之中國神話啦！
Sanrio Characters 融入畫中
因為就到農曆新年同元宵節，所以首部曲以中國神話做主題。由悟空 Kitty 取西經開始，鐵扇 Kuromi、東海 Shinkaizoku、嫦娥 Melody 、牛朗布甸狗 同 后羿 XO 等 Sanrio Characters 亦會融入畫中，在 8 個分區中演繹不同的中國神話傳說。今次合共有 20多個影相位，感覺比上次海賊王更多。不過鍾意 Melody 同 Kuromi 的依莉詩就厭 Kitty 佔的比重比較多，其他卡通人物就只有 1 – 2 幅畫，如果專程入去影某一個卡通人物就可能唔夠喉。
▲ 係睇相之前都係要提提大家，如果怕無創意，唔知擺咩姿態可以參考 3D 畫旁的示範。
▲ 雖然每幅畫都有一個最佳拍攝位置，不過都要因應你支鏡同相機去自己就位先會影得好。或者出發前可以先睇睇我之前寫的攻略，咁就唔怕失準啦！
1) 西遊記區
入到戲肉，因為今年係猴年，Kitty 於是扮成馬騮精悟空同大家拜過早年。係西遊記區內悟空 Kitty 會同你一齊經歷大鬧天宮、穿梭五指山等經典情節。
▲ 悟空 Kitty 係蟠桃宴偷咗個大蟠桃俾你啊！面對咁吸引的蟠桃，你又夠唔夠膽係皇母娘娘背後食咗佢呢？
▲ 原來悟空 Kitty 真係偷食咗個蟠桃呀！快 D 同佢一齊逃跑啦！
▲ 跑得唔夠快添！紅孩兒踩住風火輛準備要捉你啦！
2) 東海龍王區
轉眼間去咗深海，東海 Shinkaizoku 正保護住佢支定海神針。睇嚟悟空 Kitty 仲未知道呢到有好嘢啵。
▲ 到底 Shinkaizoku 係咩卡通人物嚟？平時真係好少見呢！
3) 創世神話區
到達神話區，《盤古開天地》、《女媧補天》、《后羿射日》等神話映入眼簾。見住后羿 XO 瞄準太陽就想像到環境幾熱呢！
▲ 大氣層穿咗個窿呀！快 D 同女媧 Kitty 一齊補番啦！
▲ 原來係盤古初開的時候，布旬狗已經識用斧頭劈開座山架啦！
4) 古代愛情故事區
農曆新年之後好快就到情人節同元宵，如果未諗到節目可以去呢個區影耐 D 。你可以帶女神去見證一個個《牛郎織女》、《嫦娥奔月》、《祝英台與梁山伯》等可歌可泣的愛情故事。當中仲有月老 XO 同你地牽紅線添！
▲ 嫦娥 Melody 係月亮上面好寂寞啊！
▲ 係屋頂上望住牛郎布甸狗同織女馬卡龍相遇，超感人呢！
▲ 仲可以做老師教祝英台與梁山伯讀書。
5) 香港主題區
最後介紹的 3D 畫展區以香港做主題，維港、喜帖街等香港景點盡收眼底。不過可惜呢區一隻卡通人物都無，好似格格不入咁，我諗係為遊客而設的多。
▲ 坐上帆船就可以穿過維港啦！
▲以前的漁民就係利用 山板 將魚穫送上岸，充滿老香港情懷。
6) 立體互動
除了 3D 畫，呢班 Sanrio 家族成員仲會跳出畫框，「活生生」咁係立體區同你合照，鐵扇 Kuromi 咁得意，真係想攪實佢！
▲ 嫦娥 Melody 想你幫佢製藥落番地球啊！
▲ 鐵扇 Kuromi 竟然咁忍心將我吹到黐埋牆！
▲ 悟空 Kitty 打贏牛魔王呢一刻咁重要，又點可以唔影底呢一刻呢？
7) 元宵佳節遊戲
影完影兩手空空點得呢？元宵佳節區提供 4 個有獎攤位遊戲，可以玩遊戲贏 Sanrio 限量獎品。據說會有 Shinkaizoku 在水底揮動舞龍、 Kitty 同 Daniel 行花市點花燈過節、布甸狗 同 你轉動湯圓輪盤，一起製作湯圓 ，仲有 XO 以月老造型呈現在月老廟。可惜記招當日只係開咗一個攤位咋，易唔易玩，有咩獎品我地都未知呢。
▲ 呢個月老 XO 遊戲其實係掟彩虹，易唔易中真係要睇你運氣啦！
▲ 可惜記招當日只係開咗一個攤位咋，易唔易玩，有咩獎品我地都未知呢。
8) 期間限定店
玩完都係拎唔到獎品唔緊要，呢度有間小型限定店，雖然大部份精品係出面 Sanrio 都有，不過都可以順便望一望嘅。
▲ 呢個 tobag 係今次限量版，雖然唔明點解得 Kitty 款，不過都幾靚。
依莉詩：「點解 Kitty 佔咁大比重架？」
雖然 3D 畫好似已經唔興了，不過今次換成 Sanrio 卡通人物應該會吸引唔少粉絲入場。而且今次有成廿幾幅畫，比上次海賊王仲多。但唔知點解 Kitty 佔的比重比其他卡通人物多，大部份都係得 1 – 2 幅，如果係為某一個卡通人物去可能會失望。另外，我覺得香港主題區都可以加少少卡通元素，依家就好似有 D 格格不入咁。
奇幻三部曲
日期：
中國神話 — 2016年 1月30日 至 4月下旬
西方童話 — 2016年 4月下旬 至 6月上旬
希臘神話 — 2016年 6月上旬 至 8月下旬
地點：尖沙咀加連威老道96號希爾頓大廈1樓 香港 3D 奇幻世界
單次門票：$149/成人、$120/小童及長者 (週末及公眾假期)、$120/成人、$100/小童及長者 (星期一至五)
三部曲門票：$298/成人、$220/小童及長者
