由 2013 年獲得數碼港創意微型基金，到 2014 年成為數碼港培育公司，GoGoVan 喺呢兩年由一間只得五個創辦人嘅初創企業，發展到五個地區及國家，現時公司已有近 400 人。如此急促嘅擴張，好多時都會發生公司內部嘅問題，你以為「人多好辦事」？「人多好生事」就真！人愈多，你就愈難 make sure 大家嘅理念一致，亦會降低生產效率。創辦人之一嘅 Steven Lam 就研究有關新同事入職應灌輸嘅理念，特別花近一年時間與其餘幾位創辦人建立一套「公司文化」，好讓同事更了解公司核心價值。Steven 亦非常大方，同 unwire 讀者們分享咗 GoGoVan 嘅公司文化。
1．Dare to Venture（勇於嘗試）
Steven 成日將「創業家精神」（Entrepreneurial Spirit）掛喺口邊，呢個「公司文化」正正就係衝著「創業家精神」而來。Steven 同佢嘅 Partners 深信「冇野係唔得嘅！如果唔得都係自己唔得，唔係件事唔得」。佢認為如果冇嘗試過，就唔可以判斷事情嘅可行性；如果試咗真係唔得都唔好放棄住，佢哋會同員工一齊分享經驗，再另外搵方法改善。
2．No Bullshit（唔講廢話）
時間好寶貴，尤其係 Steven 成日周圍飛，所以真係要善用每分每秒。佢舉咗一個例子，就係好多時大家開會有大部份時間都用嚟「吹水」，只得最後 15 分鐘做實事，咁點解唔一開始就入正題呢？所以開會效率係 GoGoVan 其中一個重要嘅公司文化。
3．Have Fun（樂在其中）
好多 Startup 人都講過要做自己鍾意嘅野先投入到工作，Steven 對佢嘅同事都係一樣。如果同事發覺唔啱做就要出聲，佢就會 Assign 另一樣你有興趣嘅工作去做；如果都係唔得，咁果位同事就要諗下份工究竟係咪適合自己喇！除咗員工，Steven 都希望用家感受到「Have Fun」嘅重要性，所以佢就喺 GoGoVan App 嘅定位功能，以笑咪咪嘅熊仔表示位置，等用家喺用 App 嘅時候都可以開心吓。
4．No Evil（不做壞事）
創業最忌走火入魔，為咗達到目的而不擇手段會變得好危險！Steven 講到最後呢點嘅時候，首先利申：佢哋做嘅野係無辦法迎合所有人，而底線就係唔做壞事，唔 Judge，例如喺司機同乘客之間，做一個幫手嘅角色，目的係令大家開心，以回應「 Have Fun」。
要串連起呢 4 項公司文化，Steven 舉咗個例子：假設有間餐廳想同佢哋合作搞送外賣服務，Steven 就會話「好吖！試下先！唔試又點知 Work 唔 Work 呢？」然後就唔講廢話立即傾 Deal 喇，幾錢？點做？時期？到落實咗喇，呢個服務係咪令個客（包括餐廳、司機、叫外賣嘅客）都開心呢？最後，No Evil 就係指「我唔會走數，準時俾錢，咁就大家都開心。」
Steven 都承認，要全公司上下一致做到以上理念一 D 都唔易，因為大家對每件事都會有唔同睇法同判斷。佢希望喺新人入職嘅時候，俾佢哋了解多 D 公司文化，喺處理唔同情況嘅時候都可以用得著。
延伸閱讀：
手機 APP 改變 Call VAN 傳統！專訪年青人創業之路
