情人節向來都係搶錢日，今年仲要係星期日，大家都應該好頭痛諗緊去邊好，依家就等我介紹幾個免費入場的情人節活動俾大家，係就係可能人多 D ，但好過只係行街、睇戲同食飯嘛。
「拾物有情」PMQ有情工作坊
情人節可以一齊參加工作坊，整下小手工當然好，但兩個人加埋都洗唔少錢。而 PMQ元創方就準備咗幾個免費的小型工作坊俾大家體驗下。只要係 情 • 尋 • 墟場內尋找「情」字印花或完成指定任務，就可以免費參與有情工作坊，當中有「戀語」DIY環保袋工作坊，係環保袋上一筆一劃砌出你的心底話語，創造出每人各異的戀人私語，亦可以參加「Only Rose」手捏黏土玫瑰工作坊，親手用黏土製作一支獨一無二的玫瑰送給你的only one，又或者參加「連線」手繪咖啡杯，二人共同繪制咖啡杯與杯蓋，成為對方唯一連上的杯蓋。另外，現場仲有 Kissing Room 、創意展板 同 有情放映館，等你可以同情人表達滿滿愛意。
日期：2016年2月13日 ‑ 14日 (下午2時 ‑ 7時)
地點：PMQ 元創方 Marketplace & Courtyard
「情約花季」愉景灣千點心形燭光
愉景灣的白色教堂係唔少少女心目中的浪漫地標。而大白灣沙灘每年情人節晚更會燃起千點心形燭光，係對岸迪士尼的煙花映襯下，見證無數愛的宣言。今年愉景灣更以「情約花季」為主題，將海濱長廊幻化成花隧道，而愉景北鐘樓外更佈置成歐洲小花園，放設純白的鞦韆和二人單車，係打卡放閃的好地方。如果 2 月13 及14 日下午4 時至8 時到愉景北商場服務台，並出示已「讚好」香港愉景灣Facebook 專頁的手機或平板電腦畫面，更有機會得到心形愛情鎖，等你地默默許下承諾。
日期：2016年2月13日 ‑ 14日 (上午10時 ‑ 下午11時)
地點：愉景灣
「 Light Rose Garden」玫瑰燈海園
想置身首爾熱爆的玫瑰燈海園 Light Rose Garden 唔一定要飛去韓國。多達25,000朵LED白玫瑰花組成的玫瑰燈海園會係情人節同元宵節登陸香港，每晚6時亮燈，以怡人的草坪和醉人的維港作背景下，點亮戀人的愛之餘，綻放白色浪漫。
日期：2016年2月14日 ‑ 16日 (下午6時 ‑ 11時 )
地點：香港中西區海濱長廊 (中環段)
日期：2016年2月20日 ‑ 22日 (下午6時 ‑ 11時 )
地點：添馬公園 》香港金鐘夏慤道
圖片來源：Facebook@香港許願節 Hong Kong Well-wishing Festival
「誠心鎖願」香港許願節 2016
如果想過得中式一點，可以到林村一齊許個願。許願節唔單止有各款特色小食，例如大埔漁村秘製海產、傳統客家食品，更有傳統拋寶碟、祈福蓮花燈、萬家點燈賀添丁等活動。兩個人將寫有對方名字的掛鎖扣於鐵桿、橋欄或橋頭，讓天地見証摯 誠的愛情。
日期：2016年2月8日 ‑ 22日 (上午9時 ‑ 下午7時)
地點：林村許願廣場
「自由約」戶外藝術節目
野餐亦是一個好活動，攜帶預先準備的美味野餐食物和熱茶，坐係草地上欣賞香港管弦樂團銅管樂及敲擊樂組合，演繹多首精彩曲目，包括布拉姆斯、史特勞斯的波爾卡的舞曲、爵士樂曲與音樂劇的樂曲，輕鬆捨意。喜歡閱讀的朋友亦可以到「草原圖書閣」，係書堆中隨意選擇小說、旅遊、本地文化藝術等不同類型的書籍，於草地上享受閱讀樂。
日期：2016年2月14日 (下午2時 ‑ 7時)
地點：西九文化區
資料來源：Timable
