日日係公司對住個 Mon 鬼咁悶，想擺下植物又唔夠位，今日我依莉詩就去咗參加 SIEMENS x Ke-nap 的空氣草工作坊，打算畫幅靚畫，為工作枱添下生氣！
落手畫空氣草版畫
今次呢個工作坊大約要 2個鐘，話耐唔耐，不過對好耐無畫過畫的我嚟講諗到頭都爆。好彩導師 Joyce 比咗唔少提議，於是我決定畫兔仔，之後放棵草係佢個 pat pat 度，呵呵！
▲ 版畫主要用平時比較少接觸的塑膠彩，技巧方面同水彩差唔多，不過就可以一層一層將顏色蓋上面，有更多層次。
▲ 我畫的漸變色背景係咪好靚呢？
點解空氣草唔駛泥？
空氣草係一種附生植物，唔需要從泥土吸收養份，所以完成油畫就可以用 AA膠將空氣草貼係畫上面，成為畫的一部份。亦因為空氣草來自南美只靠少量陽光、空氣同水就能生存，所以每隔一兩日噴水落絨毛就得，好適合方係 office 就裝飾，令工作枱更有生氣！
▲ 空氣草每棵都唔同樣，好似話大大下會有花開架！
▲ 完成油畫就可以用 AA膠將空氣草貼係畫上面。
一切由油畫遇上空氣草開始
見呢個概念咁得意，所以係畫畫的時候同導師 Joyce 傾咗幾句。原來 Joyce 決定將空氣草放係油畫上面係因為 2014年 11月左右，有個朋友想同佢夾份擺市集，朋友賣空氣草，而佢賣油畫，不過後來覺得唔太有趣，所以就將兩者結合。後來在市集，有家長問佢會否搞 workshop，所以就決定由 freelancer 轉做全職創業。 Joyce 希望將植物融入日常生活，並透過作品帶人到另一個意境，帶給人快樂，發放正能量。
依莉詩：「美化辦公室好物！」
春天係花的季節，就算無得去郊外，係辦公室都想放下 D 植物仔，有番 D 生氣，做野都醒晨 D。奈何土地問題，就係連迷你盆景都放唔落，呢款空氣草版畫就啱晒。空氣草又唔洗點打理，畫畫的時候又可以放鬆自己，係唔錯的體驗啊！
▲ 我的傑作啊！有無讀者想要呢？(真心請 PM，哈哈)
