還記得《星球大戰七部曲：原力覺醒》去年上映之前，Sphero 就曾經推出過一款識行識走的 BB-8 遙控機械人，而且起初更一度賣斷市。雖然現時星戰的熱潮已慢慢減退，不過如果大家已經入手了這個機械人，其實亦有新元素可以玩，因為官方最近就透過更新加入了一項新功能，令到 BB-8 可以陪大家睇電視。
Sphero 昨日正式發佈了 BB-8 遙控機械人的更新，只需要在 iOS 或 Android 裝置上更新 BB-8 的控制應用程式，如此一來便會即時加入「陪睇電視」功能。至於在使用這項功能之前，建議大家最好先將 BB-8 放於充電底座上，以防無電或不知滾到哪裡。不過在此提醒大家一點，今次這項「陪睇電視」功能其實只能對應《星球大戰七部曲：原力覺醒》這齣電影，算是有點失色。
接著當電影播放時，BB-8 將會全程根據劇情做出不同的動作及發出聲音，比如當畫面上出現 Han Solo 及 Chewbacca 時，BB-8 便會變到好興奮；反之當它見到大反派 Kylo Ren 時則會變得恐懼。至於當在電影中見到自己時，則會 WE 嘩鬼叫變到勁瘋狂，雖然大家未必聽得明其旁述，但看到其各種不同反應已經十分有趣。
來源：The Wall Street Journal
