可愛的小黃鴨 B.Duck 最近就由澳門游到香港，係 V City 開設主題 Cafe，唔單止有萌爆造型咖喱飯，仲有 B.Duck 精品賣。身為屯門友的依莉詩當然第一時間去試食啦！
到處都係鴨鴨蹤影
望住 V City 間 Izumi Curry 由初初出薯蛋頭 Cafe 的時候大排長龍，到最近餐廳的食客寥寥可數就知係時候轉主題啦！估唔到今次輪到啱啱係澳門開完主題 Cafe 的 B.Duck 接管。同上次薯蛋頭 Cafe 一樣，店內的佈置相當用心。除了門口有大大隻廚師 B.Duck 坐陣，店中間仲有隻浸緊咖喱汁的 B.Duck，相當搞鬼。此外，牆上的裝飾、旗仔、枱面同餐墊都有 B.Duck 出沒，入到去完全被小黃鴨包圍。而且幾乎每一張枱都有一隻 B.Duck 公仔陪你食飯，就算要自拍都唔洗輪住影，非常貼心呢！
▲ 店內幾乎每一個角落都係 B.Duck 的蹤影，沾滿黃氣。
▲ 正中間的立體 B.Duck 更係亮點，入到去唔係唔影嘛？
▲ 梳化排滿 B.Duck 公仔，等你食飯都可以攬住佢。
▲ 4款唔同嘅餐墊好打耳架！不過粉絲們唔好係食飯前偷偷拎走啊！
▲ 杯墊同樣都有 4款，係咪好想即刻叫 4杯凍飲呢？
係咖喱中暢泳的 B.Duck
黃色鴨仔總帶俾人歡樂的感覺，或者係因為容易令人諗起細個沖涼的快樂時光吧！而今次的菜單大部份都係有湯或者汁，主角 B.Duck 就以不同的形態係食物中暢泳，俏皮可愛。
▲ 雞蛋煙肉沙律 $79
鴨形的蛋係沙律中間出現，配合紅色的車厘茄同煙肉、青綠色的蔬菜，色彩繽紛，就算揀飲選食的小朋友都無法抗拒。
▲ 白汁海鮮飯 $119
黃色的飯搓成立體的 B.Duck 浮係白汁中，加埋西蘭花同紅蘿蔔等配料，健康又開胃，最啱夏天食。
▲ 吉列豬扒配太陽蛋咖喱飯 $129
Izumi Curry 出名賣日式咖喱，B.Duck 又點會唔去咖喱上面游水呢！望住佢游到伸手伸腳，就知 D 咖喱好好味啦！
▲ 特製牛肉飯 $109
B.Duck 實在太貪玩啦！搞到自己成身都係牛肉汁，唔係個橙色嘴都唔認得係佢。牛肉中的味道甜甜地，非常開胃，西蘭花中和到牛腩的膩。我未試過食晒成個飯都仲想食架！
▲ 豚肉丼 $89
呢個 豚肉丼好可愛，白色的鴨 pat pat 係豚肉中間撐撐下，令我諗起迪迪尼個隻唐老鴨啊！
▲ 鮮果配窩夫 $49
甜品方面今次比較少，只有鮮果配窩夫一款。坦白講，外表上唔算吸引，鮮果亦只有一粒士多啤梨，幸好窩夫內脆外軟，加番唔少分。
▲ 巨峰梳打特飲 $35、芒果沙冰 $55
兩杯凍飲中最特別就係巨峰梳打上的黃色 B.Duck 沙冰，浮浮下相當可愛，不過佢好快會沉，要影相就快啦！至於芒果沙冰上的 B.Duck 係朱古力牌，一樣可愛。而重點就係叫凍飲會送 B.Duck 杯墊同攪攪捧，好吸引呢！
▲ 為左今次 B.Duck Cafe，餐廳特別訂製了 B.Duck 塑膠餐具同杯，只要購買任何主餐就可以加錢換購啦！
唔洗出市區掃 B.Duck 精品
餐廳外有一間細細地的 Pop-up Store，售賣各式各樣的 B.Duck 精品，食完飯的粉絲一定要去望下。不過 B.Duck 的精品其實係專門店都買到，唔算太稀有，如果唔係食飯，純粹為買精品就有更多地方可以選擇了。
▲ 餐廳外有一間細細地的 Pop-up Store，食完飯的粉絲一定要去望下。
▲ B.Duck 結婚公仔 ($698) 超得意，新朗隻手超短啊！
▲ 仲有好多唔同造型的 B.Duck 錢罌 ($268)，等小朋友訓練下儲錢的習慣。
▲ 呢兩個 B.Duck 書皮仔($368) 上面有隻毛毛 B.Duck ，係就係可愛，但落雨要小心 D ，唔好整濕啊！
▲ 望到呢對小朋友鴨鴨毛毛拖($138) 真係心心眼，仲送埋個袋添！
▲ 大少少的 Fans 可以揀呢系列的袋 (左$398、右 $298)，可愛又型格。
依莉詩：「B.Duck 帶比人好歡樂！」
B.Duck 係帶比人歡樂的卡通人物，一雙閃爍的大眼睛加埋肉呼呼的橙色厚唇，望到都已經想笑。今次無論店內的佈置定食物的裝飾都七彩繽紛，又有 B.Duck 公仔陪你食飯，入到去就好似番咗小時候一樣。食物的貌相相當可愛，一隻隻 B.Duck 係醬汁上游，好有夏日的氣息。同時醬汁同蔬菜非常開胃，好啱夏天食，不過性價比略嫌有點低，我食完個牛肉飯好似唔夠飽，如果係男仔可能要食兩個餐啊！
B.Duck Cafe by Izumi Curry
地點：屯門 V City (2016年 4月9日 起 為期 3個月)
尖沙咀 Mira Mall (2016年 4月9日 起 為期 3個月)
