馬場已經不再是喜愛賭博男性的專利，近年香港賽馬會不斷加入新元素，令跑馬地馬場成為了年輕人的新蒲點。 4 月 13、20 及 27 日，一連 3 周在快活谷 Happy Wednesday 晚上舉行 Digital Nights 派對，讓科技融入緊張刺激的賽馬體驗，4月27日更會首度上演韓國馬事會錦標，高水準賽事配搭新科技元素，新鮮刺激，不能錯過！而小妹依莉詩就率先參加了第一晚的 Digital Nights，現在就同大家分享一下當晚的盛況啦！
虛擬座騎 一嘗做騎師
黎到馬場見到騎師嘅英姿，我依莉詩都想一嘗做騎師嘅滋味添！要騎真馬就難啲，但好在有一個 VR 虛擬座騎，操作非常簡單，只要戴上 VR 裝置，坐上座騎不斷上下搖動，馬匹就會加速，畫面像真度極高，就好似親自策馬上陣咁，仲可以叫埋同行嘅朋友對決一下。不過可能因為我腳短，今次我快馬加鞭，最後都只得到第八名嘅佳績（全場都係得八隻馬）。
▲可以叫埋同行嘅朋友對決一下
▲操作非常簡單，只要戴上 VR 裝置，坐上座騎不斷上下搖動，馬匹就會加速
▲點解全場得我一隻馬嘅？哎呀原來我嚴重落後緊呀！
▲睇下！我得到第八名嘅佳績呀！
玩手機 GAME 都有機會中機票
唔想玩得咁大運動量？唔緊要！就算玩手機 GAME 都隨時可以贏雙人來回首爾機票！如果你自認有不凡嘅平衡力及爆發力，就可以黎到現場玩依個 Be a Star Jockey 遊戲，遊戲分開兩個關卡，只要最後取得指定分數，Selfie 一張就可以奪得指定級別相框，「些牙」俾朋友之餘，每個 Dight Night 晚上，張 Selfie 影得最好嘅參加者就獲得雙人來回首爾機票！
玩完 Be a Star Jockey 之後，仲可以到旁邊戴上 VR 裝置玩 「360o馬房睇真啲」，瞬間突破馬場禁區，全方位遊走馬房重地，了解馬匹訓練實況，話唔定睇真啲之後即刻有心水，可以贏返啲先走。
▲遊戲分開兩個關卡，挑戰平衡力及爆發力
▲嘩個馬房好大呀！掛住玩，俾人影咗相都唔知添..
▲睇下哥哥仔搵靚女 Selfie 幾開心！不過佢好似搵漏咗我，可能見我做緊嘢太忙啦
睇馬之餘 仲有勁歌熱舞助慶
話明係 Party，梗係要有音樂同勁舞啦！每一場賽事之間，舞台上都會有表演睇，雖然當日落住雨，但係都吸引唔少觀眾擔住遮睇 Show。表演包括充滿拉丁音樂風情嘅 Carnivale 拉丁樂隊 Live Band 演出，強勁音樂感染全場觀眾，好似去咗巴西嘉年華一樣。
聽完拉丁音樂，轉個頭又有一啲強勁嘅電子音樂節拍，原來係勁爆熱舞Show ，表演者著住一身勁有 Cyber Feel 嘅衣著隨著音樂起舞，貼合 Digital Nights 嘅主題呀！4月27日仲會有韓國頂級跳舞團體 Jinjo Crew 遠道蒞臨跑馬地馬場，K-Pop 發燒友一定唔可以錯過！
▲ 舞者令整晚氣氛推上高峰！
▲強勁音樂感染全場觀眾，好似去咗巴西嘉年華一樣
▲大家都玩得好奔放呀！
啤酒配韓風美食
派對狂歡當然要有啤酒美食，依排太陽的後裔咁 Hit， 美食亭都緊貼潮流加入多款港人熱愛的韓國美食。韓式炒年糕、烤牛肋骨等等的美食香氣充滿整個馬場。大家在邊嘆啤酒、邊睇馬之餘，更可以盡享當地美食，大快朵頤！
▲即叫即燒！香味離遠都聞到
▲推介牛肋骨！
依莉詩：「馬場原來唔只賽馬咁簡單！」
依莉詩發現入場除了賽馬之外，原來仲有好多野玩同野食，加埋 Live Music 同其他精彩玩意，簡直就係一個大Party，我依莉詩真係 High 足全晚，令我對入場完全改觀，約埋朋友一齊黎玩就最啱，向大家誠意推介！見到我玩得咁 High，讀者們係咪都想一齊玩呢！錯過左上星期 Digital Night 唔緊要，因為之後連續兩星期的快活谷都有 Digital Nights 活動，大家記得入場撞下我啊！
Digital Nights 活動
舉行日期： 4 月 13 日 / 4 月 20 日 / 4 月 27 日 (星期三)
地點: 跑馬地馬場
公眾席入場費：HK$10
詳情：http://happywednesday.hkjc.com/ch/parties-digital-intro.aspx
入場人士須年滿18歲。切勿沉迷賭博。
