正當大家仍然追求旗艦機之制，Sony 突然反樸歸真推出 Xperia X系列，而被譽為港女手機品牌的 SUGAR 都好似有類似領悟，推出以女性用家體驗為主的中低價手機 Sugar C7。 就等我依莉詩同大家介紹下啦！
不再寶石圍邊變低調
今次 Sugar C7 放棄咗用 SWAROVSKI 圍邊的港女形象，反而將 22 粒 SWAROVSKI 人工寶石鑲嵌係主鏡頭旁，變得更低調奢華。顏色方面，滑面的珍珠白機背襯香檳金邊框有 D 似 iPone 的設計，至於另一款的咖啡色機背採用絨面，十分特別。
▲ 機面的玻璃比較厚，開頭我拎上身以為係 dummy 啊！
▲ Sugar C7 有香檳金同咖啡金兩色，咖啡金的背面係絨面設計，十分特別。
▲ 鏡頭邊鑲嵌了 22 粒 SWAROVSKI 人工寶石，比之前用過百粒人工寶石圍邊更低調。
▲ 旁邊的設計看起來有 D 似 iPhone。
美肌自然有油畫
既然係女仔手機，就算今次 Sugar C7 唔係主打美肌功能都係要講下。今次的前置鏡頭有 800 萬像素，而主鏡頭有 1300 萬像素，都係一般手機的配備，不過不失。而今次的美肌模式自然咗，不過就有明顯的油畫。
▲ 今次的美肌模式，無論大眼、瘦面都自然咗。
▲不過前鏡拍攝有明顯的油畫。
硬件一般重軟件優化
SUGAR C7 硬件唔算太吸引，除可以支援雙 SIM 卡同插 128GB micro SD 比較可取，其他的 1.3GHz 4 核心處理器、32GB ROM、 3GB RAM 都唔太特別。不過，今次的重點似乎在於針對女性諗方便的心理，優化用戶的體驗。例如增加秒速解鎖功能，用唔同指纹解鎖或開啟不同手機程式，又或是用三隻手指向下掃截取多頁內容等。
▲ SUGAR C7 得 2500mAh ，而且唔可以拆電，重用量的女士未必啱用。
▲ SUGAR C7 支援雙 SIM 卡同插 128GB micro SD 。
▲ 好似 iPhone 咁，SUGAR C7 中間有一個鍵，用作指紋解鎖、返回鍵、Home 鍵等。
▲ 好似之前 samsung 的功能，只要用三隻手指向下掃就可以截取多頁內容，非常方便。
依莉詩：「軟件優化多於硬件配置」
今次 SUGAR C7 偏向入門級，所以硬件上沒有太大優點，而且放棄咗用 SWAROVSKI 圍邊的港女形象之後，手機變得低調，但設計沒有了特點。而另一原來賣點美肌功能佢依然係度，可惜鏡頭質素好似差咗，出面油畫。整體來說，呢個價錢部機不過不失，如果要揀我會選擇番已降價的 Sugar 2。
查詢：SUGAR
售價：$2,298
