依家嘅小朋友愈來愈矜貴，生日搞 Party 已經係基本，而且要愈特別愈好。如果可以係開 Party 的同時學到惜食的重要就更好啦！今日我依莉詩就介紹 2個搞生日會的好地方，等小朋友體驗一下農夫的辛勞吧！
城市中開 Green Birthday Party
咪以為要體驗有機耕作就一定要去郊外，其實銅鑼灣鬧市入面都一樣可以做小農夫。走到希慎的天台，一塊塊農圃盡現眼前，就好似城市中的綠洲。由 6月開始的星期六日，呢片綠洲就會提供俾小朋友搞生日 party，為他們慶祝之餘，更可從中學習環保意識。
魔術、工作坊學環保
雖然話以有機耕作做主題的生日 party，不過生日 party 最基本的影相佈置、表演節目、食物同禮物都一樣會有。係農圃中間就有一個由生物可降解塑料製造的環保汽球扭成的佈置，一個個色彩繽紛的汽球化身成小動物同巨型蔬果，十分可愛。駐場魔術師以綠色元素加入戲法之中，邊變魔術邊灌輸環保及健康飲食意識。另外，生日 party 可選配「T-Shirt再生環保袋工作坊」或「LEGO創意工作坊」。
▲ 魔術師同小朋友互動，佢地對變出嚟的粟米好珍惜呢！
▲ 「T-Shirt 再生環保袋工作坊」中，小朋友親手將舊衫重塑成環保袋。
▲ 而「LEGO 創意工作坊」就讓小朋友以 LEGO 發揮無限創意，砌出屬於自己的綠色小天地。
親力親為體驗有機耕作
一輪熱身過後就到體驗有機耕作的環節。導師首先會介紹農圃內的不同植物特性，之後再俾小朋友學習除草灌溉。
▲ 農圃內種植咗多種不同的植物。
▲ 小朋友圍住係度玩怕羞草，玩得好開心。
排排坐食到會
除咗綠色節目外，大人小朋友可以到希慎廣場 7/F 意大利餐廳 Shelter Italian Bar & Restaurant 享用 9款美食，當中包括薯仔沙拉、焗芝士火腿三文治、蕃茄羅勒葉芝士薄餅、經典肉醬意粉等等。
▲ 小朋友個個都食得津津有味。
▲ 最後，每位參加的小朋友都有一盆小盆栽作記念禮物添！
依莉詩後感
唔講都唔知，原來鬧市中間都有農圃。小朋友可以係呢度開生日 party 唔單止有禮物和歡樂，仲可以學會終身受用的環保知識，應該會好難忘。不過每個月得 2位小朋友可以係度搞 party，名額咁少，去到真係好好彩。
遠離市區 Gathering
係希慎天台搞 party 可能機會難得，不過清新地呢個農莊就幾時都歡迎你。除咗可以預約，就連 walk-in 都一樣可以參加工作坊，無論係咪生日都係一個親親大自然的好去處。
搭車搭船親親大自然
呢個農莊並唔係市區，不過交通都算方便，搭巴士到科技大學北門巴士站，沿樓梯往下走約15分鐘就到，不過果條 600幾級樓梯都好蝦人，又斜又多蚊，我行到一半都腳震了。所以如果星期六日我建議都係俾 30蚊，係西貢白沙灣碼頭搭街渡吧！
▲ 呢度影相位唔多，不過迷你荷蘭風車、白色的庭院枱凳、木韆鞦都好特別，加上冇乜人，點影都得。
▲ 有一隻兔公公同黑山羊等你餵，但眼見籠入面d食物已經多到佢唔願食。
親手 DIY 下午餐
山長水遠嚟度當然唔止係踩下草地就算，參加工作坊，有齊整鬆餅 + 花草茶 + 種薄荷葉 + 導賞 都係 $100/位，大小同價。不過有得玩、有得食，仲有得拎，呢個價錢好抵玩。如果係一班人預約仲可以揀整拉麵、整 pizza 等等添！
▲ 每張枱有個大膠箱，之後職員會分派發粉、牛油、糖、牛奶同提子乾，然後就要攪勻佢。
▲ 左面係人地的作品，右手面一舊舊先係我整的，係咪好易認呢？
▲ 草本茶用新鮮薄荷葉同香茅沖成，散發淡淡香氣。
▲ 整好鬆餅同草本茶就可以係旁邊的枱凳嘆下午茶，好寫意。
學習有機耕作種薄荷葉
焗緊鬆餅的同時，職員帶領大家到農圃，介紹有機耕作的特別，仲叫小朋友估下 D 羊便便係咩添！行完一圈，職員就教種植薄荷葉的技巧，揀好自己想要的薄荷葉仲可以拎咗番屋企種。
▲ 導賞團講解有機耕作，小朋友聽得好專心，不過我就覺得有 D 悶。
依莉詩後感
呢個農莊其實唔係好大，不過最好就係 walk-in 都可以參加工作坊，無論一班家長定一對情侶都會成團，加上又唔貴，可以好輕鬆咁過一日。
Green Birthday Party
日期：2016 年 6 月、9 月至 12 月 (12:30 – 15:30)
地點：銅鑼灣希慎廣場
對象：3-8 歲小朋友
人數：派對人數最少 20 人(其中最少 6 位為成人陪同)
查詢：2505 4005
Nature’s Harvest 清新地
開放時間：周二至日，上午9:00至 下午5:00 (逢周一休息)
地址：西貢白水碗 D.D.227
查詢：2723 3126
