各位寵物小精靈訓練員又係時候出動喇，大家等咗好耐的 Pokemon Go 終於都正式上架，如果各位訓練員係用 Android 的話，就只要安裝 APK 就可以玩到，至於iOS 方面就要澳洲 Apple ID 先玩得喇。雖然，好多人之前都對呢隻 Game 有好大期望。除咗以寵物小精靈作題材之外，同時加入 GPS 同 AR 技術，類似之前 Ingress 呢款手遊咁，而家就等辛尼同大家一齊出發捉比卡超喇！
短片介紹 :
（請耐心等候 Loading..）
自訂角色個樣唔夠多
好多時玩 Online Game 有得自訂角色外貌都好重要，等大家玩既時候可以更投入，亦都唔會出街撞口撞面都係同一個樣。Pokemon Go 入面雖然都有類似的外觀設定系統，但無得揀小智或者小霞就已經有點失色，加上自由度亦唔夠高，除了一般的膚色、眼睛顏色、髮色、服裝顏色可以改變之外，就連最基本的髮型都未有得更換，而且服裝選擇亦都當少，呢方面就有少少失望。
精靈球唔一定要課金先有
今次 Pokemon Go 以第一代寵物小精靈為藍本，因此現時只會有 151 種寵物。要捉寵物當然要用到精靈球，只要對住寵物用手指掃個精靈球出去就得，當然角度同力度大家就要嘗試一下，部份寵物好似比比鳥咁識飛，要求的技巧一定比捉毛毛蟲高，而且部份寵物就算捉亦有機會出現逃脫的情況。至於精靈球入手方面，好在唔一定要課金先有，大家在街上都會見到不同的 Check Point，只要入去轉一轉，都可以收集到不同數量的精靈球，有時更有機會出現寵物蛋或其他道具添。
要 Level 5 先入到道場
有玩過 NDS 平台上的寵物小精靈，遊戲的精髓就是對戰系統，但之前睇過宣傳片，就已經發現到當中缺少了即時的對戰功能，令到成隻 Game 的趣味性減少好多。咁大家收集到的小精靈可以點用？咁就要係街度搵唔同的道場，不過要入道場大家就要先升到 Level 5，可惜到目前為止小編仍然只升到 Level 4。根據資料見到，當大家可以進入道場之後，只要打敗駐守道場的小精靈，就可以從三大陣型之中選擇，再派自己的小精靈作為駐守，隨住擊敗越多小精靈賺取越多經驗值，就可以派更多小精靈駐守，從而獲得更多經驗值。
進化要捉完再捉再捉
暫時小編手上捉到的都是未進化的小精靈，咁究竟車厘龜要點先可以進化到卡美龜再到水箭龜呢？咁就要靠大家的運氣同耐性喇，因為各種寵物，都會有專屬的 Candy（糖果？），第一次進化就必需集齊 50 粒同一款的 Candy，而每次成功捕捉到一隻，都可以獲得一定數量的 Candy。另外，將重複的寵物賣出亦都可以獲得 1 個 Candy。為了測試進化，小編幾經辛苦先收集夠 50 個 Candy，將手上的波音蝠進化為大口蝠。
孵蛋要靠行得多
大家在收集精靈球的途中，有機會同時收集到各種寵物蛋，要孵蛋就先要將蛋放入孵蛋器，再累積至指定的距離就可以獲得新寵物，當然需要距離越遠的寵物蛋，相對上會較容易獲得較強勁的寵物。
搭電車玩其實好著數
由於 Pokemon Go 主要是靠大家去到不同地方，所以去的地方越多，理論上越高機會捕捉到不同的寵物，但點先可以用最少「腳骨力」去最多地方呢。小編就試過，其實搭車玩係最著數，因為車會不停移動，大家只要留意住熒幕的不同地點，就可以輕鬆收集到更多精靈球。其中電車的移動速度較慢，可以成功收集精靈球或遇到寵物的機會較高，至於地鐵就於 GPS 訊號接收較差加上移動速度快，基本上是沒有成效。
辛尼評語：欠缺對戰元素較單調
小編起初對 Pokemon Go 確實有很大的期望，始終搬到落電話成為手遊，再結合 GPS 同 AR 技術會令到隻 Game 變得更真實好玩。不過初步試玩後，一開始無得揀做小智或者小霞就已經失敗，覺得單單只有一般的捉寵同搜集精靈球的元素較單調，雖然有道場系統，但未必所有玩家附近都會有道場的存在，如果之後加入即時對戰就會令隻 Game 更完善好玩。
