細個打機除咗玩《寵物小精靈》，港女仲好鍾意玩《牧場物語》㗎！我仲好記得嗰陣放緊暑假，港女同細妹會分工合作，一個睇住攻略，一個控制遊戲角色。遊戲入面要種菜，養馬養牛養雞，釣魚，仲要入城招呼街坊同小精靈，勁多嘢做，一玩就幾個鐘！但亦因為咁，好容易就消磨到啲時間，暑假過得好快。
港女而家大個咗就好少打機喇，不過其實真係有舖癮，成日想搵啲植物種下。以前讀中學嗰陣，學校會俾啲種子你拎返屋企，試過種花、種蕃茄仔。嗰時喺無人幫忙嘅情況下，都真係種到老師要求嘅結果。但自從開始返工，就種乜都死（真係連仙人掌同多肉植物都死），真係唔知係我打理得唔好定係咩原因啦，加上留係屋企嘅時間極少，搞到我都少咗種嘢。
不過，當最近港女去咗訪問一間搞高科技養殖場嘅 Startup 之後，就重新燃起我做「小農女」嘅慾望喇（笑）。港女做完嘢，就上網搵下啲有關 歸隱田園 高科技耕作嘅資料，竟然俾我發現美國有人做左個 FarmBot 「機械人」出黎！播種、淋水、除草，全自動化不特止，佢呢個 DIY FarmBot 仲連接一個軟件平台，俾你可以遙距控制，係「精準農業」（Precise Agriculture）的入門版，俾新手一試自給自足的樂趣，而且 FarmBot 仲係 OpenSource 架添，功能好彈性。
FarmBot 軟件個介面真係好似以前玩《牧場物語》/ Facebook 種菜 Game 咁，揀好每一格種咩，佢就會自動幫你播種、淋水、施肥，你就坐享其成。可惜吖，港女想做靠呢個 FarmBot 做「小農女」都唔得呀，哪有地？人地美國就話屋企外面有個大花園啫，我屋企… 不要再說了！
但講真，港女鍾意種嘢，其實唔多唔少都係因為鍾意親力親為，可以消磨時間。一路照顧住佢，睇住佢由一粒種子，到發芽、長高、長葉、開花、結果，就好似睇住自己啲仔女長大咁，好治癒。如果個 Bot 可以取代人手，就達唔到我想要效果啦。不過如果有機會，港女都想一嚐做「小農女」嘅滋味，唔知水哥會唔會去實測呢部 FarmBot 呢，叫佢預埋我先（奸笑）！
