「我職業係一名醫生，我自己都有玩 Pokemon GO的 ..」，沒想到有醫生讀者因為這大熱遊戲來信，商討後我們同意在這裡刊出跟各位 wire 民分享
聲明：以下文字不代表本網立場，純屬讀者的個人意見，也與本網站無關。
今次寫呢篇野就係想申下，希望貴網可以登出黎(有勞執下我啲錯字啦)。
先利申，我職業係一名醫生，我自己都有玩 Pokemon GO的，但自已向來都唔係成日打機既。典解我都有玩Pokemon Go？是咁的，我呢種職業，每日可以休息既時間少之又少，每日係醫院度都做到Hihi咁，同事間既話題都係離唔開車呀，HiFi呀，女女呀咁；有時都會四圍睇下Ｄ科技資訊野，就好似貴網unwire咁，睇下手機呀Gadget有咩特別野買咁囉，唔係真係同同事間無咩話題可言。
到底隻Game典解全球瘋狂咁玩，我自己初時都睇唔透，但玩左一兩日後，終於可以突破盲腸喇！可以好似套動畫咁係現實世界中捉精靈，就算唔係忠實Fans，見到成隻悉尼老鼠彈左出黎，係現實世界同遊戲世界相結合咁有趣，都實會玩下試下啦！
不過呢隻Game最吸引我玩既唔係個玩法，老實講老屎忽年代既Gameboy版Pokemon仲好玩過佢N倍；佢之所以咁多人玩，相信佢係將童年既夢想實現，前晚本來同同事坐車去食宵夜，途徑公園就看到成班男女老幼面部發光既喪屍係度遊走，攪咩呀？我同事就話佢地玩緊Pokemon Go啦，我好奇落車睇下佢地，發覺佢地年齡層其實很廣，小朋友、老人家好似無隔膜咁，一齊傾一齊玩，行下又見到兩個中坑，睇服飾應該係地盤佬黎，聽到佢地話：「唉成鬼日捉黎捉去都係呢隻紫色蝙蝠，點攪」，才發現這遊戲不一定是 Fans 才會玩，很多人本身唔識 Pokemon 既人都會著迷，當晚都發現到公園既人都係亂叫啲名，能成功說出小精靈既中文名真係無幾個，呢種人與人之間既交流，先係遊戲最好玩既野，亦即係核心價值！
不過近排係Facebook上每日都見到成大批Pokemon Go既野係咁洗版，每次有咩熱潮香港人就係咁架啦，都見怪不怪；呢個時候就總有一班道德L會走出黎，企係道德高地咁批評跟風既人呢樣果樣，仲話玩Pokemon Go既人係白痴無腦，廢青，宅男等等，乜唔玩既人就係有腦天才，係青年才駿架喇？
仲有批左膠，又出黎話有時間玩遊戲就唔會關心政治、奴性重等等，咩難聽到極既說話都有。你唔鐘意Pokemon Go呢隻Game唔係問題，但你又唔去了解下為何有呢個潮流，又唔去睇下遊戲帶動到既人與人間溝通，就去批評這個批評那個，未免太過唔公平啦！好心你地咪再做鍵盤戰士啦，一隻手機Game可以係世界大熱必定有佢既原因，走出黎，自己去感受下去睇下，其實咩年齡層，唔同職業既玩家都大有人在，唔好再將我地亂標籤！
有人仲將 facebook 洗版既責任，遷怒係我地玩家身上。呢樣野我非常之唔同意，各大傳媒不停報導又關我地咩事呢？無論是外地或是本地傳媒，由Pokemon Go快要推出至推出後，每天各大媒體好似上晒身咁日日瘋狂咁報導，佢地跟對隻Game係一知半解咁，仲無聊到直播四圍行咁捉精靈……有咩好睇呢又？
呢類型資訊對於我來說實在無咩價值，甚至發現到劣幣軀良幣，真正有用既心得技巧好難先搵到。例如之前每次Apple有野出果陣，Facebook都會被洗版架啦，唔通又賴Apple用戶咩？你地應該去搵亂報野既媒體投訴而唔係我地玩家呀！
不過對於係日常生活入面滋擾到人地同埋個人安全性既問題，我就覺得玩家們係應該要注意一下既，有時見到有人話去差館之類既政府機構度玩，呢樣野我就覺得真心膠喇，你要玩就自己玩算啦，唔好影響到人地丫嘛，希望大家都可以玩得自律啲啦！
相關報導 :
http://unwire.hk/2016/07/25/hk-beginner-pokemon-go-guide/tips-2/
簡單投準精靈球密技教學:(請耐心等候)
