今次我地 unwire 嘅 Duncan 去了珠海賽車場參加咗 BlackArts Racing （玄鋒賽車）的賽車駕駛體驗，仲親身試揸 Formula Renault 2.0 添！究竟係賽道上揸住方程式係咩感覺，易唔易上手？睇埋落去大家就會知道！
BlackArts Racing 玄鋒車隊簡介
由 4 位熱愛賽車運動的拍檔於 2015 年成立的 BlackArts Racing 是一間香港註冊的公司，營運總部設於廣東珠海的珠海國際賽車場（ZIC），學校由經驗豐富的賽車教練和技工組成，提供高級比賽服務。首席導師是亞洲雷諾方程式錦標賽得主－Pete Olson。同樣在名冊內的還有本季和上季 AFR 系列賽冠軍－ Josh Burdon 及 Dan Wells。賽車團隊每位成員擁有多年賽車經驗，而且大部分人仍然積極參與賽車活動。玄峰賽車提供包括：賽車引擎結構、賽車前準備、賽車儲存及賽車學校教育，由初學者至經驗豐富車手均適合參加。
試駕車款 Formula Renault 2.0 / Volkswagen Scirocco R Cup
賽車車款方面，BlackArts Racing 車隊提供了 Formula Renault 2.0 （2004 / 2013 款式）方程式賽車及 Volkswagen Scirocco R Cup Touring Cars 賽車選擇。Formula Renault 2.0 2004 和 2013 年款其實就是 Class B 和 Class A 型號，前者採用 Renault 的 1998cc F4R FRS 直4 16 Value 中置引擎 RWD 後輪驅動，6 前速 Dog clutch 波箱，最大馬力 192匹 @6500rpm，最大扭力 220Nm@ 5500轉，0 to 100 mph (160 km/h) 只需 4.85 秒！而 Class A 的新款 Formula Renault 2.0 同樣配備 1998cc 的 F4R 832 型 4 氣缸 16 閥引擎後輪驅動，Sadev 7-speed sequential 撥片式波箱，最大馬力增加至 210匹 @ 7500rpm，最大扭力 220Nm@7500 轉。兩者均採用了碳纖維外殼及車架製造，重量分別只有 490kg（Class B） 和 506kg（Class A），車身重量比起 660cc 的 K-Car 仲要輕，難怪擁有如此強勁的加速力了。
Scirocco R Cup Touring 賽車
另一方面，Volkswagen Scirocco R Cup 賽車則配備了直四 2.0 TSI 渦輪增壓引擎，前置引擎前輪驅動、最大馬力為 235匹 @ 6000rpm、最大扭力為 275Nm @ 3000rpm，加上 6 速 DSG 雙離合器變速波箱，0 至 100 只需 6秒。另外，Scirocco R Cup 的底盤特別 load 低了 10mm，配備獨立可調較賽車懸掛系統，硬朗的此外它亦加入 XDS 電子差速鎖在 ESP（Electronic Stabilisation Program） 電子穩定系統消除行駛時的牽引力損耗，加上車箱已把一切不必要的東西拆除並加入防滾架、賽車桶座及滅火裝備等，基本上呢部 Scirocco 已經可以立即是符合賽車規格，隨時可以落場比賽。
賽車保護裝備一覽
試車影片:
好刺激! 落車腳都軟
因為 Duncan 之前從未接觸賽車，一到達珠海賽車場就特別安排坐上剛剛加盟 BlackArts Racing Team 嘅本季 AFR（Asia Formula Renault）亞洲雷諾方程式系列賽冠軍車手 Josh Burdon 駕駛嘅 VW Scirocco R Cup 兜咗幾個圈，佢再三吩咐我要留意 3 樣野： 1. 幾時落 Brake、2. 落幾重 brake、3. 幾時出彎比油。成為最近的觀眾，睇住職業車手一舉一動－－例如：佢揸車時的冷靜從容、入彎佢手軑的準繩度、加速、剎車的判斷力和決斷力－－已經叫人極之興奮！
無可比擬的加速感
接受基本訓練之後終於有機會到 Duncan 落場！當一按下 Engine Start 開始一刻強勁的引擎聲便從後方沿沿不絕咁傳來，極硬的油門亦是從來未曾在街車之中感受過。不說不知原來 Formula Renault 2.0 配備的 Dog-clutch box 仍然設有離合器（極力子），不過就只會在 N 波轉 1 波才會用到，之後的轉波動作只需直接使用波棍進行拉/推便可完成。雖然小編多年來只是個 Family car 安全駕駛者，但亦忍不住想試試 Formula 的加速力究竟有幾利害！
一出 Pit 即以「地台油」加速到著紅燈先轉波，呢部 Formula Renault 2.0 的加速力的確唔係講笑，近 200 匹馬力推動只有 500kg 重量的車身，超強勁嘅加速力加埋貼地感真係好難有普通街車可以相比，超低重心的推背感比起飛機起飛仲要強得多，果種引擎咆哮聲加上瘋狂的加速力真係令人熱血沸騰，只要是喜歡揸車的朋友一定會愛上呢個速度感！
當然有咁強嘅加速力，又點可以無相匹配嘅制動呢？Formula 的剎車腳制感覺亦是非常的硬淨，完全唔似一般私家車有大量虛位而且仲係好軟淋淋的感覺，方程式賽車嘅 Brake 就係好直接，要好大力踩先至有明顯減速的感覺，按教練所講剎車就係要一腳「伸」落去先做到 Hard Brake 效果。
不容出錯！越高速越要冷靜
老實講 Duncan 只係一個攞左十幾年牌，平時都只係揸開私家車同電單車的安全駕駛者，當身邊的同事、親人一聽到話要試揸 Formula 大家嘅反應都係「咁危險！你識咩？得唔得架你？」，其實小編知道要試揸方程式都即刻呆左一呆，諗諗自己究竟手車唔知得唔得呢… 唔單止大家，就連小編在內係未曾接觸 Formula 賽車之前，聽到都覺得危險。
但經小編親自落場之後卻發現完全是另一回事，雖然方程式車速最高可以接近 200Km/h，不過由於賽車場並非街道，賽道兩旁都是草地，而草地以外尚有碎石地 ，再有好一段距離才是以車胎築成的護欄，所以即使車速比在路面高得多，小編仍然覺得十分安全，因為唔會好似係街咁要擔心對頭車、假日司機、亂過馬路的行人又或者係轉紅燈等等，可以盡情咁以地台油加速同埋高速入彎。
第一次過賽道對於每個彎的認識未夠深刻，當然要抱著安全第一的宗旨，頭幾個彎只係敢用比正常車速高少少的速度過彎了解一下 Slick tire 的咬地能力和賽車的加速力。過了頭兩圈開始對 Renault Formula 2.0 的加速、剎車及引擎轉數的輸出熟悉一點之後，慢慢便對攻彎多了一份信心。雖然對於一些髮夾彎覺得較難應付之外，其實角度大於 90 度的彎位亦要非常小心處理，因為稍一不慎可能會因車速太高而導致連鎖效應出錯，入彎速度太慢又會白白浪費時間等待引擎轉數重新回升，影響成績。
其實 Duncan 由穿上賽車防火衣一刻開始便未停過流汗，雖然太陽不算猛氣溫也只有約 30 度左右，不過還是感覺到相當侷促，再加上戴住防火面罩、保護頭、頸的裝置 HANS 及大約 1.5 kg 的頭盔，還未坐入駕駛席基本上已經由頭濕到腳… 當開車之後，背後引擎傳來的熱力更令小編加倍「大汗疊細汗」！對於從未落場賽車的人來說，單是穿著賽車衫及保護裝置可能已經是一個很大的體能挑戰。
雖然小編也是個經常運動、踢波、游水、跑步的人，但當試揸完 Formula 之後，體力消耗比想像之中大得多。除了因為天氣熱，在車箱中著住厚厚的防火衣令身體流失大量水份外，戴住頭盔的頭部在加速、減速、轉向時所承受的大約 1.5-2G 的重力，亦令人倍覺疲累。同時因為需要高度集中精神操控高速行駛的賽車，亦相當疲倦，一落車就有點體力透支的感覺，完全沒有想過自己的體力不足以應付這項運動。建議有興趣的朋友一定要練好心肺功能、頸部及上半身的肌肉才會玩得更加痛快！
改善駕駛技術 賽後檢討 Data Analysis
小編在試車期間，在錶板上只能看到引擎轉速和波段，一直看不到行駛中的速度，當然亦不會知道自己的圈速，但原來小編試車時的表現原來都被車上的黑盒記錄得一清二楚，這個系統主要是用來訓練車手，以檢討他們練習時的表現。一個新手揸成點，主要都係睇最快圈速同埋極速呢兩個數字。
賽後 Josh 特別和小編分析了一次表現，利用 Longitudinal Force 綜向力、Engine RPM、Throttle position、Front Brake Pressure 及 Reference time loss 來進行比較。由圖可見大家不難發現 Josh 的表現全部都在小編之上（不意外～笑） 。無論是引起轉速（代表速度）、油門加速力（Josh 的綠線頂代表地台油，而小編只是穩定的在其 80% 左右）、剎車力量（雖然小編剎車的力量只得 Josh 的一半，但若果揸街車黎講已經會將車內的雜物 dup 到飛晒落地嘅程度），而最後的一項就是 Josh 拋離小編的時間（越來越遠~）。
雖然 Duncan 自覺在大直路極速應該超過 200km/h，不過原來實際上小編的極速只得 198km/h，而最佳圈速則是 1 分 58 秒。Josh 說以一個第一次落場的人來說表現已算不錯，而他的極速和最佳圈速則是 203km/h 和 1 分 35 秒，職業車手表現真的非常利害！
小編很好奇問了 Josh 為甚麼錶板上不顯示車速，他指出不少車手會因為看到車速太快而害怕。作為一個職業車手，引擎轉數和 Engine 的聲音比起看到速度錶更加重要。這點小編亦非常贊成，其實只要留意一下跑車的轉數錶比速度錶處於更當眼的位置，不就證明了 Josh 的意見嗎？
至於試駕 Scirocco R Cup 賽車，最初以為加速力會比 Formula Renault 2.0 弱好多，不過相信是因為波箱經過調較，加上軚波操作的 DSG 波箱反應快，超過 230匹馬力的它加速感卻是出奇地爽，絕對唔會覺得冇力。而且它屬於前輪驅動的車種，所以對於一般揸開街車的人黎講，一定會更加容易適應前輪車的推頭慣性。不過配上 Racing Tire後過彎時，轉向指向性已經算非常高，對於新手來說肯定比方程式較易上手，絕對是入門級賽車的好選擇。另外 Scirocco R Cup 的賽車硬避震，比起一般街車的原廠避震在過彎時的穩定性亦更有信心，若果大家覺得一開始就玩 Formula Renault 2.0 太激的話，不妨可以先試吓 Touring Car 房車，駕駛體驗應該會更加理想！
BlackArts Racing
查詢: 6854 0992 / blackartsracing.com
