啱啱呢個週末，港女嘅好姊妹生日，我地就去咗海洋公園玩咗一日。雖然經常喺網上睇到有關海洋公園的新聞同埋依莉詩實測，但原來睇新聞同入場親身去玩係完全唔同。港女係大鄉里，唔玩由自可，去到我先發現海洋公園變咗好多…
面積大咗呢啲廢話就唔講喇（不過大咗即係要玩嘅地方多咗，結果就係玩完成身散晒?），港女發現園內有好多 WiFi 熱點，但係唔會用㗎囉，去玩仲㩒電話咩？
另外，動物館入面多咗好多 動物 互動展品，而且仲好好玩！例如鯊魚館入面有個 TLCD Mon（透明螢幕），入面放條鯊魚模型，螢幕上就可以俾小朋友睇到鯊魚不同的身體部分有咩功用，港女咁大個都想玩埋一份，哈哈。
睇返資料，應該係兩年前重新開館嗰陣就加入咗呢啲展品嘅～係咪好高科技呢？講真又唔係嘅，都只係個 touch mon 啫… 但可能港女同埋好姊妹真係太耐無去過，同時被一般博物館嘅展覽洗咗腦，無諗過海洋公園會有玩得嘅互動展品，所以有少少驚訝。
不過，呢啲 TLCD 展品好易出現故障，尤其海洋公園一日有咁多人次去玩，當日就有一個壞咗。好在佢都醒，放多幾個喺度俾人玩，一個壞咗可以玩住第二個先。
仲有一樣幾搞笑嘅事情，玩到天快黑的時候，我同好姊妹因為太攰諗住搵個地方坐下，咁啱見到有個類似「劇院」嘅地方有好多人排隊，咁我地就諗住順便入去坐下啦。臨入去之前有個哥哥就 brief 我地，講「不准拍打餵食」個啲開場白，當時我地仲以為佢講嗰啲野就好似迪士尼「我地即將進入奇妙世界」嘅對白，因為睇個門口完全無諗過入面會做咩，以為入去坐喺度睇片。
一入到去，首先企咗喺度 5 分鐘睇咗條唔知做咩嘅短片，我地仲心諗，「下！無得坐嘅！」睇完短片又叫我地走，以為自己中咗伏。再入去先發現原來我地誤打誤撞去咗睇樹熊同袋鼠，港女真係好白痴?呢個南澳動物館其實幾好，有好多互動遊戲俾小朋友玩同認識生態，好適合一家大細一齊去睇。不過唔知係佢特登定係港女傻仔，我喺個館出面真係唔知道入去會有樹熊同袋鼠睇囉 LOL
