空氣感瀏海都興咗一段時間，但辛辛苦苦 set 完個頭好快又會打回原型。今次我依莉詩就借咗支 SS Shiny Wire Free 熱捲梳，睇下係咪網上講到咁神奇，一捲就充滿空氣感先！
無線減少繞線煩惱
韓式熱捲梳有好多，點解近期 SS Shiny Wire Free Smart Styler 咁受歡迎呢？呢支其實係 volume queen 的延續，分別在於可以無線使用，捲頭髮時就唔駛就住就住，點捲都得，方便就手。而且熱捲梳好輕身，只係重普通髮梳少少，手勢同平時梳頭一樣，唔駛再學。加上用 USB 充電，唔擔心熱壓問題，出 Trip 或者去旅行都用得，隨時 set 個靚頭出門。
▲ 白色手柄的熱捲梳非常簡約，而包裝同散件都係白色為主，相比其他頭髮造型夾樸素。
▲ 熱捲梳外型與普通髮梳差不多，只係重少少，手勢同平時梳頭一樣，唔駛再學。
▲ 而且用 USB 充電，不但唔擔心電壓問題，仲可以用尿袋充電，十分方便。可以選擇邊充電邊用或者用 1至 1.5小時充電就可連續使用大概 20分鐘。
梳齒阻隔唔會燙傷
熱捲梳使用特殊鑽石陶瓷雙塗層發熱，開機後 3分鐘左右就夠熱，返工返學出門前開一開就用得。發熱層藏係梳齒之間，用手直接接觸熱捲梳都唔怕燙手，造型時就唔怕唔小心而燙傷了。而機身只有一粒開關，單按一下就可以調校溫度到 160度 、 180度 、 200度，方便不同髮質使用。不過因為會有梳齒阻隔，所以未算太熱，如果要 set 明顯的弧度就需要 200度，而且每次都要 hold 30秒以上先有效果。
▲ 手柄只有一粒開關，而溫度以藍燈顯示，相當易明，不過如果開關掣放係溫度圈中間會比較好，一來較美觀，二來唔會容易按錯開關而熄機。
▲ 熱捲梳頂部都有防熱膠，唔怕造型時不小心燙傷。
測試 1 — 空氣感瀏海一 take 過
第一時間找來齊陰的數碼港女試整空氣感瀏海。首先將齊陰薄薄一層拉起，放係熱捲梳上，再用另一隻手按壓實頭髮，輕輕向內捲，停留十秒左右就可以做出蓬鬆空氣感瀏海。瀏海的弧度突出，而且夾完的頭髮仍然有光澤，就算唔落定型啫喱都可以 keep 到 1小時左右。
▲ 數碼港女的瀏海明顯有蓬鬆的感覺。
▲ 我的瀏海比較長，所以效果未太突出。
測試 2 —捲髮尾需要耐性
瀏海的髮量比較少，所以好容易就做到空氣感效果。不過因為陶瓷板係梳齒中間，所以傳熱能力大減，每次只能捲一小束頭髮，要做到梨花頭內捲就需要好多耐性。加上熱捲梳沒有夾固定頭髮，所以每一下都要用另一隻手 hold 住，要自己捲後面的就有 D 難度。
▲ 拖至近髮尾三吋左右位置，向內轉的同時用另一隻手將髮尾順到熱捲梳上，停留約十五秒，完成一束頭髮。
▲ 每次只能捲一小束頭髮，要做到梨花頭內捲就需要好多耐性。
依莉詩：「手殘都捲到空氣感瀏海」
要捲空氣感瀏海話易唔易，如果用造型夾又好易燙到個額頭，而呢個熱捲梳就容易好多，加上無線設計，點捲都唔怕繞線，不過陶瓷板係梳齒之間，傳熱未係太夠，又無夾固定散開的頭髮，要用雙手先整到，所以用係後面的頭髮就不太方便。另外，熱捲梳用 USB充電，解決了電壓問題，去旅行都用得，隨時可以整充滿空氣感的韓式頭了。
售價：$348
查詢：Girlylane (55286883)
地址：荔枝角青山道682號 Trendy Centre 潮流工貿中心17樓02室（荔枝角地鐵站C出口）
