最近有關 Apple 的新聞及測試，大家都是圍繞著 iPhone，但其實可能大家，尤其是使用 Mac OS 的 wire 民都應該知道，macOS Sierra 這個最新版本的電腦 OS 終於在今日凌晨正式推出。現在就讓 Edward 為大家介紹如何升級，以及有哪 10 大技巧是升級後必定要用啦！
我的 Mac 可以升級至 macOS Sierra 嗎？
相信第一個大家都會問的問題一定是：我的 Mac 可以升級至使用 macOS Sierra 嗎？其實官方已有一個升級清單，大家可以看看你的 Mac 電腦是否在以下之列吧，如果是的話，恭喜你，可以升級了！
- MacBook (2009 年底或更新的型號)
- MacBook Pro (2010 年中或更新的型號)
- MacBook Air (2010 年底或更新的型號)
- Mac mini (2010 年中或更新的型號)
- iMac (2009 年底或更新的型號)
- Mac Pro (2010 年中或更新的型號)
如果不是的話，無計，可能你真的要考慮買過部新機了（但其實如果無得升，你部機都已經超過 6 年歷史，換機都好合理吧……）。另外要留意的是，有部分功能可能需要比上面列表更新的機款才能支援（例如：Apple Watch 自動解鎖），大家可以 <點按此> 瀏覽你的 Mac 可以用到幾多 macOS Sierra 的新功能及技巧吧。
如何升級？
咁如何升級呢？其實好簡單，理論上在 Mac OS 入面的 App Store，大家會見到有升級至 macOS Sierra 的通知，之後下載並按指示安裝就可以了。不過提提大家：最好在升級前，先備份好 Mac 內的檔案，如果平常有用 Time Machine 備份的話，就基本上不用擔心了。當然筆者並非指一定會有意外，但意外意外永遠是意料之外，先做備份始終比較安全嘅。如果大家真的想睇步驟，就請看下圖啦。
Step 1：進入 App Store 並找到 macOS Sierra 的版面，點選「下載」就可以升級至 macOS Sierra，整個 OS 大約是 4.77GB 左右，都需要一段時間下載（視乎大家的寬頻網速而定），大家此時可以去沖番杯咖啡先。
Step 02：當下載完成後就會自動開啟安裝程式，此時按次序選擇 Continue –> Agree x 2 –> Install，再輸入你的電腦密碼。
Step 03：此時又係等的時間，安裝都需要大約半個小時左右，大家可以去睇陣電視或者打舖機先。當完成後，電腦會自動重新啟動。
Step 04：Mac 重新啟動後，按次序輸入你的 iCloud 密碼 –> Agree x 2，然後輸入你的 iPhone 密碼（如果之前有設定 iCloud 受 iPhone 密碼保護，如沒有就沒有這步驟）。
Step 05：大功告成！你的 Mac 電腦已免費升級至 macOS Sierra 了！
10 大必用 macOS Sierra 秘技
那麼 macOS Sierra 作為第一個名稱由 Mac OS X 轉為 macOS 的 Mac 作業系統，究竟有什麼新的好用功能呢？而家就等 Edward 精選 10 個出來同大家講講，同埋教埋大家點用啦。
1. 行埋去即解鎖即用
macOS Sierra 有個全新功能，就係大家只要行埋部 Mac 附近，唔洗密碼唔洗人臉辦識都唔洗指紋、虹膜解鎖，就即刻解到鎖用得到！係咪好智能呢？係架！而且唔好以為其他人行埋去一樣得，實情係只有你行埋去先有呢個效果。係咪好勁呢？係架！不過，首先你要有……一隻 Apple Watch！無錯，macOS Sierra 就新增支援以 Apple Watch 解鎖 Mac。不過大家要留意，如果大家之前關了機或者在 reboot 系統時，要重新登入 Mac 仍然是需要手動輸入密碼的，此功能只適用於 macOS 進入休眠後，如果想喚醒 Mac 就可使用此方法，免除輸入密碼的痛苦。
究竟點做？以下就等 Edward 教教大家點樣設定及使用啦。
Step 01：首先要確保你的 Apple Watch 已經設定好並連接到與安裝了 macOS Sierra 的 Mac 電腦相同的 Apple ID，並確保你的 Apple Watch 已升級至 watchOS 3。
Step 02：然後在已升級至 macOS Sierra 的 Mac 上進入「系統偏好設定」，之後進入「安全性與隱私」，大家就會看到「一般」的上半部，有一個「允許 Apple Watch 解鎖您的 Mac：」的項目。
Step 03：之後點選你想用來解鎖 Mac 的 Apple Watch（如果你只有一隻錶當然只有一個選擇，如果有多於一隻 Apple Watch 連結至相同的 Apple ID，此時就會像筆者般見到多過一個選擇），然後輸入電腦的密碼再按「好」，之後等一會兒，就可以用 Apple Watch 解鎖 Mac 了。
Step 04：影片示範：大家看看這段影片，就知道如何使用 Apple Watch 解鎖 Mac 了，大家可以見到如果在可以用 Apple Watch 解鎖的狀態，當熒幕亮起的一刻是不會有位置給大家輸入密碼的。而當 Apple Watch 移近 Mac 時，熒幕鎖定就自動解除，超級靈敏。不過大家要留意的是：大家需要戴著 Apple Watch 兼且 Apple Watch 處於沒有鎖定的狀況下才能使用此登入方法，缺一不可。
2. 送埋貼身私人秘書
咩話？送埋個貼身私人秘書咁好？仲要係男、女任揀？係架！皆因 macOS Sierra 終於加入支援 Siri，無論大家想加入新行程、查詢天氣股票、傳送 iMessage 訊息、尋找檔案、甚至只係想 Siri 講個笑話俾你聽，都一樣無問題。如果有用過 iPhone 的 wire 民，相信就更加唔洗筆者多講點用啦掛？唯一缺點就係唔似 iOS 上面咁，隨時隨地講句「喂 Siri」就可啟動，要按下 Dock 左二或右上角右二的 Siri 按鍵，又或者按住「Command + Space」這個組合鍵不放開啟 Siri 功能，呢個就比較失色了。至於 macOS Sierra 內的 Siri 可以幫到大家做乜？大家可以 <點按此> 瀏覽早前水哥的實試文，又或者索性睇以下的水哥實試片段。
值得一提的是，上面影片入面，大家見到水哥測試用 Siri 幫手搵相同埋搵檔案兩項都失敗了，但筆者在正式版 macOS Sierra 中，就發現此問題已經被解決，所以大家都唔洗太擔心 Siri 幫唔到手啦。
▲大家可以見到，即使筆者的指令講到佢辨識唔到部分字，但都幫到我搵到個 file，沒有了 beta 時候尋找不能的問題。
▲同樣地，當筆者以 Siri 幫我找出在沙圖影的相片的時候，很快就開啟了「照片」程式並展示在沙田拍攝的相片，同樣沒有了 beta 時做不到這功能的問題。
3. iPhone 寫稿番到公司電腦繼續做
好似筆者呢種成日要出去工作的人，在街上面或者記者會入面，用 iPhone 或者 iPad Pro 寫稿可以講係等閒事。不過有時未必下下上到網，又或者上網表現一般般，所以只能用文字編輯 APP 打定先（例如：Page），之後番到公司之後用 iCloud 同步番去 Mac 度繼續打，不過始終就唔夠方便，尤其是有時在 iPhone 搵到料，之後要先儲存張相或者 link，之後再用 Air Drop 或者電郵 send 番去電腦度處理，都幾麻煩。macOS Sierra 就加入了通用剪貼簿功能，只要在 iPhone / iPad 上面複製文字、相片或者連結等，之後在連接相同 Apple ID 的 Mac 上貼上就得架啦，超級方便！而家就教教大家點做啦。
▲用法其實好簡單，只要選取想複製嘅文字，再好似平時咁揀 Copy。
▲想複製相片亦都係用相同嘅方法，配合埋有 3D Touch 嘅 iPhone 6s / Plus 就更加好用。
▲之後喺 macOS 入面任何軟件，只要揀選 Paste 就可以將文字同圖貼上，經測試用 Wi-Fi 貼圖會較快。
4. 係街要搵番公司檔案唔洗 NAS 不用 Remote Control
有時係街度工作，可能要隨時拿番公司電腦入面的檔案，以往唔少人會選擇將檔案放在 NAS 或者雲端儲存空間，又或者直接安裝 Remote Control 程式，駁番公司部電腦度搵番個檔案。不過當大家的 Mac 升級至 macOS Sierra 後，只要 Mac 接駁了 iCloud，就可以將電腦內的檔案備份到雲端儲存，當要在街上拿番公司電腦的檔案時，只要透過 iPhone / iPad 內的 iCloud Drive 程式，就可以睇到公司電腦內已同步的檔案，之後只要下載到流動裝置就可以了，超級簡單！
▲macOS Sierra 入面個 iCloud Drive 就會見到更加多嘅資料夾，當中包括咗桌面同埋文件。
▲iOS Device 要用嘅話，就同樣必需升級至 iOS 10 先可以見到所有資料夾。
▲以測試用嘅 Desktop 資料為例，用 iPhone 進入就可以見到所有在 macOS 桌面嘅檔案。
▲如果要喺 iOS Device 上面睇片或者聽歌，都要先從 iCloud Drive 下載就可以播放。
▲如果開啟好似文字檔呢類文書檔案，仲可以直接喺 iOS Device 上進行編輯。
▲最重要就喺會即時同步落 macOS，咁就唔洗再用好似 Dropbox 或者 Google Drive。
5. 更多 APP 可用 Tab
最後一項新功能，就是任何 APP 都可以用 Tab 功能。以往一般只是用來瀏覽網頁的程式，例如：Safari、Chrome 等，又或者 Finder 可以用 Tab，方便大家同一時間瀏覽多個網頁；而去到 macOS Sierra 上，就連地圖、Apple 官方的文件編輯程式（例如：Pages、Numbers 等）、甚至有些第三方程式都可以支援 Tab 功能，令大家多工作業上更具效率，不過要提提大家：如果想知道你用開的第三方程式何時可支援此功能，就需要向軟件公司方面查詢了。
▲部份支援 TAB 功能嘅 App，可以在 Window 下面揀「顯示標籤列」。
▲之後就可以好似平時大家用開嘅 Browser 咁，只要按「+」就可以用 TAB 形式開多幾個又唔會令到桌面好亂。
6. 買 128GB / 256GB Mac 都唔驚唔夠位
以前買 Mac，可能大家都會考慮將儲存空間升級至 256GB 甚至 512GB SSD，如果 iMac 的話更可能升級至 1TB 或以上的儲存空間，畢竟而家的檔案愈來愈大，加埋唔同流動裝置的備份，有時真係唔太夠用。不過當大家升級至 macOS Sierra 後，就加入了「最佳化 Mac 儲存空間」功能，它會自動感應用家的電腦是否有足夠空間收藏檔案，如果夠的話就會全部完整內容儲存在 Mac，當空間不足時，就會將較舊的文件儲存在 iCloud，等他日有需要用回時才下載回來。另外，新 OS 亦會提示用家刪除已安裝好的 APP 安裝程式，亦會清除重複的下載檔、cache、記錄等不必要檔案，就連放在垃圾桶超過 30 日的檔案都會自動為你清走。這種做法就可以令大家買 128GB / 256GB SSD Mac 電腦都可以有足夠空間可用了！不過嘛……睇來大家都係時候要睇睇你的 iCloud 儲存空間夠唔夠用了……
▲喺左面會列出唔同類型嘅檔案現時所佔用嘅空間，至於右面則是建議選項，可以幫大家釋放空間。
▲如果各位 wire 民鍾意經 iTunes 睇片嘅話，利用呢個功能就可以直接刪除已觀看嘅影片，可以釋放大量空間。
▲除咗片之外，相亦都係佔用空間嘅重要元兇之一，新功能就只會保留較常用嘅檔案或者相片，其餘就會上傳至 iCloud，當要再用時先從 iCloud 下載。
7. 電腦 shopping 一樣靠指紋
有在 iPhone / iPad 用過 Apple Pay 購物的 wire 民應該都會覺得，唔洗入密碼，只需要一個指紋就可 shopping，確實十分方便！不過似乎暫時唔多網站支援呢項功能，睇來要試就要遲少少了。
8. 照片新增「回憶」功能
每次 Mac OS 更新都會增加照片程式的功能，今次在 macOS Sierra 中，Apple 就增加了「回憶」這項功能，它會自動掃描相簿中的所有相片，並按人物、地點、事件等自動組合不同的相片 + 影片 MV，令大家可以快速簡易將它們分享到不同的社交平台，以與電郵與朋友分享。
9. 用 iMessage 對話更過癮
以往相信大家都好少用到電腦版內的 iMessage（訊息）吧？但去到 macOS Sierra 上，看來大家都會有興趣試下用了，尤其是與同樣使用 Mac 的朋友溝通，因為它變得與 iOS 10 一樣，擁有不少共同的新功能，例如：更大的 emoji、以符號即時回應對方回覆、甚至不用跳出訊息程式，直接在入面預覽朋友傳來的影片或者網頁預覽，確實十分方便。由於在 iOS 10 時已為大家介紹過，在此就不作多述了。
10. 畫中畫邊打機邊睇片 OK
macOS Sierra 亦加入了支援將網頁中欣賞的影片，又或者 iTunes 中租 / 買回來的影片，將它以「畫中畫」形式播放，這樣大家可以用全熒幕睇網頁 / 工作 / 打機之餘，亦可同時睇片，確實方便。而且就連港人常用的 YouTube 都用到，確實係幾唔錯！
▲好似 Viemo 咁當播放影片時就可以按右下角的 PIP 圖示。
▲影片就會獨立分割出來，咁大家就可以邊睇片邊執行其他程式。
▲仲可以自由移動到唔同嘅位置，亦都可以調整影片嘅大小。
總結：macOS 進一步 iOS 化
總括而言，雖然今次 macOS 連名稱都轉了（由 MacOS X 轉為 macOS），但實際上新功能或介面改動不算太多，嚴格來說是整體將 macOS 及 iOS 兩個作業系統之間的距離拉得更近，亦增加了兩個 OS 之間的連動功能，某程度上令大家有種「用得 iPhone 就梗係用埋 Mac 先夠方便」或 vice versa 的感覺，這種做法是聰明的。至於這個正式版，Edward 在 Retina MacBook 上使用，暫時就未見有明顯 bug 出現，未知大家又試成點呢？不如一齊分享下用後感呀！
