無論幾唔願接受都好，聖誕都係一個 sweet sweet 嘅節日，但無人講邊一定要情侶先可以甜甜蜜蜜，一家大細都可以架！大大片朱古力、超繽紛啫喱糖同果汁硬糖就由虛擬遊戲 Candy Crush 變成現實，令荃新天地變成一個大小朋友嘅樂園！
特大糖果咕臣瞓身影
今次荃新天地嘅聖誕佈置並非以影相為主，不過 1期中間嘅聖誕樹掛著大小不一嘅 CandyCrush 經典糖果，樹下更放滿起巨型糖果咕臣，大家可以隨意瞓係滿滿嘅糖果池內自拍，猶如被糖果重重包圍，甜蜜又滿足！
▲ 聖誕樹下更放滿起巨型糖果咕臣，好吸引呢！
▲ 瞓係滿滿嘅糖果池內，連身形都細笠咗！
4大遊戲等你玩
影完靚相就係玩嘅時候！今次嘉年華有多個大型遊戲裝置，除咗 1 期嘅「糖果障礙賽」、「超級彈起充氣城堡」、「破冰SUGAR CRUSH」外， 2期更有 Candy Crush 街機遊戲。只要以電子貨幣於場內即日單一消費滿 $200 就可以換領遊戲券一張 (每套單據最多可換領 3 張)，玩其中一款遊戲。而我依莉詩已經試玩晒 4樣，一於幫大家揀下啦！
1) Candy Crush 街機熒幕更多更投入
有玩過 Candy Crush 嘅朋友又點可以唔玩呢部全港首次公開亮相嘅 Candy Crush街機遊戲，熒幕大咗幾倍，加上音效，玩落就更加投入！
▲ 我曾經都沈迷過一排 Candy Crush，都玩到 400幾關，所以街機對我嚟講完全無難度，輕易就升到 lv 10 了！你又夠唔夠膽挑戰呢？
2) 糖果障礙賽挑戰大家身手和膽量
巨型糖果不但已經實體化，更加融入成「糖果障礙賽」，大家先要以極速越過繽紛過糖果池，再靠平衡力完成獨木橋，最後爬上長長嘅滑梯滑下，少刺激大樂趣！
▲ 獨木橋其實好寬，不過都要小心唔好踩中啲波呀！
▲ 因為滑梯都有一定危險，所以障礙賽只限身高高過 90cm 先可以挑戰。
3) 方塊充氣彈床被糖果包圍
大朋友玩障礙賽，小朋友就可以玩充氣彈床。係粉紅粉藍嘅格仔充氣彈床內，放滿充氣糖果，色彩繽紛令人更加興奮，小朋友就可以盡情放電！
▲ 粉紅粉藍嘅格仔充氣彈床內放滿充氣糖果，繽紛色彩令人情緒高脹呢！
▲ 可惜彈床只限身高 90-120cm 嘅小朋友玩，大人就只係得個恨字了！
4) 限時過三關考身手與運氣
Candy Crush 嘅根本就係要將 3粒以上嘅糖果串埋，而呢個「破冰SUGAR CRUSH」玩法亦類似，大家要拋擲大型糖果，係限時內將 3粒糖果連成一直線，絕對係身手同運氣嘅考驗！
▲ 唔想糖果反彈，記得要輕輕力掟啊！
▲ 齋玩又點會夠，只要完成一個遊戲就可以得到一個蓋印，集齊後就有機會得到 Candy Crush 限量紀念品啦！
換領 Candy Crush精品
談到商場換領精品，大家只要憑指定 Citywalk Card 積分換領，當中包括糖果咕臣、繽紛糖果兒童抓毛毯 同 A5糖果小物袋，全部都色彩繽紛，一定可以將歡樂再回家呢！
▲ 11 月 19 日起憑 1,000 Citywalk Card 積分就可以換領 A5糖果小物袋，而 12 月 3 日起憑 5,000 Citywalk Card 積分就可以換領繽紛糖果兒童抓毛毯，最後由 12 月 17 日起憑 3,000 Citywalk Card 積分就可以換領糖果咕臣。
依莉詩點評
雖然今次荃新天地嘅聖誕佈置並非以影相為主，聖誕樹下嘅巨型糖果咕臣，非常得意，而且可以隨意瞓係滿滿嘅糖果池，猶如被糖果重重包圍，係超靚打卡位呢！至於遊戲方面阻礙賽難度唔高，帶來少刺激大樂趣，而我最鍾意係彈床，充氣糖果夠繽紛，愈彈愈興奮，可惜只張 90-120cm 嘅小朋友玩，未必個個都玩到呢！
聖誕氣氛 ★★★☆☆
必影指數 ★★☆☆☆
必玩指數 ★★★☆☆
相關影片:
Candy Crush 聖誕糖果嘉年華
日期：11 月 19 日至 2017 年 1 月 2 日
地點：荃新天地 1 期及 2 期
遊戲裝置開放時間：
11 月 19 日至 12 月 4 日(逢星期六及日下午 1 時至 9 時)
12 月 10 日至 1 月 2 日(每日下午 1 時至 9 時)
