今日已經係年三十喇，準備好過年未呀？近幾年乜都講要電子化、要智能，就連新年呢啲傳統節日都沒有例外，早幾年先有大陸微信出咗個 in-app 發紅包（派利是）功能，然後香港拍住上，啲銀行自己出電子利是功能，上年東亞就有 i 利是，今年匯豐就有 e 利是… 然而智能化傳統習俗仲未完結㗎，今年又有咩新嘢??♀️（港女無眼睇）。
話說而家多咗好多 O2O 嘅服務，有人就趁農曆新年，推出一個「代上頭炷香服務」，只要你喺網上落好 order，寫好要人幫你求咩運，裝唔裝香等等，佢地就會派人去幫啲「善信」排隊，一踏入年初一，就去上頭炷香。除此之外，佢地仲有代煮團年飯、代寫揮春、代買年花等等服務。
▲港女接受唔到呢個服務，迷信嘅人一定會問，如果出咗咩事，係咪可以入你數先？
根據民間定義，「頭炷香」係指新年的第一位上香者，港女真係唔知佢咁樣集合一班「善信」，再幫佢地上香，就算畀佢排到第一，嗰炷係咪都仲係「頭炷香」??♀️。
但港女覺得，唔係樣樣事情都可以搵人代勞/搵工具取代/用電子方法簡化。例如善信上香、祭祀、祈福，應該係一種誠意，表達你對神明的敬畏，祈求得到保祐；而派/收利是，港女一直都相信係一種祝福，亦係一個機會畀你去同親朋戚友表達關心／問候，雖然有時同親朋戚友真係講來講去都係嗰啲無咩深度的無聊事情，但 enough！一年見得幾多次啫？寒喧下夠有凸啦。
▲ 咁樣係過錢，邊係派利是？??♀️
如果個個傳統習俗都可以搵人代勞/搵工具取代/用電子方法簡化，港女其實唔介意代大家去拜年、同人吹水、收埋利是（抽佣 90％?），麻煩大家填一填 form，講低日子，我會分配好啲時間㗎喇。
